ការបញ្ជូនខ្លួន Ratko Mladic ទៅតុលាការព្រហ្មទណ្ឌអន្តរជាតិនៅទីក្រុងឡាអេ
លោក Ratko Mladic អតីតប្រមុខយោធាស៊ែរប៊ីនៅបូស្នី(អតីតយូហ្គោស្លាវី) ដែលជាប់ចោទពីបទប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ហើយដែលតុលាការព្រហ្មទណ្ឌអន្តរជាតិនៅទីក្រុងឡាអេបានតាមរកចាប់ខ្លូនអស់រយៈពេល ១៦ឆ្នាំមកហើយនោះ បានត្រូវគេបញ្ជូនខ្លួនទៅប្រទេសហូឡង់កាលពីថ្ងៃអង្គារទី៣១ឧសភា ឆ្នាំ២០១១ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីថ្លែងការណ៍របស់តុលាការព្រហ្មទណ្ឌអន្តរជាតិនៅទីក្រុងឡាអេបានឲ្យដឹងថា អតីតឧត្តមសេនីយស៊ែរប៊ីRatko Mladicបានត្រូវគេបញ្ជូនមកដល់មន្ទីរឃុំឃាំងរបស់តុលាការព្រហ្មទណ្ឌអន្តរជាតិនៅម៉ោង១៩និង៥០នាទីម៉ោងសាកល កាលពីថ្ងៃអង្គារទី៣១ឧសភាឆ្នាំ២០១១ម្សិលមិញ។
លោកRatko Mladic អតីតប្រមុខយោធាស៊ែរប៊ីនៅបូស្នី(អតីតយូហ្គោស្លាវី)មានអាយុ៦៩ឆ្នាំបានត្រូវគេដឹកបញ្ជូនមកប្រទេសហូឡង់តាមរយៈយន្តហោះមួយគ្រឿងដែលមានចារឈ្មោះថា “សាធារណរដ្ឋស៊ែរប៊ី” នេះបើយោងតាមរូបភាពដែលបានផ្សាយឲ្យឃើញដោយទូរទស្សន៍សាធារណៈហូឡង់។
សូមបញ្ជាក់ថា អតីតឧត្តមសេនីយស៊ែរប៊ីRatko Mladicបានត្រូវគេចាប់ខ្លួនកាលពីថ្ងៃព្រហស្បតិ៍មុននៅLazarevoដែលជាភូមិតូចមួយឋិតនៅប៉ែកឦសាននៃប្រទេសស៊ែរប៊ី។ លោកRatko Mladicបានធ្វើការប្រឆាំងនឹងការបញ្ជូនរូបលោកទៅ តុលាការព្រហ្មទណ្ឌអន្តរជាតិនៅទីក្រុងឡាអេ ដោយបានអះអាងថាលោកមានជម្ងឺឈឺធ្ងន់។ ក៏ប៉ុន្តែតុលាការនៃប្រទេសស៊ែរប៊ីបានបដិសេធការប្រឆាំងតវ៉ារបស់លោកRatko Mladic ហើយក៏បានសម្រេចបញ្ជូនខ្លួនលោកRatko Mladicទៅតុលាការព្រហ្មទណ្ឌអន្តរជាតិនៅប្រទេសហូឡង់។
លោកRatko Mladic ជាប់ចោទពីបទប្រល័យពូជសាសន៍ ឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ ដែលបានប្រព្រឹត្តនារយៈពេលសង្គ្រាមនៅបូស្នី(អតីតយូហ្គោស្លាវី)នៅឆ្នាំ១៩៩២-១៩៩៥។ សង្គ្រាមដែលបានបណ្តាលឲ្យមានមនុស្សស្លាប់ប្រមាណ១០០ ០០០នាក់និងបានជម្លៀសប្រជាជនប្រមាណ២លាន២សែននាក់ ហើយជាពិសេសមានការសម្លាប់រង្គាលនៅSrebrenicaនៅខែកក្កដាឆ្នាំ១៩៩៥ ដែលជាការសម្លាប់រង្គាលមួយដ៏ធំធេងពុំដែលកើតមាននៅអឺរ៉ុបចាប់តាំងពីសង្គ្រាមលោកលើកទីពីរមក។ ការសម្លាប់រង្គាលនៅSrebrenicaនេះបានបណ្តាលឲ្យប្រជាជនកាន់សាសនាអ៊ីស្លាមស្លាប់ប្រមាណ៨ ០០០នាក់។
នៅឯទីក្រុងBruxellesឯណោះ លោកស្រីCatherine Ashton ប្រមុខការទូតអឺរ៉ុបបានអបអរនឹងការបញ្ជូនខ្លួនRatko Mladic ទៅតុលាការព្រហ្មទណ្ឌអន្តរជាតិនៅទីក្រុងឡាអេដោយបានថ្លែងថា “ការកាត់ក្តីដោយតុលាការព្រហ្មទណ្ឌអន្តរជាតិនេះនឹងជួយបំភ្លឺបង្ហាញការពិតហើយក៏ជាកាតព្វកិច្ចមួយជួយរកយុត្តិធម៌ជូនគ្រួសារអ្នករងគ្រោះផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ