សមយុទ្ធកងអាកាសលើកទី១ រវាងរុស្ស៊ី និងអូតង់
សមយុទ្ធដែលចាប់ផ្តើមថ្ងៃ៦ មិថុនានេះ នឹងប្រព្រឹត្តទៅរហូតដល់ថ្ងៃ ១០ មិថុនា ក្រោមបាវចនាថា ”មេឃប្រុងប្រយ័ត្ន” ហៅថា “Vigilant Skies ឆ្នាំ២០១១” គឺតាំងគោលដៅបញ្ចៀសកុំឲ្យកើតមានទៀតឡើយ មហាភេរវកម្មប្រភេទដូចការវាយប្រហារពីអាកាស ទៅលើ “មជ្ឈមណ្ឌលពាណិជ្ជកម្មពិភពលោក” នៅក្រុងញីវយ៉កកាលពី ១០ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
តាមដែលតំណាងផ្លូវការនៃ “ គណៈកម្មាធិការជាតិរុស្ស៊ីខាងប្រឆាំងភេរវកម្ម “ លោក នីកូឡៃ ស៊ីនសូវប្រកាសឲ្យដឹងចូលរួមក្នុងលំហាត់សឹក ប្រឆាំងភេរវកម្មនៅអាកាសនេះ គឺ យន្តហោះប្រដេញរបស់អូតង់ និងរុស្ស៊ី ដោយមិនលំអិតអំពីចំនួនយន្តហោះឡើយ។ តាមប្រសាសន៍គាត់ លំហាត់សឹកនេះចែកជា២ដំណាក់៖ មុនដំបូង វាប្រព្រឹត្តទៅ គឺក្នុងផ្ទៃមេឃប៉ូឡូញ បន្ទាប់មក គឺក្នុងលំហអាកាសប្រទេសទួរគី។
ភារកិច្ចសមយុទ្ធ គឺបង្ហាញឲ្យឃើញដោយរួមគ្នា កម្មវិធីមួយរបស់រុស្ស៊ី និងអូតង់ ក្រោមឈ្មោះថា “ គំនិតផ្តួចផ្តើមខាងសហប្រតិបត្តិការក្នុងលំហអាកាស “ ដែលខ្លឹមសារវា គឺ ៖ បញ្ចៀសឲ្យផុតពីការវាយប្រហារភេរវនិយមដោយប្រើយន្តហោះស៊ីវិល ប្រភេទដូច ការវាយប្រហារទៅលើអគារភ្លោះដ៏ស្កឹមស្កៃនៃ “មជ្ឈមណ្ឌលពាណិជ្ជកម្មពិភពលោក” នៅក្រុងញីវយ៉កកាលពីថ្ងៃ ១១ កញ្ញា ឆ្នាំ២០០១។ បញ្ចៀសនេះ គឺតាមរយៈការផ្លាស់ប្តូរពត៌មាន ស្តីអំពីការហោះហើរនៃយន្តហោះស៊ីវិលក្នុងលំហអាកាសរបស់២៨ប្រទេសអូតង់ និងលំហអាកាសរបស់រុស្ស៊ី ហេតុដែលអនុញ្ញាតឲ្យព្រមានជាមុន អំពីអាកប្បកិរិយានៃយន្តហោះណា គួរឲ្យសង្ស័យ ពេលវាកំពុងហោះក្នុងផ្ទៃមេឃលុះទាល់តែតម្រូវឲ្យគូភាគីសម្របសម្រួលសកម្មភាពខ្លួន សម្រាប់បញ្ចេញប្រតិកម្មលឿនរហ័ស ទាន់ពេលវេលា ទល់នឹងគ្រោះថ្នាក់ភេរវកម្ម។
គួររំលឹកថា កម្មវិធីក្រោមឈ្មោះថា “ គំនិតផ្តួចផ្តើមខាងសហប្រតិបត្តិការក្នុងលំហអាកាស “ គ្រាន់តែជាមុខព្រួញមួយនៃសហប្រតិបត្តិការរុស្ស៊ី-អូតង់លើវិស័យបែបយ៉ាង ៖ប្រយុទ្ធទល់នឹងភេរវកម្ម សហប្រតិបត្តិការជុំវិញស្ថានការណ៍នៅអាហ្វហ្កានីស្តង់ សហប្រតិបត្តិការយោធា ប្រតិបត្តិការខាងជួយយកអាសាអ្នកធ្លាក់ក្នុងអាសន្នអន្ធក្រនៅសមុទ្រ ដំណោះស្រាយស្ថានការណ៍វិបត្តិ។ល។
អូតង់ដែលតែងត្រូវសហភាពសូវៀតចាត់ទុកជាសត្រូវខ្លួន បានផ្តើមសហការជាមួយប្រទេសរុស្ស៊ីសម័យថ្មី គឺក្នុងឆ្នាំ១៩៩៧ ដោយឈរលើ “ ឯកសារជាមូលដ្ឋានស្តីអំពីទំនាក់ទំនងទៅវិញ ទៅមក សហប្រតិបត្តិការ និងសន្តិសុខ “ ចុះឆ្នាំ១៩៩៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ