លោកស្រី Christine Lagarde ជាបេក្ខនារីនាំមុខគេនៅក្នុងកិច្ចប្រជុំជ្រើសរើសអគ្គនាយក FMI
គឺនៅថ្ងៃ អង្គារ នេះដែលក្រុមប្រឹក្សាភិបាលរបស់មូលនិធិរូបិយវត្ថុអន្តរជាតិ ហៅកាត់ថា FMI នឹងបើកកិច្ចប្រជុំសិក្សាទៅលើបេក្ខភាពចំនួនពីររូប ដែលនឹងត្រូវជ្រើសរើសអោយដឹកនាំស្ថាប័នខាងលើ។ លោកស្រី Christine Lagarde រដ្ឋមន្រ្តីក្រសួងហិរញ្ញវត្ថុបារាំង ដែលបានទទួលការគាំទ្រពីប្រទេសចិន អាចនឹងអង្គុយកៅអីអគ្គនាយក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
ច្បាស់ណាស់ បើមិនមានអ្វីប្រែប្រួលនោះទេ លោកស្រី Christine Lagarde រដ្ឋមន្រ្តីក្រសួងហិរញ្ញវត្ថុបារាំង ទំនងជានឹងត្រូវជ្រើសរើសអោយកាន់ក្បាលម៉ាស៊ីនរបស់ មូលនិធិរូបិយវត្ថុអន្តរជាតិហៅកាត់ ជាភាសាបារាំងថា FMI ។
នៅល្ងាចថ្ងៃ អង្គារ នេះ ក្រុមប្រឹក្សាភិបាលរបស់ស្ថាប័នខាងលើ ដែលមានសមាជិក ២៤ រូប នឹងបើកកិច្ចប្រជុំថ្លឹងថ្លែងពីសមត្ថភាពរបស់ រដ្ឋមន្រ្តីស្រីវ័យ ៥៥ ឆ្នាំរបស់បារាំង និង លោក Agustin Carstens អគ្គទេសាភិបាលរបស់ធនាគារម៊ិចស៊ិច ដែលមានវ័យតិចជាងលោកស្រីតែពីរឆ្នាំប៉ុណ្ណោះ។
បើទោះបីជា ការជ្រើសរើសជាផ្លូវការមិនទាន់បានប្រកាសចេញនៅឡើយក៏ដោយ ក៏គេមើលឃើញយ៉ាងច្បាស់នូវការគាំទ្ររបស់សមាជិកជាច្រើន ទៅលើបេក្ខភាពរបស់ លោកស្រី Christine Lagarde ជាពិសេសពីប្រទេសមហាអំណាចចិន។ គ្រាន់តែប្រទេសនេះមួយ មានសមាជិកដល់ទៅ១០រូប ទៅហើយ។
ម្យ៉ាងវិញទៀត រដ្ឋមន្រ្តីក្រសួងហិរញ្ញវត្ថុរបស់សហរដ្ឋអាមេរិក ក៏បានព្រលយពាក្យពីទំនោររបស់ខ្លួនផងដែរ។ « យើងចាប់អារម្មណ៍ឃើញថា មានការគាំទ្រជាច្រើនទៅលើបេក្ខជនមួយរូប » នេះជាសំដីរបស់លោក Timothy Geithner រដ្ឋមន្រ្តីក្រសួងហិរញ្ញវត្ថុរបស់សហរដ្ឋអាមេរិក។
ចំណែកឯបេក្ខភាព របស់លោក Agustin Carstens ឯណោះវិញ ទំនងជាទទួលបានការគាំទ្រពីសមាជិកតែ៥រូបប៉ុណ្ណោះ។
ការដែល លោកស្រី Christine Lagarde ក្លាយជាបេក្ខនារីនាំមុខគេក៏ដោយសារតែ គាត់អាចរក្សាស្ថិរភាពនៃកិច្ចសហប្រតិបត្តិការរវាង FMI និង តំបន់អឺរ៉ូផងដែរ។
គួរបញ្ជាក់ដែរថា ការសំរេចជ្រើសរើសអ្នកដឹកនាំថ្មីរបស់ស្ថាប័នខាងលើ ក៏ដោយសារតែ អគ្គនាយកចាស់ដែលជាជនជាតិបារាំងដែរនោះ គឺលោក Dominique Strauss Kanh បានលាលែងពីតំណែងបន្ទាប់ពីលោកត្រូវបានជាប់ចោទពីបទរំលោភសេពសន្ថវៈ ហើយកំពុងប្រឈមមុខច្បាប់របស់សហរដ្ឋអាមេរិកនាពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ