ការធ្លាក់ចុះតម្លៃប្រេងប៉ះពាល់ដល់សេដ្ឋកិច្ចកាណាដា
ការធ្លាក់ចុះតម្លៃប្រេងនឹងប៉ះពាល់ដោយផ្ទាល់ដល់កំណើនសេដ្ឋកិច្ចរបស់ប្រទេសកាណាដានៅឆ្នាំ២០១៥ នេះបើតាមការសន្និដ្ឋានរួមរបស់ក្រុមអ្នកវិភាគបើទោះជាពួកគេមិនចុះសម្រុងគ្នាអំពីទំហំនៃផលវិបាកដែលនឹងអាចមានចំពោះសេដ្ឋកិច្ចកាណាដាក៏ដោយ។
ចុះផ្សាយនៅថ្ងៃ៖
ស្តាប់ - ០២:២៩
សេដ្ឋកិច្ចរបស់ប្រទេសកាណាដា ក្នុងប៉ុន្មានឆ្នាំចុងក្រោយនេះ ពឹងផ្អែកលើឧស្សាហកម្មចំរាញ់ប្រេងដែល គេឲ្យឈ្មោះថាមាសខ្មៅ។ ដោយសារតែវិស័យប្រេងមានសារៈសំខាន់ខ្លាំងបែបនេះហើយ ទើបការធ្លាក់ចុះ នៃតម្លៃប្រេងនឹងមានផលប៉ះពាល់អវិជ្ជមាន លើកំណើនសេដ្ឋកិច្ចរបស់ប្រទេសកាណាដា នេះបើតាម ការព្យាករណ៍របស់ធនាគារអភិវឌ្ឍន៍ Nomura។
ការធ្វើអាជីវកម្ម និងឧស្សាហកម្មរ៉ែប្រេងកាត មានតួរលេខស្មើនឹង៨%នៃផលិតផលក្នុងស្រុកសរុប (PIB) របស់កាណាដា។ នៅឆ្នាំ២០១៤ កាណាដាផលិតបានប្រមាណជាជាង ៣,៤លានធុង (Barils) ក្នុងមួយថ្ងៃ ជាបរិមាណដែលកើនដល់ទៅ ៣៦% បើប្រៀបទៅនឹង ឆ្នាំ២០១០ និងដែលនាំឲ្យកាណាដា ឈរនៅលំដាប់ទី៦ចំណោមប្រទេសផលិតប្រេងលើពិភពលោក។
មុនពេលធ្លាក់ចុះពាក់កណ្តាលតម្លៃប្រេងដែលបានចាប់ផ្តើមនៅពាក់កណ្តាលឆ្នាំ២០១៤ ធនាគារ កាណាដាបានព្យាករណ៍កំណើនសេដ្ឋកិច្ចចន្លោះ ២% ទៅ ២,៥% សម្រាប់ឆ្នាំ២០១៥ ចំណែកឯ មូលនិធិរូបិយវត្ថុអន្ដរជាតិ ក៏បានព្យាករណ៍កំណើន ២,៤% ដែរ បើទោះជាមានហានិភ័យនៃបំណុល គ្រួសារនៅតែខ្ពស់។ ក៏ប៉ុន្តែក្រោយមក ជាមួយនឹងការធ្លាក់ចុះក្នុងវិស័យប្រេងនេះ ទេសាភិបាលធនាគារ កណ្តាលគឺ លោក Stephen Poloz បានព្យាករណ៍បន្ថយកំណើនមកត្រឹមតែចន្លោះពី១,៧៥ទៅ២,២៥% ប៉ណ្ណោះសម្រាប់ឆ្នាំ២០១៥។ តួរលេខនៃកំណើននេះក៏ទំនងជានឹងបន្តបន្ថយទៀតដរាបណា ការធ្លាក់ថ្លៃ នៃតម្លៃប្រេងនៅតែបន្ត។
ជាក់ស្តែងនៅដើមសប្តាហ៍នេះ ប្រេងមួយធុងថ្លៃត្រឹមតែ៥៤ដុល្លារដែលជាតម្លៃ ទាបជាងគេបំផុតក្នុងរយៈពេលប្រាំឆ្នាំចុងក្រោយនេះ។ ជាការធ្លាក់ថ្លៃដែលបណ្តាលមកពីប្រទេស សមាជិកនៃអង្គការប្រទេសនាំចេញប្រេងហៅកាត់ថា OPEP មិនព្រមកាត់បន្ថយការផលិតប្រេងរបស់ ខ្លួន និងម៉្យាងទៀតមកពីតម្រូវការប្រេងទូទាំពិភពលោកនឹងនៅទ្រឹងក្នុងឆ្នាំ២០១៥ នេះបើតាមការវិភាគ របស់ ទីភ្នាក់ងារថាមពលអន្តរជាតិ (AIE)។ យ៉ាងណាមិញ ធនាគារអភិវឌ្ឍន៍ Nomura បានសន្និដ្ឋានថា ការណ៍នេះនឹងនាំឲ្យការធ្វើអាជីវកម្មប្រេងរបស់កាណាដាធ្លាក់ដល់កំរិតមួយ ដែលទទួលបានបា្រក់ចំណេញតិចបំផុត។
ក៏ប៉ុន្តែបើតាមការវិភាគរបស់ធនាគារជាតិ ការកាត់បន្ថយក្នុងវិស័យប្រេងនឹងអាចប៉ះប៉ូវវិញដោយកំណើន នៃការនំាចេញដែលបណ្តាលមកពីការធ្លាក់ចុះនៃប្រាក់ដុល្លារកាណាដា និងស្ថានភាពប្រសើរឡើងនៃ សេដ្ឋកិច្ចរបស់អាមេរិកដែលជាដៃគូរពាណិជ្ជកម្មធំបំផុតរបស់ប្រទេសកាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ