លីទុយអានីតាំងពីកណ្តាលអធ្រាត្រយប់មិញមកចូលក្នុងតំបន់ ចាយលុយអឺរ៉ូ
ដូច្នេះចាប់ពីថ្ងៃ១មករាឆ្នាំ២០១៥នេះទៅ លីទុយអានីក្លាយជាសមាជិកទី១៩នៃតំបន់ចាយលុយអឺរ៉ូជាជំនួសរូបិយវត្ថុជាតិរបស់ខ្លួនគឺប្រាក់ Litas។ ព្រឹត្តិការណ៍នេះ ឆ្លុះឲ្យឃើញ ពីក្តីសង្ឃឹមរបស់ប្រទេសនៅជាប់សមុទ្របាល់ទីកនេះ ភ្ជាប់ខ្លួនឲ្យកាន់តែមាំ ទៅនឹងអឺរ៉ុបខាងលិចនៅពីមុខមហិច្ឆិតាជាយថាហេតុរបស់ក្រុងម៉ូស្គូនិងទោះបី ការចាយលុយអឺរ៉ូ អាចបង្កឲ្យទំនិញឡើងថ្លៃក្នុងប្រទេសក្តី។
ចុះផ្សាយនៅថ្ងៃ៖
ស្តាប់ - ០២:២៧
មុនលីតុយអានីមានប្រទេសពីរផ្សេងនៃតំបន់បាល់ទីក បានចូលក្នុងតំបន់ចាយលុយអឺរ៉ូ ជាជំនួសរូបិយវត្ថូជាតិខ្លួនទៅហើយពោលគឺអេស្តូនី បានចូល៤ឆ្នាំមុននាថ្ងៃ១មករាឆ្នាំ២០១១ ហើយ៣ឆ្នាំក្រោយមកនាថ្ងៃ១មករាឆ្នាំ២០១៤ គឺឡេតូនី ដែលបានត្រូវទទួលឲ្យចូល។
ឧទ្ទិសដល់ពិធីដ៏ឧឡារឹកនេះ ប្រធានាធិបតីលីទុយអានី លោកស្រី Dalia Grybauskaite ថ្លែងថាសម្រាប់លីទុយអានី ការភ្ជាប់ខ្លួនទៅនឹងតំបន់ប្រាក់អឺរ៉ូ ជានិមិត្តរូបនៃសមាហរ័ណកម្ម សេដ្ឋកិច្ចនិងនយោបាយកាន់តែធំធេងឡើងជាមួយបស្ចិមលោក។ ព្រឹត្តិការណ៍នេះ ជាការបង្ហើយរួចជាស្រេចបាច់ដំណើរការសមាហរ័ណកម្មយើងក្នុងសហភាពអឺរ៉ុបនិងជាការធានា សន្តិសុខដល់សេដ្ឋកិច្ចនិងនយោបាយយើង។
ជាការកត់សម្គាល់ លីទុយអានីដែលត្រូវបានទទួលឲ្យចូលជាសមាជិកនៃតំបន់ប្រាក់អឺរ៉ូ ពីព្រោះប្រទេសនេះចេះឆ្លើយស្របនឹងលក្ខណៈវិនិច្ឆ័យទាមទារដោយសន្ធិសញ្ញចុះនៅក្រុង Maastricht ប្រទេសហូឡង់កាលពីឆ្នាំ១៩៩២ ដែលស្តី អំពីការកសាង សហភាពរូបិយវត្ថុ រួមតែមួយរបស់អឺរ៉ុប ពោលគឺប្រទេសជាបេក្ខជនមិនត្រូវមានបំណុលរដ្ឋ លើសពី ៦០% នៃផលិតផលសរុបក្នុងប្រទេសហៅថា PIB និងមិនត្រូវមានអតិផរណាលើសពី ៣% នៃ PIB ឡើយ។
ថ្ងៃទី១មករានេះឯងដែលប្រទេសតំបន់បាល់ទីកមួយទៀតគឺឡេតូនី ឡើងធ្វើជាប្រធានផ្លាស់វេនរបស់សហភាពអឺរ៉ុបសម្រាប់ឆមាសទី១ឆ្នាំ២០១៥។ គួរនិយាយថា ឡេតូនី អេស្តូនី លីទុយអានី ជាបីប្រទេសនៃតំបន់បាល់ទីក ដែលធ្លាប់បានស្ថិតនៅក្រោមការកាន់កាប់នៃរបបសូវៀតអស់កន្លះសតវត្សរ៍ពីឆ្នាំ១៩៤០ដល់១៩៩០ លុះក្នុងឆ្នាំ ២០០៤ ត្រូវបានទទួលឲ្យចូលជាសមាជិកបក្សសម្ព័ន្ធអូតង់ផងសហភាពអឺរ៉ុបផង។
ឥឡូវ បីប្រទេសនេះ នាំគ្នាព្រួយបារម្ភនឹងនយោបាយវិមានក្រេមឡាំង ចំពោះរដ្ឋអ៊ុយក្រែន និងភាពសកម្មយោធានៃកងកម្លាំងប្រដាប់អាវុធរុស្ស៊ីនៅក្បែរព្រំប្រទល់ខ្លួន។
ស្របនឹងការស្ទង់មតិពីក្នុងចំណោមបណ្តាជន ៣លាន៣សែននាក់នៅលីទុយអានី មាន ដល់ទៅ ៥៣% ដែលសាទរចំពោះការដែលប្រទេសខ្លួន ត្រូវបានទទួលឲ្យចូល ក្នុងតំបន់ ចាយលុយអឺរ៉ូជាជំនួសរូបិយវត្ថុជាតិខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ