ថ្ងៃ១៣មេសានេះនៅ បេឡូរុស្ស៊ីជាទិវាកាន់មរណទុក្ខ
កាន់មរណទុក្ខនេះគឺដើម្បីរំលឹកដល់វិញ្ញាណក្ខន្ធប្រជាពលរដ្ឋដែលបាន អភ័ព្វស្លាប់ទៅក្នុងអំពើភេរវកម្មបំផ្ទុះគ្រាប់បែកនៅស្ថានីយម៉េត្រូទីក្រុង Minsk រដ្ឋធានីប្រទេសកាលពីល្ងាចម្សិលម៉្ងៃ។ ភេរវកម្ម នេះបានផ្តាច់ជីវិតអ្នកដំណើរអស់ ១២នាក់ និងរបួសជិត ២០០នាក់។ បើលោកប្រធានាធិបតី Loukachenko ថ្លែងថាភេរវកម្មនេះអាចចាត់ចែងដោយ””កម្លាំងនៅក្រៅ”នោះបក្សប្រឆាំង ស្រាប់តែទាមទារឲ្យបិទព្រំប្រទល់ជាមួយរុស្ស៊ីដើម្បីខ្ទប់ផ្លូវកុំ ឲ្យភេរវជនជ្រៀតចូលទៅក្នុងប្រទេស បេឡូរុស្ស៊ី-ដោយចេញពីខាងរុស្ស៊ីទៅ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយាពីទីក្រុង ម៉ូស្គូ
ជាបឋមសូមរំលឹកថា គឺនៅម្តុំម៉ោង៦ល្ងាចថ្ងៃ១១មេសាម្សិលម៉្ងៃដែលក្នុងស្ថានីយមួយនៃម៉េត្រូ ចំកណ្តាលទីក្រុងMinsk ពេលដែលមនុស្សរាប់រយនាក់កំពុងឈរចាំការបើកមកដល់នៃរថភ្លើងដើម្បីឡើងជិះ ស្រាប់តែមានលាន់សូរផ្ទុះគ្ឌាំងបណ្តាល ឲ្យស្លាប់នៅនឹងកន្លែងអស់១១នាក់ ហើយម្នាក់ទៀតក្រោយមកស្លាប់នៅមន្ទីរពេទ្យ។ ពីក្នុងចំណោមអ្នករបួស ជិត២០០នាក់ ធ្ងន់មែនទែន គឺ៤០នាក់។ ការស៊ើបអង្កេតបង្ហាញឲ្យឃើញថា ផ្ទុះនោះគឺចេញពីក្រោមកៅអីវែង ទុកសម្រាប់អ្នកដំណើរ អង្គុយចាំរថភ្លើង។
ថ្ងៃនេះកាសែត Kommersant នៃក្រុងម៉ូស្គូ យោងទៅលើរូបភាពថតដោយCamera Video ដែលខ្លួនចេះ ទទួលបានពីប្រភពក្នុងក្រសួងសន្តិសុខ KGB បេឡូរុស្ស៊ី ចុះផ្សាយថាជនដែលបានយួរស្បោងផ្ទុកទៅដោយធាតុផ្ទុះTNT ប្រមាណ៥គីឡូក្រាម យកទៅលាក់ទុកក្រោមកៅអីនោះ គឺមានមុខមាត់ មិនមែនជាអ្នកមកពីតំបន់ភ្នំCaucase ប្រកបដោយ ស្បែកពណ៌ស្រអែមឡើយ តែ មានទម្រង់មុខ ជាពូជស្លាវដូចរុស្ស៊ី និងទូទៅ ជាសាសន៍អឺរ៉ុប។ បុរសនេះ បានដើរយ៉ាងព្រងើយទៅដាក់ស្បោងខ្លួននោះនៅខាងក្រោមកៅអីវែងរួច តាមចលនាជននេះគេឃើញថា ស្បោងនោះឯង ពិតជាធ្ងន់។ បន្ទាប់មក ជននេះ ក៏ដើរយ៉ាងព្រងើយចេញ ទៅវិញដែរ។
មកទល់ឥឡូវ KGB បេឡូរុស្ស៊ីឃាត់ខ្លួនជនជាប់សង្ស័យបាន៧នាក់ហើយ។ក្រសួងសន្តិសុខនេះ ធ្វើការបកស្រាយ៣យ៉ាង អំពីមូលហេតុនៃភេរវកម្មនោះ គឺថា ៖
ទី១- នាំជាអស្ថិរភាពដល់ស្ថានការណ៍នៅ បេឡូរុស្ស៊ី។
ទី២- វាជាការសងសឹក ពីខាងពពួកអង្គការជ្រុលនិយម។
ទី៣- ភេរវកម្មនេះ អាចប្រព្រឹត្ត ដោយមនុស្សដែលមានខួរក្បាលដើរមិនស្រួល។
តបនឹងសំដីលោកប្រធានាធិបតី Loukachenkoដែលថា ៖ “ កាដូនេះអាចនាំពីក្រៅមក ដើម្បីជួយដល់ពួកនៅក្នុងស្រុក “ មេបក្សប្រឆាំងមួយ គឺបក្ស” រណសិរ្សប្រជាជនបេឡារុស្ស៊ី “ លោក Kostusev ដែលធ្លាប់បានឈរឈ្មោះជាបេក្ខជនប្រធានាធិបតីទៅផង ខំថ្លែងដោះសា ដោយប្រញាប់ប្រញាល់ថា “ ជាមួយរុស្ស៊ី យើងត្រូវតែមានទំនាក់ទំនងល្អ ប៉ុន្តែព្រំប្រទល់ជាមួយប្រទេសនេះ មិនត្រូវបើកចំហដូចសព្វថ្ងៃឡើយ ដែលបង្កជាលក្ខណៈសម្រាប់ការជ្រៀតចូល ទៅក្នុងដែនដីបេឡូរុស្ស៊ីនៃពួកភេរវជនពីខាងរុស្ស៊ី។
ចំណែករុស្ស៊ីផ្ទាល់ដែលរមែងរងគ្រោះដោយអំពើភេរវកម្ម បានបញ្ជូនទៅហើយ ទៅកាន់ បេឡូរុស្ស៊ី គឺពួកអ្នកឯកទេសខ្លួន ដើម្បីជួយវែកមុខរកឧក្រិដ្ឋជនដែលបានបំផ្ទុះគ្រាប់បែកក្នុងម៉េត្រូទីក្រុងMinsk៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ