Charlie Hebdoរងភេរវកម្ម ដោយសារតែចង់រក្សាសេរីភាពបញ្ចេញមតិ
ប្រទេសបារាំងទាំងមូល នៅថ្ងៃព្រហស្បតិ៍ ទី កាន់ទុក្ខជាតិ ចំពោះជនរងគ្រោះ អ្នកកាសែតទស្សនាវដ្តីរូបត្លុកCharlie Hebdo និងប៉ូលិស ដែលត្រូវបានក្រុមជនឈាម ត្រជាក់បាញ់សម្លាប់ កាលពីថ្ងៃពុធម្សិលមិញ។ អំពើភេរវកម្មសម្លាប់អ្នកកាសែត បានកើតឡើង ទំាងថ្ងៃត្រង់ នៅកណ្តាលក្រុងប៉ារីស នៅក្នុងទីស្នាក់ការផ្ទាល់របស់ទស្សនាវដ្តី។ អ្នកកាសែត៨នាក់ ដែលសុទ្ធតែអ្នកគំនូរល្បីៗក្នុងប្រទេសបារំាង និងប៉ូលិស២នាក់ បានស្លាប់ នៅក្នុងព្រឹត្តិការណ៍បាញ់ប្រហាររបស់ឧក្រិដ្ឋជន។
ចុះផ្សាយនៅថ្ងៃ៖ កែប្រែថ្ងៃទី៖
នៅកណ្តាលថ្ងៃត្រង់ ម្សិលមិញ ជនបិទមុខមួយក្រុម ដែលតាមរដ្ឋមន្រ្តីក្រសួងមហាផ្ទៃបាននិយាយថា មានគ្នា២នាក់ បានចូលទៅ ក្នុងទីស្នាក់ការរបស់ទស្សនាវដ្តី Charlie Hebdo ក្នុងសង្កាត់ទី ១១ កណ្តាលក្រុងប៉ារីស។ តាមសាក្សីរបស់ស្រ្តីអ្នកកាសែតម្នាក់ ដែលស្ថិតនៅក្នុងហេតុការណ៍ ជនបិទមុខ បានភ្ជង់កាំភ្លើង បញ្ជាឲ្យនាងចុចលេខកូដ ដើម្បីបើកទ្វារចូលទៅក្នុងអគាររបស់ទស្សនាវដ្តី។ បន្ទាប់មក ឧក្រិដ្ឋជនបានឡើងទៅជាន់ខាងលើ ដែលជាការិយាល័យនិពន្ធរបស់Charlie Hebdo។ ឃាតករបានបាញ់សម្លាប់អ្នកកាសែត ៨នាក់ ភ្ញៀវរបស់ទស្សនាវដ្តីម្នាក់ និងប៉ូលិសម្នាក់ ដែលមានភារកិច្ច ត្រូវយាមការពារសន្តិសុខ ឲ្យប្រធានទស្សនាវដ្តីម្នាក់ប៉ុណ្ណោះ។
បន្ទាប់ពីបាញ់សម្លាប់អ្នកកាសែត ឧក្រិដ្ឋជនបិទមុខបានចេញមកក្រៅវិញ និងបានបាញ់កាំភ្លើងAK ទៅលើប៉ូលិសពីរ បីនាក់ រហូតធ្វើឲ្យប៉ូលិសត្រូវដកថយ រកកន្លែងលាក់ខ្លួន។ នៅក្នុងពេលនោះ ឧក្រិដ្ឋជនមា្នក់បានស្រែកជាភាសាអារ៉ាប់ថា ព្រះគឺធំអស្ចារ្យ ចំណែកម្នាក់ទៀត បានស្រែកជាភាសាបារាំងថា គេបានសម្លាប់ Charlie Hebdo ដើម្បីសងសឹកឲ្យព្យាការី ម៉ូហាម៉េដ។
តាមរដ្ឋអាជ្ញាបារាំង មនុស្ស១២នាក់ បានស្លាប់នៅក្នុងព្រឹត្តិការណ៍បាញ់ប្រហារទៅលើទស្សនាវដ្តី Charlie Hebdo។ ព្រឹត្តិការណ៍បាញ់សម្លាប់អ្នកកាសែត កើតមានតែជាង១០នាទីប៉ុណ្ណោះ។ បើមើលវីដេអូដែលអ្នកជិតខាងថតបាន ឃាតករត្រូវគេសំគាល់ឃើញថា បានបាញ់សម្លាប់មនុស្សដោយឈាមត្រជាក់ និងធ្វើសកម្មភាពប្រកបដោយវិជ្ជាជីវៈបំផុត ពោលគឺគេបានទទួលការហ្វឹកហាត់ប្រើកាំភ្លើងយ៉ាងស្ទាត់ជំនាញ។
តាមប៉ូលិសបារាំង ឃាតកម្មទៅលើអ្នកកាសែត ត្រូវបានឧក្រិដ្ឋជន រៀបចំទុកជាមុន ព្រោះថា គេបានតាមដានដឹងថា នៅថ្ងៃពុធ ម្សិលមិញ ជាថ្ងៃប្រជុំប្រចាំសប្តាហ៍ ដូច្នេះ មានអ្នកកាសែតសឹងទាំងអស់បានមកធ្វើការ។
រូបត្លុកម៉ូហាម៉េដ
Charlie Hebdo ជាទស្សនាវដ្តីរូបត្លុកកំប្លែង ប៉ុន្តែ បង្កប់ការរិះគន់។ ទស្សនាវដ្តីនេះមិនសូវមានចេញផ្សាយច្រើនទេ ប៉ុន្តែ គេចាប់អារម្មណ៍ច្រើន Charia Hebdo ដោយសារតែទស្សនាវដ្តីនេះបង្ហាញរូបត្លុកច្រើនដែលនិយាយលេបខាយ រិះគន់មិនថា ព្រះយេស៊ូ ឬព្យាការី មូហាម៉េដ។ តាំងពីឆ្នាំ ២០០៦ ទស្សនាវដ្តីមួយនេះបានរងការគំរាមកំហែងពីក្រុមអ៊ីស្លាមជ្រុលនិយម ដោយសារតែក្រុមនេះ បានចាត់ទុករូបគំនូរត្លុករបស់ Charlie Hebdo (រូបម៉ូហាម៉េដមានដាក់គ្រាប់បែកក្នុងក្បាល) ថា មានលក្ខណៈសើចចំអក មើលងាយព្យាការី ម៉ូហាម៉េដ ។ កាលពីឆ្នាំ ២០១១ ទីស្នាក់ការរបស់ Charlie Hebdoត្រូវបានដុតបំផ្លាញ បន្ទាប់ពីទស្សនាវដ្តីចេញផ្សាយលេខពិសេស បែបកំប្លែង មួយ ដែលមានឈ្មោះថា Charia Hebdo ឬទស្សនាវដ្តីច្បាប់អ៊ីស្លាម Charia និងដែលមានព្យាការី មូហាម៉េដជានិពន្ធនាយក។ យុវជនអាយុ២៣ឆ្នាំម្នាក់ត្រូវចាប់ខ្លួន ដោយសារតែបានបង្ហោះសារអំពាវនាវតាមអ៊ីនធ័រនែត ឲ្យគេកាត់កអ្នកកាសែតដែលហ៊ានសើចចំអកឲ្យព្រះអ៊ីស្លាមរបស់គេ។
នៅឆ្នាំ ២០១១ រដ្ឋាភិបាលបារាំងបានចាត់ទុកការដុតបំផ្លាញទីស្នាក់ការ Charlie Hebdoថា ជាអំពើភេរវកម្ម។ ចំណែកអ្នកគំនូរសំខាន់ៗរបស់ទស្សនាវដ្តីត្រូវបានទទួលការការពារជាប់ជានិច្ចពីប៉ូលិស។ គឺទើបតែមួយឆ្នាំចុងក្រោយនេះ ដោយសារតែកម្រិតគំរាមកំហែងហាក់ថយចុះ គេបានដកការការពារពីអ្នកគំនូរដែលអាចរងការគំរាមកំហែង ប៉ុន្តែ នៅរក្សាទុក សម្រាប់តែប្រធានទស្សនាវដ្តីតែប៉ុណ្ណោះ គឺលោកStephane Charbonnier ហៅCharb។
ស្លាប់ដើម្បីការពារសេរីភាពបញ្ចេញមតិ
អ្នកកាសែតដែលស្លាប់ដោយសារឧក្រិដ្ឋជនឈាមត្រជាក់ គឺសុទ្ធតែជាអ្នកគំនូរល្បីៗឈ្មោះ នៅក្នុងប្រទេសបារាំង ដូចជា Charb លោក Cabu លោកWolinski និងTignous។ គេច្រើនឃើញស្នាដៃរបស់ពួកគេ នៅតាមទស្សនាវដ្តី និងកាសែតបារាំង ដូចជា Le canard enchainéeដែលជាកាសែតរូបត្លុកដ៏ល្បីល្បាញរបស់បារាំង លោក Charbដែលជាប្រធានទស្សនាវដ្តី ជាម្ចាស់រូបគំនូរត្លុកដែលបង្ហាញពីព្យាការី មូហាម៉េដ ជិះរទេះកង់ រុញដោយបុរសជ្រុលនិយមម្នាក់។ រូបត្លុកនេះបានបង្កឲ្យមានការមិនពេញចិត្តពីសំណាក់សហគមន៍អ៊ីស្លាម និងការគំរាមកំហែងពីក្រុមជ្រុលនិយម។ ប៉ុន្តែ លោក Charbធ្លាប់បានអះអាងថា នេះជាសេរីភាពបញ្ចេញមតិរបស់លោក នៅក្នុងប្រទេសបារាំង និងថា លោកមិនចុះចាញ់ នឹងការសំឡុតរបស់ក្រុមជ្រុលនិយមទេ។ លោកថែមទាំងហ៊ាននិយាយថា លោកស៊ូស្លាប់ ដោយឈរ ប៉ុន្តែមិនលត់ជង្គង់ ទេ។
អ្នកគំនូរផ្សេងទៀត ដូចជាលោកCabu លោកWolinski និងTignousជាដើម សុទ្ធតែបានទទួលការគំរាមកំហែងអាយុជីវិត ប៉ុន្តែ ពួកគេនៅតែហ៊ានបន្តគូរគំនូរឲ្យទស្សនាវដ្តី ទៅតាមការយល់ឃើញរបស់គេ។ សម្រាប់ពួកគេ គ្មានអ្វីដែលរារាំង បិទខ្ទប់សេរីភាពបញ្ចេញមតិរបស់ពួកគេបានទេ។ អ្នកគំនូរដូចជាCharb Cabu Wolinski Tignous និងអ្នកកាសែតដែលត្រូវឃាតករបាញ់កាលពីថ្ងៃម្សិលមិញ ត្រូវបានពិភពលោកទាំងមូល ចាត់ទុកជាវីរជន ដែលបានបាត់បង់ជីវិត ដើម្បីបុព្វេហតុការពារសេរីភាពបញ្ចេញមតិ។ សេរីភាពបញ្ចេញមតិ និងសេរីភាពសារព័ត៌មាន ដែលមានតម្លៃខ្ពស់ មិនអាចកាត់ថ្លៃបាន និងដែលគេមិនអាចប៉ះពាល់បាន នៅក្នុងប្រទេសបារាំង ក៏ដូចជានៅកន្លែងដទៃទៀត នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ