បក្សកាន់អំណាចព្រួតគ្នាវាយប្រហារអតីតមេដឹកនាំសូវៀត Gorbatchev
មូលហេតុមកពីលោក Gorbatchev ហ៊ានទិតៀនបក្សកាន់អំណាចឈ្មោះ“ យេឌីណាយ៉ា រ៉ូស្យ៉ា “ បក្សដែលមានរូបលោកនាយករដ្ឋមន្ត្រីពូទីនបុរសខ្លាំងនៅរុស្ស៊ីធ្វើជាប្រធាន ក៏ដូចជាទិតៀនរូបលោកពូទីនផ្ទាល់និងទិតៀន”សម្ព័ន្ធកាន់អំណាច” នៅរុស្ស៊ី គឺលោក “មេដវេដេវ-ពូទីន” ថ្វីដ្បិតតែមានការសរសើររូបលោកមេដវេដេវក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ដើមហេតុគឺមកពីក្នុងសម្ភាសន៍ឲ្យ៣ថ្ងៃមុនទៅវិទ្យុប្រជាប្រិយមួយនៃក្រុងម៉ូស្គូ លោក Gorbatchev ល្បីខាងធ្វើនយោបាយកំណែទម្រង់ក្រោម ឈ្មោះ ថា” Perestroika “ ដែលបានដឹកនាំសហភាពសូវៀតអស់៦ឆ្នាំ ពីឆ្នាំ១៩៨៥លុះទាល់តែរដ្ឋនេះរលាយបាត់ទៅ ក្នុងឆ្នាំ ១៩៩១ បានថ្លែងថា ៖ បក្សកាន់អំណាច “ យេឌីណាយ៉ា រ៉ូស្យ៉ា “ មានរូបពូទីនជាប្រធាន កំពុងអូសទាញប្រទេសរុស្ស៊ី ឲ្យដើរថយក្រោយ។ ដូច្នេះ យើងមិនអាចជឿទុកចិត្តលើបក្សនេះឡើយ។ បក្សនេះ ត្រូវនឹងបំណងចង់បានរបស់ពូទីនដែលចង់រក្សាទុកស្ថានភាពឲ្យនៅដដែលគឺនៅតោងអំណាចជាប់ ប៉ុន្តែ មិនមែនដើម្បី ដោះស្រាយឲ្យបានរួចឡើយនូវបញ្ហាដែលកំពុងចោទយ៉ាងមោះមុត។
ក្នុងសម្ភាសន៍នោះ លោក Gorbatchev បែរទៅជាសរសើរ លោកប្រធានាធិបតី មេដវេដេវ ថា ជាមនុស្សមានសមត្ថភាពមានចំណេះដឹងជ្រៅជ្រះ និងជាអ្នកច្បាប់ដ៏ជំនាញប៉ុន្តែដោយមកពីលោក មេដវេដេវ មានលក្ខណៈជ្រាយទន់ខ្សោយ គាត់ហាក់បីចងដៃចងជើងដោយលោក ពូទីន មិនអាចវាតសកម្មភាពខ្លួនទៅកើតឡើយ។
សំដីលោក Gorbatchev បានញ៉ាំងឲ្យមានប្រតិកម្មពុះខ្ជោល ពីខាងបក្សកាន់អំណាច។ លេខាបក្សនេះ លោក Serguei Neverov ដោយថ្លែងល្ងាចម្សិលមិញ បានបដិសេធច្រានចោល ការទិតៀនពីខាងលោកGorbatchev ទាំងក្រើនរំលឹកថា ៖
- ពិតជារូប Gorbatchev ដែលតែក្នុងរយៈពេល៦ឆ្នាំសោះនៃអំណាចខ្លួនបានបណ្តោយឲ្យមហាអំណាចសូវៀតរលំរលាយទៅ។
- តើបុគ្គលបែបយ៉ាង Gorbatchev ដែលក្នុងខែមីនាកន្លងទៅ បានប្រារព្ធយ៉ាងហ៊ឺហា ខួបកំណើត ៨០ឆ្នាំរបស់ខ្លួន នៅឯក្រុង Londres មានសិទ្ធិថ្លែងដែរឬ អំពីអ្វីដែលជា ក្តីប្រាថ្នាចង់បានរបស់ប្រជាជនរុស្ស៊ី?
- ពិតជារូប Gorbatchev ដែលធ្វើឲ្យរុស្ស៊ីវិះៗបាត់បង់ទាំងអធិបតេយ្យខ្លួនទៅទៀត។ មិនមែន ចៃដន្យទេដែលGorbatchev មានប្រជាប្រិយភាពនៅបស្ចិមលោក ជាងនៅក្នុងប្រទេសខ្លួន ពីព្រោះលោកខាងលិចមិនដែលប្រាថ្នាឃើញប្រទេសរុស្ស៊ីមានមហិទ្ធិឫទ្ធិខ្លាំងក្លាឡើយ។
គួររំលឹកថា បក្សកាន់អំណាច “ យេឌីណាយ៉ា រ៉ូស្យ៉ា “ ជាបក្សមានអាសនៈច្រើនលើសលុបដល់ទៅ៣១៥អាសនៈក្នុងចំណោមអាសនៈទាំងអស់៤៥០នៃរដ្ឋសភានីតិកាលបច្ចុប្បន្ននៅរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ