ជំនួបកំពូល G20 នៅទីក្រុងកាន
ជំនួបកំពូល G20 បើកកិច្ចប្រជុំរបស់ខ្លួននៅថ្ងៃព្រហស្បតិ៍ទី៣និងថ្ងៃសុក្រទី៤វិច្ឆិកាស្អែកនៅទីក្រុងកានឋិតនៅប៉ែកខាងត្បូងនៃប្រទេសបារាំង។ ក្រៅពីបញ្ហាវិបត្តិហិរញ្ញវត្ថុនៃប្រទេសក្រិក នៅមានសំណុំរឿងសំខាន់ៗជាច្រើនទៀតដែលជំនួបពូល G20ត្រូវលើកយកមកពិភាក្សា។
ចុះផ្សាយនៅថ្ងៃ៖ កែប្រែថ្ងៃទី៖
ជំនួបពូល G20 នៅទីក្រុងកាននឹងលើកយកសំណុំរឿងសំខាន់ៗបួនមកពិភាក្សា ៖
ទី១- ជំរុញឲ្យមានសន្ទុះកំណើនសេដ្ឋកិច្ចពិភពលោក
ជំនួបពូល G20 ត្រូវតែបញ្ជូនសញ្ញាមួយឲ្យបានខ្លាំងក្លាក្នុងន័យនេះ ជាពិសេសក្នុងខណៈពេលដែលតំបន់អឺរ៉ូកំពុងខិតទៅរកដំណើរសេដ្ឋកិច្ចដើរថយក្រោយ ហើយនិងនៅខណៈពេលដែលសេដ្ឋកិច្ចនៃប្រទេសអាស៊ីសំខាន់ៗមួយចំនួនកំពុងឃើញសន្ទុះនៃកំណើនសេដ្ឋកិច្ចរបស់ខ្លួនចាប់ធ្លាក់ស្រុតចុះ។
ទី២- កែទម្រង់ប្រព័ន្ធរូបិយវត្ថុអន្តរជាតិ
ការពង្រឹងតួនាទីនិងសមត្ថភាពធ្វើអន្តរាគមន៍របស់មូលនិធិរូបិយវត្ថុអន្តរជាតិ FMI ក៏នឹងត្រូវគេលើកយកមកពិភាក្សានាឱកាសជំនួបកំពូល G20 នៅទីក្រុងកាននេះដែរ។
ទី៣- បង្កើតពន្ធថ្មីដាក់ទៅលើសកម្មភាពជួញដូរហិរញ្ញវត្ថុ
លោកប្រធានាធិបតីបារាំងនីកូឡាសាកូហ្ស៊ីស្នើឲ្យបង្កើតឲ្យមានពន្ធថ្មីមួយដាក់ទៅលើសកម្មភាពជួញដូរហិរញ្ញវត្ថុ។ ប្រាក់ចំណូលបានមកពីវិស័យនេះ នឹងត្រូវយកទៅជួយប្រទេសកំពុងអភិវឌ្ឍន៍ក្រីក្រ។
ទី៤- ប្រយុទ្ធប្រឆាំងនឹងបញ្ហាទំនិញឡើងថ្លៃជាពិសេសវត្ថុធាតុដើម
អាទិភាពមួយទៀតសម្រាប់ជំនួបកំពូល G20 នៅទីក្រុងកានគឺធ្វើការប្រយុទ្ធប្រឆាំងនឹងបញ្ហាទំនិញឡើងថ្លៃជាពិសេសវត្ថុធាតុដើមហើយនិងកសិផលដែលក្លាយជាឧបសគ្គដល់សន្ទុះកំណើនសេដ្ឋកិច្ចពិភពលោក ហើយនិងគំរាមដល់សន្តិសុខចំណីអាហាររបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ