វិបត្តិអ៊ុយក្រែន ៖ រុស្ស៊ីព្រមចរចា តែការចាប់ផ្តើមស្មុគស្មាញ
ចុះផ្សាយនៅថ្ងៃ៖
ស្តាប់ - ០៦:៤៤
ភាពតានតឹងបានឡើងដល់កំរិតកំពូលនៅចុងសប្តាហ៍កន្លងមកនេះ វិបត្តិអ៊ុយក្រែនបានក្លាយជាវិបត្តិអន្តរជាតិ។ រដ្ឋាភិបាលក្រុងគៀវ បានប្រកាសថាកំពុងស្ថិតនៅលើមាត់ជ្រោះនែគ្រោះមហន្តរាយ ព្រោះតែការប្រកាសសង្គ្រាមរបស់រុស្ស៊ី។ ក្រុមបស្ចឹមលោក បានបង្កើនគំនាប គំរាមដាក់ទណ្ឌកម្មសេដ្ឋកិច្ចផង គំរាមចង់បណ្តេញរុស្ស៊ីចេញក្រុមប្រទេសមហាអំណាចមានសេដ្ឋកិច្ចលូតលាស់ខ្លាំងផង ព្រមទាំងអំពាវនាវឱ្យមានការចរចាទៀត។ នៅទីបំផុត លោកពូទីន ប្រធានាធិបតីរុស្ស៊ី បានសុខចិត្តទទួលយកដំណោះស្រាយតាមផ្លូវនយោបាយ។ ហើយអ្នកដែលអាចល្បួងរុស្ស៊ីឱ្យចូលចរចាបានគឺលោកស្រី អង់ហ្គីឡា មែរគែល ប្រមុខរដ្ឋាភិបាលអាល្លឺម៉ង់។
សកម្មភាពការទូត មានលក្ខណៈស្វាហាប់ខ្លាំងណាស់នារយៈពេលប៉ុន្មានចុងក្រោយនេះ និងជាពិសេស ក្រោយពេលដែលសភារុស្ស៊ីបានព្រមព្រៀងឱ្យកងទ័ពរុស្ស៊ីចេញធ្វើអន្តរាគមន៍នៅ គ្រីមេ នៅអ៊ុយក្រែន ដើម្បីការពារសុវត្ថិភាពប្រជាជនរុស្ស៊ី និងផលប្រយោជន៍រុស្ស៊ី។ កាលពីថ្ងៃសៅរ៍ លោកប្រធានាធិបតីអាមេរិក បារ៉ាក់អូបាម៉ា បានទូរស័ព្ទផ្ទាល់ទៅលោកពូទីន និយាយរយៈពេលមួយម៉ោងកន្លះ ប៉ុន្តែលោកពូទីនមិនបានធ្វើដឹងធ្វើឮទេ។
ប្រធានាធិបតីបារាំង ក៏បានទូរស័ព្ទជួបសមភាគីរុស្ស៊ីដែរ។ ប្រធានាធិបតីនៃក្រុមប្រទេសមហាអំណាចខាងលិច ទូរស័ព្ទទាក់ទងគ្នាយ៉ាងច្រវ៉ាត់ច្រវែងបំផុត ដើម្បីរិះរកមធ្យោបាយបញ្ចុះបញ្ចូលឱ្យរុស្ស៊ីបោះបង់គំនិតប្រើកម្លាំងយោធានៅអ៊ុយក្រែន។ ព្រោះបើសង្គ្រាមរុស្ស៊ី-អ៊ុយក្រែន ពិតជាផ្ទុះមែន នោះមានន័យថាសន្តិភាព និងសន្តិសុខអឺរ៉ុបក៏ត្រូវទទួលរងការគំរាមកំហែងដែរ។
ពូទីនព្រមចូលចរចា
តែនៅទីបំផុត គឺលោកស្រីប្រមុខរដ្ឋាភិបាលអាល្លឺម៉ង់ ជាអ្នកមានស្នាដៃជាងគេ (នៅពេលនេះម៉ោងនេះ)។ តាំងពីស្ថានភាពនៅអ៊ុយក្រែន បានក្លាយជាភាពតានតឹងរវាងរុស្ស៊ីនិងអ៊ុយក្រែនមក អាល្លឺម៉ង់មិនបានធ្វើអ្វីដែលមានលក្ខណៈក្តុងក្តាំងទេ តែគ្មានថ្ងៃណាមួយដែលថាលោកស្រី មែរកែល មិនទូរស័ព្ទទៅជួបលោកពូទីនឡើយ។ ទាល់តែដល់ល្ងាចថ្ងៃអាទិត្យម្សិលមិញ ទើបលោកស្រីបានទទួលចម្លើយវិជ្ជមានពីលោកពូទីន ថាព្រម បង្កើតបេសកកម្មអង្កេតមួយ និងព្រមបង្កើតក្រុមអន្តរការី ដើម្បីធ្វើការចរចានយោបាយ ស្តីពីវិបត្តិអ៊ុយក្រែន។ ក្រុមអ្នកអន្តរការីអន្តរជាតិនេះ ទំនងជានឹងត្រូវស្ថិតនៅក្រោមការត្រួតពិនិត្យដឹកនាំដោយអង្គការសន្តិសុខនិងសហប្រតិបត្តិការអឺរ៉ុប ដែលហៅកាត់ថា OSCE។ អង្គការដែលមានប្រទេសស្វីសជាប្រធានផ្លាស់វេនតាំងពីដើមឆ្នាំ២០១៤មក។
ឆ្លើយនឹងសំណួរថា តើលោកស្រីមែរគែលបាននិយាយអ្វីខ្លះ ? តាមការពិតលោកស្រី ក៏ប្រើភាសាបន្ទោសពូទីនដូចគ្នា “អន្តរាគមន៍យោធានៅគ្រីមេ ជាទង្វើមិនអាចទទួលយកបាន” “អ្នករំលោភច្បាប់អន្តរជាតិ” ... ប៉ុន្តែក្រុងបែរឡាំងបានយកអនុសារណៈក្រុងប៊ុលដាប៉េស មកដាក់មុខ។ អនុសារណៈឆ្នាំ១៩៩៤ ដែលរុស្ស៊ីក៏មានឈ្មោះជាហត្ថលេខីម្នាក់ដែរ បានបង្កើតឡើងនៅពេលអ៊ុយក្រែនបានភ្ជាប់ខ្លួនជាចូលជាប្រទេសក្នុងសន្ធិសញ្ញាមិនរីកសាយភាយនុយក្លេអ៊ែរ។ នៅក្នុងកិច្ចសន្យានោះ ក្រុងគៀវព្រមបោះបង់មហិច្ឆតាផលិតអាវុធបរមាណូ ហើយជាថ្នូរមកវិញ រុស្ស៊ី សហរដ្ឋអាមេរិក និងអង់គ្លេស សន្យាគោរពឯករាជភាព បូរណភាពដែនដី និងព្រំដែនអ៊ុយក្រែន។ ដូច្នេះហើយទើបអាល្លឺម៉ង់អាចបន្ទោសរុស្ស៊ីបាននៅ ពេលនេះ ថាកំពុងតែធ្វើខុសអនុសារណៈ។
រុស្ស៊ីហាក់ស្តាប់យល់ភាសារបស់ប្រមុខដឹកនាំអាល្លឺម៉ង់ ដោយមិនសើរើបញ្ហាបូរណភាពដែនដីអ៊ុយក្រែន និងបានបញ្ជាក់ថាមិនចង់ធ្វើសង្គ្រាមជាមួយប្រទេសជាប់របងអ៊ុយក្រែនទេ។ ប៉ុន្តែនៅផ្ទាល់កន្លែង គ្រីមេ តាំងពីថ្ងៃសៅរ៍ត្រូវស្ថិតក្រោមរដ្ឋបាលមាននិន្នាការរុស្ស៊ី និងក្រោមការឈ្លានពានរបស់យោធារុស្ស៊ី ជាមួយនឹងការប្រកាសធ្វើប្រជាមតិស្តីអំពីលក្ខន្តិកៈតំបន់គ្រីមេ ពោលគឺដូចអ្វីដែលម៉ូស្គូចង់បាន។
ការទូតនៅតែសកម្ម
គ្រប់គ្នាសុទ្ធតែដឹងនិងទទួលស្គាល់ថាវិបត្តិអ៊ុយក្រែន-រុស្ស៊ី មិនអាចដោះស្រាយតាមផ្លូវយោធាបានទេ គឺមានតែដំណោះស្រាយនយោបាយតែប៉ុណ្ណោះ ! ប៉ុន្តែនេះគ្រាន់តែចំណុចវិជ្ជមានតូចមួយទេ គេត្រូវតែប្រុងប្រយ័ត្នសិន ជាការព្រមព្រៀងចូលចរចាជាគោលការណ៍ ហើយសំខាន់ជាងនេះទៅទៀត គឺត្រូវធ្វើយ៉ាងណាឱ្យរុស្ស៊ីព្រមបញ្ជូលទាហានទៅក្នុងបន្ទាយវិញសិន។ លក្ខខណ្ឌ និងដំណើរដើមទងនៃការចរចា មិនទាន់ត្រូវបានកំណត់នៅឡើយទេ។ ម្យ៉ាងទៀតអឺរ៉ុប ដែលតាំងខ្លួនជាអន្តរការី មានបញ្ហាដូចជារាល់លើក គឺនិយាយមិនសូវត្រូវគ្នា។
នៅពេលនេះសកម្មភាពការទូតនៅរញឹករញៃដដែល។ សម្រាប់សហភាពអឺរ៉ុប អឺរ៉ុបកំពុងតែប្រើវិធីខោកផងអង្អែលផង។ គេបានទទួលព័ត៌មានមកថាសកម្មភាពរៀបចំជំនួបកំពូលនៃក្រុមប្រទេសមានឧស្សាហកម្មលូតលាស់ខ្លាំងលើលកទាំង៨ ឬហ្សេ ៨ ដែលនឹងត្រូវប្រព្រឹត្តទៅក្រុងសុតឈី ប្រទេសរុស្ស៊ី នាខែមិថុនាខាងមុខ បានផ្អាក។ ហើយជាសេចក្តីសម្រេចដែលមានការព្រមព្រៀងរួមគ្នាពីសំណាក់សហរដ្ឋអាមេរិក កាណាដា បារាំងអាល្លឺម៉ង់ អង់គ្លេស និងអ៊ីតាលី ព្រមទាំងសហភាពអឺរ៉ុប និងក្រុមប្រឹក្សាអឺរ៉ុប។
គំនាបលើរុស្ស៊ីមិនមែនមានត្រឹមតែពីសំណាក់សហភាពអឺរ៉ុបប៉ុណ្ណោះទេ ម្សិលមិញ ក្នុងនាមប្រទេសមហាអំណាចឧស្សាហកម្មទាំង៧ប្រទេសនិងសហភាពអឺរ៉ុប សេតវិមាន (សហរដ្ឋអាមេរិក) បានចេញសេចក្តីថ្លែងការណ៍រួមថា “ក្នុងស្ថានភាពជាក់ស្តែងពេលនេះ រុស្ស៊ីអាចនឹងត្រូវព្យួរ វត្តមានរុស្ស៊ីក្នុងក្រុមហ្សេ ៨ គ្មានន័យ”។ រដ្ឋមន្ត្រីក្រសួងការបរទេសអាមេរិក ចន ឃែរី បានថែមទាំងគំរាមថា ការបញ្ចេញរុស្ស៊ីចេញពីក្រុមប្រទេសមហាឧស្សាហកម្មហ្សេ ៨ មកជាហ្សេ៧វិញ គ្រាន់តែជាទណ្ឌកម្ម ដំណាក់កាលទីមួយប៉ុណ្ណោះ។ ចំណែកអង់គ្លេសវិញ ថ្ងៃនេះលោករដ្ឋមន្ត្រីការបរទេសកំពុងស្ថិតនៅក្រុងគៀវ។ រដ្ឋមន្ត្រីការបរទេសសហភាពអឺរ៉ុប នឹងត្រូវជួបគ្នារសៀលនេះ នៅទីក្រុងព្រុចសែល។ ថ្ងៃស្អែក លោកចនឃេរី នឹងអញ្ជើញទៅក្រុងគៀវ។ លោកអគ្គលេខាធិការអង្គការសហប្រជាជាតិ បានគីមូន ប្រកាសថានឹងទៅជួបប្រមុខការទូតរុស្ស៊ី។
ស្រមោលសង្គ្រាមត្រជាក់
តាំងពីវិបត្តិអ៊ុយក្រែនផ្ទុះឡើង ប៉ុន្មានខែដំបូង រុស្ស៊ី មិនសូវមាត់ក លូកលាន់អ្វីទេ ដោយអ្នកឯកទេស និងវិភាគនយោបាយយល់ថា រុស្ស៊ីរវល់រៀបចំការប្រកួតកីឡាអូឡាំពិករដូវត្រជាក់។ កីឡាបានបិទបញ្ចប់ប្រកបដោយជោគជ័យ រុស្ស៊ីងាកមកចាត់ការអ៊ុយក្រែន បង្កបង្កើតឱ្យភាពតានតឹងភ្លាម។ ព្រោះរុស្ស៊ីរក្សារូបភាពអតីតកាលដែលខ្លួនជាចក្រភព ជាអតីតសហភាពសូវៀតដ៏ធំធេង។
តាំងពីរបបកុម្មុយនិស្តសូវៀតដូលរលំទៅ ជម្លោះនិងសង្គ្រាមតែងកើតឡើងជាញឹកញប់ រវាងរុស្ស៊ីជាមួយនឹងបណ្តាប្រទេសជាអតីតរដ្ឋរណបសហភាពសូវៀត មានជាអាទិ៍ វិបត្តិនៅអតីតយូហ្កោស្លាវី ពីឆ្នាំ ១៩៩១-២០០១, សង្គ្រាមនៅអាប់ខាហ្ស៊ី ១៩៩២-៩៣, នៅឆេតឆេនី ១៩៩៤-៩៦ និង១៩៩៩-២០០០ ហើយចុងក្រោយនឹងថ្មីៗបំផុត គឺសង្គ្រាមនៅហ្ស័កហ្ស៊ី កាលពីឆ្នាំ២០០៨ ដែលកាលណោះរុស្ស៊ីបានប្រើលេសតែមួយ គឺការពារបណ្តាជនរុស្ស៊ីនៅអូសឺទីតខាងត្បូង។
លេសដដែលនេះត្រូវបានយកមកប្រើទៀតនៅអ៊ុយក្រែន តែជាក់ស្តែងទៅនោះគ្មានបណ្តាជនរុស្ស៊ីណាម្នាក់នៅគ្រីមេ ត្រូវរកការគំរាមកំហែងផង។ ពោលគឺរុស្ស៊ីចង់បង្ហាញ អំណាចរបស់ខ្លួនលើអតីតក្រុមរដ្ឋរណបអតីតសហភាពសូវៀត ដូចក្នុងសម័យសង្គ្រាមត្រជាក់ ដែលជាសង្គ្រាមមនោគមវិជ្ជា បែកចែករវាងលោកខាងលិច សេរី និងប្លុកខាងកើតកុម្មុយនិស្ត។ ដូច្នេះ វាមិនខុសទេដែលពេលនេះគ្រប់គ្នាសំឡឹងឃើញការប្រឈមមុខដាក់គ្នារវាងក្រុមមហាអំណាចលិច កើតនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ