វិបត្តិអ៊ុយក្រែន ៖ អូតង់ជួបប្រជុំបន្ទាន់ ស្វែងរកវិធីល្បួងរុស្ស៊ី
បន្ទាប់ពី អង្គការសហប្រជាជាតិ សហរដ្ឋអាមេរិក ថ្ងៃនេះដល់វេនអូតង់ម្តង ដែលបើកប្រជុំបន្ទាប់ ស្តីពីស្ថានការណ៍នៅអ៊ុយក្រែន។ បក្សសម្ព័ន្ធអាត្លង់ទិក ឬអូតង់ បានចាត់ទុកសកម្មភាពរុស្ស៊ីធ្វើចំពោះអ៊ុយក្រែន ថាជាការគំរាមកំហែងសន្តិភាព និងសន្តិសុខអឺរ៉ុប និងតម្រូវឱ្យម៉ូស្គូបញ្ឈប់ជាបន្ទាន់រាល់សកម្មភាពនិងការគំរាមកំហែងតាមផ្លូវយោធាលើប្រទេសជិតខាងអ៊ុយក្រែន។ អឺរ៉ុបកោះហៅឯកអគ្គរដ្ឋទូតចូលជួប ! បស្ចឹមលោកប្រកាសផ្អាកមិនទៅចូលរួមប្រជុំហ្សេ ៨ ជាបន្តបន្ទាប់។ នៅផ្ទាល់កន្លែង យោធារុស្ស៊ីបានបិទខ្ទប់ មូលដ្ឋានទ័ពអ៊ុយក្រែនមួយកង។
ចុះផ្សាយនៅថ្ងៃ៖
ស្តាប់ - ០២:១៣
នៅថ្ងៃអាទិត្យនេះ ក្រោមការផ្តួចផ្តើមគំនិតរបស់ប៉ូឡូញ អង្គការអូតង់ បានបើកសម័យប្រជុំបន្ទាន់មួយ ដើម្បីឆ្លើយតបទៅនឹងការគំរាមកំហែងធ្វើអន្តរាគមន៍យោធារបស់រុស្ស៊ីលើប្រទេសអ៊ុយក្រែន។ ឯកអគ្គរដ្ឋទូតនៃប្រទេសជាសមាជិកអង្គការទាំង២៨ប្រទេស បានមកជួបជុំគ្នានៅទីស្នាក់ការ នាទីក្រុងព្រុចសែលប្រទេសបែលហ្សិក នៅវេលាម៉ោង១២ម៉ោងសកល មុននឹងបើកជំនួបមួយទៀតជាមួយសមភាគីអ៊ុយក្រែនពីរម៉ោងបន្ទាប់។
តាមច្បាប់ចែងក្នុងសន្ធិសញ្ញាអង្គការអូតង់ ជំនួបប្រជុំបន្ទាន់ ការពិភាក្សាគ្នា ត្រូវរៀបចំឡើងភ្លាម ប្រសិនបើមានប្រទេសជាសមាជិកណាមួយស្នើឡើង ឬប្រទេសជាសមាជិករងការគំរាមកំហែងយោធា។ ហើយបើតាមមាត្រាទី ៥ ដើម្បីការពារប្រយោជន៍រួម អូតង់អាចនឹងចេញធ្វើជាអ្នកជំនួយ រាប់ទាំងមធ្យោបាយយោធាផង ប្រសិនបើរដ្ឋជាសមាជិកណាមួយរងការវាយប្រហារ។ ប៉ុន្តែក្នុងករណីអ៊ុយក្រែននេះ ក្រុងគៀវមិនមែនជាសមាជិកអូតង់ទេ។ កាលពីឆ្នាំ២០០៨ អូតង់បានបើកទ្វារចំហចង់ទទួលអ៊ុយក្រែន ក្រោមក្រសែភ្នែកក្តៅក្រហាយរបស់រុស្ស៊ី តែនៅឆ្នាំ២០១០មក រដ្ឋាភិបាលអ៊ុយក្រែនរបស់លោកប្រធានាធិបតីវិចទ័រ យ៉ានូកូវិច បានបោះបង់ចោលមហិច្ឆតាចង់ចូលជាសមាជិកអូតង់។
ដូច្នេះ គេមិនត្រូវរង់ចាំអ្វីពីជំនួបប្រជុំនេះ ក្រៅអំពីបង្ហាញក្តីព្រួយបារម្ភនិងអំពាវនាវឱ្យរុស្ស៊ីបោះបង់គំនិតប្រើកម្លាំងយោធា ឬក៏បញ្ជាក់អំពីផលវិបាកនៃកិច្ចសហប្រតិបត្តិការរវាងរុស្ស៊ីនិងអូតង់ ជុំវិញសំណុំរឿងមួយចំនួនដូចជាការប្រយុទ្ធប្រឆាំងនឹងអំពើភេរវនិយម។
ជំនួបនេះប្រព្រឹត្តទៅក្នុងខណៈដែលសកម្មភាពការទូតមានលក្ខណៈស្វាហាប់បំផុត ដើម្បីធ្វើយ៉ាងណាបញ្ចុះបញ្ចូលរុស្ស៊ីឱ្យបោះបង់គំនិតចង់ធ្វើអន្តរាគមន៍យោធានៅអ៊ុយក្រែន និងក្នុងខណៈដែលកងទ័ពរុស្ស៊ីបានផ្តើមជាស្រេចធ្វើសកម្មភាពបិទខ្ទប់កងកម្លាំងឆ្នាំសមុទ្ទអ៊ុយក្រែន នៅគ្រីមេ កាលពីរសៀលថ្ងៃអាទិត្យ។ ឯការថ្កោលទោសនិងដាក់គំនាបលើរុស្ស៊ីមានកាន់តែច្រើនឡើងៗ។ បារាំង អង់គ្លេសបានបញ្ជាក់ពីចេតនាព្យួរវត្តមានក្នុងជំនួបហ្សេ ៨ ដូចសហរដ្ឋអាមេរិកនិងកាណាដាដែរ។ នៅថ្ងៃចន្ទនេះ សហភាពអឺរ៉ុបក៏ត្រូវបើកជំនួបបន្ទាន់របស់ខ្លួនដែរ។ អឺរ៉ុបទំនងជាកំពុងរិះរកវិធីភ្ជាប់ផ្លូវចរចា ឱ្យរុស្ស៊ីនិងអ៊ុយក្រែន តាមរយៈអង្គការសហប្រជាជាតិ ឬ អូសេដេអឺ អង្គការដើម្បីសន្តិសុខ និងកិច្ចសហប្រតិបត្តិការអឺរ៉ុប ជាអន្តរការី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ