អ៊ុយក្រែននិងលោកខាងលិចព្រមានរុស្ស៊ីកុំឲ្យចូលធ្វើអន្តរាគមន៍យោធានៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:០៧
នៅថ្ងៃព្រហស្បតិ៍នេះ សភាអ៊ុយក្រែនបានបោះឆ្នោតតែងតាំងរដ្ឋាភិបាលបណ្តោះអាសន្នថ្មីមួយ ដែលមាននាយករដ្ឋមន្រ្តីជាអ្នកនយោបាយមានទំនោរទៅរកសហភាពអឺរ៉ុប។ ក្នុងពេលជាមួយគ្នា នៅប៉ែកខាងកើតប្រទេសអ៊ុយក្រែន ជនប្រដាប់អាវុធមួយក្រុមបានចូលកាន់កាប់ និងដោតទង់ជាតិរុស្ស៊ី នៅលើអគាររដ្ឋាភិបាល។ ហេតុការណ៍នេះកើតឡើង មួយថ្ងៃក្រោយពីលោកពូទីនបញ្ជាឲ្យកងទ័ពរុស្ស៊ីស្ថិតក្នុងសភាពប្រុងជើងការខ្ពស់។
ក្រុមជនប្រដាប់អាវុធ ដែលមានគ្នាប្រហែលជា ៥០នាក់ បានចូលដណ្តើមកាន់កាប់អគាររដ្ឋាភិបាល និងសភាតំបន់ Crimée (ខាងកើតប្រទេសអ៊ុយក្រែន ក្បែរព្រំដែនរុស្ស៊ី) តាំងពីព្រឹកព្រលឹមថ្ងៃព្រហស្បតិ៍ នៅពេលដែលមិនទាន់មានមនុស្សមកធ្វើការ។ ក្រោយមកពីគេបានរារាំងបុគ្គលិកមិនឲ្យចូលទៅធ្វើការ ហើយគេឃើញមានទង់ជាតិរុស្ស៊ីត្រូវបានបង្ហូតឡើង នៅលើអគាររដ្ឋាភិបាលនេះ។
រហូតមកទល់នឹងពេលនេះ គេមិនទាន់អាចដឹងច្បាស់នៅឡើយទេថា តើក្រុមជននេះ គឺជាក្រុមខាងណា ហើយទាមទារចង់បានអ្វី។ យោងតាមមន្រ្តីរដ្ឋាភិបាលអ៊ុយក្រែន ក្រុមប្រដាប់អាវុធនេះមានបំពាក់ទៅដោយអាវុធទំនើបៗ និងស្លៀកពាក់ក្នុងឯកសណ្ឋានតាមរបៀបជាក្រុមទាហានប្រយុទ្ធ ប៉ុន្តែ មិនមានសញ្ញាសម្គាល់ថាជាក្រុមណាទេ។
ការចូលកាន់កាប់អគាររដ្ឋាភិបាល នៅ Crimée នេះបានកើតមានឡើង មួយថ្ងៃក្រោយ ពីមានការប្រឈមមុខដាក់គ្នាយ៉ាងខ្លាំង កាលពីថ្ងៃពុធ រវាងម្ខាងក្រុមអ្នកគាំទ្ររុស្ស៊ី និងម្ខាងទៀតគាំទ្រសហភាពអឺរ៉ុប។ ក្រុមអ្នកគាំទ្ររុស្ស៊ី បានទាមទារឲ្យសភាតំបន់ Crimée ដែលបច្ចុប្បន្នជាតំបន់ស្វយ័ត ធ្វើការបោះឆ្នោតអនុម័តផ្តាច់ខ្លួនចេញពីអ៊ុយក្រែន ហើយទៅភ្ជាប់ខ្លួនជាមួយនឹងរុស្ស៊ីវិញ។
គួរបញ្ជាក់ថា តំបន់ Crimée ធ្លាប់ជាទឹកដីរបស់រុស្ស៊ី ប៉ុន្តែ ត្រូវបានកាត់មកដាក់ជាទឹកដីអ៊ុយក្រែន កាលពីឆ្នាំ១៩៥៤ នៅពេលដែលរុស្ស៊ី និងអ៊ុយក្រែន ស្ថិតនៅក្នុងប្រទេសតែមួយ គឺសហភាពសូវៀត។ រហូតមកទល់នឹងសព្វថ្ងៃនេះ ប្រជាជនដែលរស់នៅក្នុងតំបន់ Crimée ភាគច្រើនជាអ្នកមានដើមកំណើតរុស្ស៊ី និយាយភាសារុស្ស៊ី ហើយនៅតែចិញ្ចឹមចិត្តថា តំបន់នេះ គឺជាទឹកដីរុស្ស៊ី។
មូលដ្ឋានទ័ពជើងទឹកដ៏ធំមួយក៏ត្រូវបានរុស្ស៊ីដាក់តាំង នៅក្នុងតំបន់ Crimée នេះដែរ ទៅតាមកិច្ចព្រមព្រៀងជួល ដែលលោកអតីតប្រធានាធិបតីអ៊ុយក្រែន យ៉ានូកូវិច ទើបនឹងបានពន្យារពេលរហូតដល់ឆ្នាំ២០៤២។
ក្រោយពីមានហេតុការណ៍ជនប្រដាប់អាវុធចូលទៅកាន់កាប់ និងបង្ហូតទង់ជាតិរុស្ស៊ី នៅលើអគាររដ្ឋាភិបាល នៅតំបន់ Crimée នេះ ក្រសួងការបរទេសអ៊ុយក្រែនបានកោះហៅភារៈធារីនៃស្ថានទូតរុស្ស៊ីប្រចាំទីក្រុង Kiev មកធ្វើការព្រមានកុំឲ្យរុស្ស៊ីរំលោភលើបូរណភាពទឹកដីរបស់អ៊ុយក្រែន។
ប្រធានាធិបតីស្តីទីរបស់អ៊ុយក្រែនវិញបានព្រមានទៅរុស្ស៊ីថា នៅក្នុងតំបន់ Crimée កងទ័ពរុស្ស៊ីអាចធ្វើសកម្មភាពតែនៅក្នុងមូលដ្ឋានទ័ពជើងទឹករបស់ខ្លួនតែប៉ុណ្ណោះ ដោយគោរពទៅតាមកិច្ចព្រមព្រៀង ដែលបានចុះជាមួយគ្នារួចហើយ។ រាល់សកម្មភាពរបស់កងទ័ពរុស្ស៊ី ដែលធ្វើឡើងនៅក្រៅមូលដ្ឋានទ័ពនេះ នឹងត្រូវចាត់ទុកថាជាអំពើឈ្លានពានមកលើអ៊ុយក្រែន។
គួររំឭកថា ចាប់តាំងពីសភាអ៊ុយក្រែនបោះឆ្នោតទម្លាក់លោកយ៉ានូកូវិចពីតំណែងជាប្រធានាធិបតី គេសង្កេតឃើញថា រុស្ស៊ីបានបង្កើនសកម្មភាពចម្លែកខុសពីធម្មតា ដោយបានដាក់ពង្រាយរថពាសដែក នៅពីមុខមូលដ្ឋានទ័ពជើងទឹក នៅ Crimée។
លើសពីនេះទៅទៀត កាលពីថ្ងៃពុធម្សិលមិញនេះ លោកប្រធានាធិបតីរុស្ស៊ី វ៉្លាឌីមៀរ ពូទីន បានចេញបញ្ជាដល់កងទ័ពរុស្ស៊ីទាំងប្រមាណជា ១៥ម៉ឺននាក់ ដែលឈរជើងនៅប៉ែកខាងលិចប្រទេសរុស្ស៊ី ក្បែរព្រំដែនអ៊ុយក្រែន ឲ្យស្ថិតក្នុងភាពប្រុងជើងការខ្ពស់ ក្នុងការហាត់សម ដើម្បីពិនិត្យមើលអំពីភាពប្រុងប្រៀបខ្លួនប្រយុទ្ធ របស់កងទ័ព ចាប់តាំងពីទ័ពថ្មើរជើង កងរថក្រោះ នាវាចម្បាំង និងយន្តហោះចម្បាំង។
ការបញ្ចេញសាច់ដុំយោធារបស់រុស្ស៊ី បូករួមជាមួយនឹងសកម្មភាពជនប្រដាប់អាវុធចូល កាន់កាប់ និងដោតទង់ជាតិរុស្ស៊ី នៅលើអគាររដ្ឋាភិបាល នៅ Crimée នៅព្រឹកថ្ងៃព្រហស្បតិ៍នេះទៀត ទើបធ្វើឲ្យរដ្ឋាភិបាលអ៊ុយក្រែនមានការព្រួយបារម្ភកាន់តែខ្លាំង ខ្លាចក្រែងរុស្ស៊ីយកលេសអ្វីមួយ ដើម្បីចូលធ្វើអន្តរាគមន៍យោធានៅអ៊ុយក្រែន។
លោកចន ឃែរី រដ្ឋមន្រ្តីក្រសួងការបរទេសអាមេរិក ក៏បានធ្វើការព្រមានដល់រុស្ស៊ីដែរថា អំពការធ្វើអន្តរាគមន៍យោធារុស្ស៊ីនៅអ៊ុយក្រែននេះ។ ប្រមុខការទូតអាមេរិកបានរំឭករុស្ស៊ីឡើងវិញថា កន្លងមក រុស្ស៊ីតែងតែប្រឆាំងនឹងអន្តរាគមន៍យោធា តាំងពីនៅលីប៊ី រហូតដល់ស៊ីរី ដូច្នេះ រុស្ស៊ីក៏ត្រូវតែប្រកាន់ខ្ជាប់នូវគោលការណ៍នេះដែរ ចំពោះករណីអ៊ុយក្រែន។
អគ្គលេខាធិការអង្គការអូតង់វិញក៏បានព្រមានរុស្ស៊ីដែរថា កុំឲ្យធ្វើសកម្មភាពណាមួយ ដែលនាំឲ្យស្ថានភាពនៅតំបន់ Crimée រាលដាលកាន់តែធ្ងន់ធ្ងរ ហើយអាចបង្កឲ្យមានការយល់ច្រឡំគ្នាណាមួយ។ ប្រទេសនៅក្នុងតំបន់អឺរ៉ុបផ្សេងទៀត រួមមាន អង់គ្លេស ប៉ូឡូញ និងលីទុយអានី ជាដើម ក៏បានធ្វើការព្រមានស្រដៀងគ្នានេះដែរ។
នៅថ្ងៃព្រហស្បតិ៍នេះដែរ លោកយ៉ានូកូវិច បានចេញសេចក្តីថ្លែងការណ៍មួយ ចុះផ្សាយក្នុងបណ្តាញព័ត៌មានរុស្ស៊ីថា លោកនៅតែជាប្រធានាធិបតីអ៊ុយក្រែនដដែល ដោយចាត់ទុកសេចក្តីសម្រេចរបស់សភា ដែលដកតំណែងលោក កាលពីថ្ងៃសៅរ៍ ២២កុម្ភៈ គឺជាទង្វើខុសច្បាប់។ លោកយ៉ានូកូវិច ក៏បានស្នើសុំផងដែរឲ្យរុស្ស៊ីធានាសុវត្ថិភាពផ្ទាល់ខ្លួនរបស់លោក។ សំណើដែលត្រូវបានរដ្ឋាភិបាលរុស្ស៊ីទទួលយក។
មន្រ្តីរដ្ឋាភិបាលរុស្ស៊ី ដែលមិនបញ្ចេញឈ្មោះ ហើយដែលត្រូវបានដកស្រង់សម្តីដោយបណ្តាញផ្សព្វផ្សាយព័ត៌មានរុស្ស៊ី ក៏បានបង្ហើបឲ្យដឹងផងដែរថា នៅពេលនេះ លោកយ៉ានូកូវិច បានរត់ចេញពីអ៊ុយក្រែន ហើយកំពុងស្ថិតក្នុងប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ