បារាំងនឹងបង្កើតច្បាប់ថ្មីប្រឆាំងភេរវកម្មដូចអាមេរិកក្រោយមហាភេរវកម្ម១១កញ្ញា ?
ចុះផ្សាយនៅថ្ងៃ៖
ស្តាប់ - ០៧:០៣
ការតស៊ូមតិបានផុសផុលស្ទើរគ្រប់មាត់ ចំពោះវិធានការការពារសន្តិសុខជាតិ និងជាពិសេសដើម្បីរកវិធានការតបនឹងអំពើភេរវកម្ម។ មានវិធានការជាច្រើនត្រូវបានព្រលយឱ្យដឹង តែភាពចម្រូងចម្រាសក៏មានច្រើន ! ហើយគឺនៅថ្ងៃនេះតែម្តងដែលសភាបារាំងត្រូវអនុម័តថាតើគួរបន្តឬបញ្ឈប់ប្រតិបត្តិការប្រឆាំងភេរវកម្មជីហាតនៅអ៊ីរ៉ាក់ និងត្រូវពិភាក្សាស្តីអំពីការបង្កើតច្បាប់ថ្មីប្រឆាំងនឹងភេរវកម្ម។ ក្នុងពេលជាមួយគ្នា កាសែតCharlie-Hebdo បានបង្ហាញជាសាធារណៈអំពីទ្រង់ទ្រាយនិងខ្លឹមសារនៃកាសែត ដែលត្រូវចេញលក់ នៅថ្ងៃពុធទី ១៤ មករា ២០១៥។
រដ្ឋាភិបាលបារាំង បានប្រកាសចាត់វិធានការថ្មីតឹងរឹងបំផុតប្រឆាំងនឹងភេរវកម្ម ប៉ុន្តែនាយករដ្ឋមន្ត្រីបានបដិសេធមិនបញ្ចេញសកម្មភាពអ្វីដោយបង្ខំឡើយ។ បារាំងកំពុងតែរិះរកមធ្យោបាយប្រឆាំងអំពើភេរវកម្ម ដោយយកច្បាប់មកធ្វើជាអាវុធ។
ជួនចំពេលជាមួយគ្នានេះ សភាបារាំងថ្ងៃនេះ ត្រូវបើកកិច្ចប្រជុំ ដើម្បីអនុម័តថាតើគួរបន្ត ឬអត់ប្រតិបត្តិការប្រឆាំងនឹងភេរវកម្មជីហាតនៅអ៊ីរ៉ាក់។ នេះជារបៀបវារៈធម្មតារបស់បារាំងមុននឹងចេញឬបន្តយុទ្ធនាការនៅក្រៅប្រទេស។ សូមបញ្ជាក់ថា ជនជីហាតបារាំងទាំងបីដែលបានបង្កភេរវកម្មបង្ហូរឈាមនៅទីក្រុងប៉ារីស សប្តាហ៍មុន បានអះអាងធ្វើសកម្មភាពដើម្បីសងសឹកបារាំងដែលទៅវាយប្រហារនៅអង្គការរដ្ឋអ៊ីស្លាមនៅអ៊ីរ៉ាក់។
កិច្ចប្រជុំសភាថ្ងៃនេះក៏ត្រូវជជែកគ្នាស្តីពីការបង្កើតច្បាប់ថ្មីទៀតប្រឆាំងភេរវកម្ម។ ការតស៊ូមតិមានច្រើនចំណុចណាស់ ដូចជាការតាមដាន ការបង្កើតបញ្ជីឈ្មោះអ្នកដំណើរ ។ល។ និង។ល។ ហើយអ្វីលាន់ឮស្ទើរគ្រប់មាត់ចង់បាននោះ គឺការបង្កើតច្បាប់ថ្មីប្រឆាំងភេរវកម្មដូចនៅសហរដ្ឋអាមេរិក ដែលមានឈ្មោះថា Patriot Act។ ច្បាប់នេះ ត្រូវបានរដ្ឋាភិបាលអាមេរិករបស់លោក ហ្ស័ក ប៊ូស ស្នើទៅសភា និងអនុម័តតែ៤៥ថ្ងៃក្រោយមហាភេរវកម្មប្រឆាំងសហរដ្ឋអាមេរិកថ្ងៃទី ១១កញ្ញា២០០១។ ក៏ប៉ុន្តែសម្រាប់អ្នកនយោបាយបារាំង ច្បាប់អាមេរិកនេះ មានលក្ខណៈរំលោភមូលដ្ឋានគ្រឹះនៃសេរីភាពខ្លាំងណាស់ អាចលបស្តាប់ ចូលចាប់ ឆែកឆេរដោយមិនបាច់ប្រាប់ និងជាពិសេស ប្រយោជន៍តិចតួចខាងប្រឆាំងភេរវកម្ម ជាឧទាហរណ៍ នៅក្នុងឆ្នាំ២០១៣ ក្នុងចំណោមសំណុំរឿង១១១២៩ មានតែ៥១ប៉ុណ្ណោះជាករណីភេរវកម្ម ជិតមួយម៉ឺនករណីជាការជួញដូរគ្រឿងញៀន។ នេះបើតាមតួលេខរបស់អង្គការសហភាពអាមេរិកដើម្បីសេរីភាពជនស៊ីវិល។
ដោយមានគំរូនេះ បារាំងមិនចង់ធ្វើអ្វីឱ្យលឿនជ្រុល និងឱ្យហួសហេតុពេកទេ។ តែអាចស្រង់គំនិតខ្លះពីPatriot Act ដូចដែលមានចែងក្នុងច្បាប់ទើបអនុម័តកាលពីខែវិច្ឆិកា២០១៤ ពង្រឹងមធ្យោបាយតាមដានទូរគមនាគមន៍។
លោក អូបាម៉ា សមតែមកចូលរួមដង្ហែក្បួននៅប៉ារីស
នៅល្ងាចមិញ សេតវិមានបានចេញមុខសម្តែងការសោកស្តាយ នៅពេលឃើញលោកអូបាម៉ា ជាប្រធានាធិបតីមិនធ្វើដំណើរមកក្រុងប៉ារីស ដើម្បីលើកទឹកចិត្តប្រទេសដែលសហរដ្ឋអួតថាជាសម្ព័ន្ធមិត្តដ៏ស្និទ្ធម្នាក់ ជាអ្នកដែលបានសហការដោយគ្មានរួញរាចូលប្រយុទ្ធប្រឆាំងនឹងភេរវនិយមជីហាតនៅអ៊ីរ៉ាក់ រហូតទទួលថ្មបាក់ខ្លួនឯង។ អ្នកនាំពាក្យវិមានប្រធានាធិបតីបានថែមបន្ទោសលោក អូបាម៉ា ថាគួរតែបញ្ជូនតំណាងប្រទេសថ្នាក់កំពូលៗដូចជាអនុប្រធានាធិបតី ចូ បៃដិន ឬយ៉ាងហោចណាស់រដ្ឋមន្ត្រីក្រសួងការបរទេស លោកចន ឃែរីដែរ (លោកឃែរី ដែលកំពុងស្ថិតនៅឥណ្ឌាក្បែរបារាំងស្រាប់) មិនមែនត្រឹមតែឯកអគ្គរដ្ឋទូតអាមេរិកប្រចាំក្រុងប៉ារីសប៉ុណ្ណោះទេ។ រដ្ឋមន្ត្រីក្រសួងយុត្តិធម៌អាមេរិក ដែលអញ្ជើញមកប៉ារីស បានត្រឹមមកជួបប្រជុំស្តីពីបញ្ហាសន្តិសុខ តែមិនបានចុះថ្នល់ជាមួយគេឯងទេឡើយ។
លោក ឃែរី ទើបតែនៅថ្ងៃម្សិលមិញ បានប្រកាសនឹងមកសម្តែងសាមគ្គីភាពជាមួយបារាំងនៅសប្តាហ៍ក្រោយ។
កាសែតCharlie-Hebdo ចេញផ្សាយជាថ្មី ចាប់ពីថ្ងៃពុធទី ១៤ មករា ២០១៥
“កំប្លែងឱ្យសើច" នេះជាស្មារតីរបស់កាសែតCharlie-Hebdo។ ហើយគោលការណ៍នេះបន្តឆ្លុះបញ្ចាំងនៅក្នុងទំព័រកាសែត ចេញផ្សាយនៅថ្ងៃស្អែក និងលេខបន្តបន្ទាប់។ អ្នកកាសែតបានរួចពីសា្លប់ នឹងបន្តរក្សាគោលការណ៍និពន្ធ រិះគន់នយោបាយ សាសនា ដូចទម្លាប់ពីមុន។
លេខដែលនឹងត្រូវចេញផ្សាយនៅថ្ងៃពុធទី ១៤ មករា បានសរសេរចប់សព្វគ្រប់ អស់ហើយ ដោយប្រសិទ្ធិនាមថា លេខរួចពីស្លាប់ ក៏ប៉ុន្តែមិនមែនជាលេខពិសេសសម្រាប់ឧទ្ទិសដល់ជនរងគ្រោះបាត់បង់ជីវិតទេ ជាកាសែតធម្មតា។ មាន៨ទំព័រ បោះផ្សាយចំនួន៣លានច្បាប់ ជា១៦ភាសា និងដាក់លក់ក្នុងប្រទេសចំនួន២៥។ ពីមុនមកស្ហាលី ចេញលក់តែ៦ម៉ឺនច្បាប់ប៉ុណ្ណោះ ក្នុងមួយសប្តាហ៍។
ដោយគ្មានគំនិតញុះញង់បង្ករឿង នៅលើទំព័រមុខ ស្ហាលី បានជ្រើសរើស យករូបម៉ូហាម៉េតឈរស្រក់ទឹកភ្នែក មកដាក់ពេញមួយទំព័រមុខតែម្តង កាន់បដា “Je suis Charlie” ខ្ញុំជាស្ហាលី ជាមួយនឹងចំណងជើងថា “អត់អោនទោសឱ្យទាំងអស់”។
សរសេរដោយក្រុមអ្នកកាសែតស្ហាលីសុទ្ធសាធ គ្មានរូបរបស់អ្នកផ្សេងដែលចង់ឧទ្ទិសកាសែតឡើយ។ រូបថ្លុករបស់អ្នកគំនូរល្បីៗដែលបានស្លាប់នៅក្នុងភេរវកម្មកាលពីថ្ងៃពុធមុន ក៏នឹងមានចុះផ្សាយក្នុងទំព័រកាសែតដូចទម្លាប់។
កាសែតស្ហាលី រក្សាទុកទាំងស្រុងនូវគោលការណ៍និពន្ធ វាយប្រហារតាមបែបកំប្លែង រិះគន់ អ្នកនយោបាយ សាសនា តែគ្មានលក្ខណៈញុះញង់បង្ករឿង និងគ្មានបង្កប់អត្ថន័យរំលឹក ឬឧទ្ទិស ឬបង្ហាញឈ្មោះអ្នកកាសែតដែលបាត់បង់ជីវិតទៅហើយនោះទេ។
កាសែតចង់បង្ហាញពីភាពធម្មតា ភាពដើមរបស់ស្ហាលីដដែល ពោលគឺនៅរាល់លេខ តាំងពីជាងម្ភៃពីរឆ្នាំមក៖ គ្រប់លេខត្រូវតែមាន រូបថ្លុកសម្តេចប៉ាប យេស៊ូ ប្រធានវិហារកាតូលិក ប្រមុខសាសនាជ្វីហ្វ សាសនាអ៊ីស្លាម និងម៉ូហាម៉េត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ