ក្រោយភេរវកម្មនៅប៉ារីស សហភាពអឺរ៉ុបចង់ពង្រឹងមធ្យោបាយប្រឆាំងភេរវកម្ម
ប្រទេសនៅអឺរ៉ុប និងសហភាពអឺរ៉ុប ចង់យកភេរវកម្មនៅទីក្រុង ធ្វើជាមេរៀន ! និងជំរុញឱ្យសមាជិកទាំងអស់គិតគូរចង់ពង្រឹងកិច្ចសហប្រតិបត្តិការរវាងគ្នា ដើម្បីទប់ស្កាត់ភេរវកម្មដែលអឺរ៉ុបពេលនេះកំពុងប្រឈមខ្លាំង។ ប៉ុន្តែគ្រប់វិធានការនិងមធ្យោបាយប្រយុទ្ធប្រឆាំងភេរវកម្មត្រូវជាប់គាំង ដោយប្រទេសជាសមាជិកនិយាយមិនត្រូវគ្នា។
ចុះផ្សាយនៅថ្ងៃ៖
កែប្រែសន្ធិសញ្ញាSchengen ត្រួតពិនិត្យស៊ីជម្រៅអ្នកដំណើរសង្ស័យ បង្កើតបញ្ជីព័ត៌មានអ្នកដំណើរផ្លូវអាកាសថ្នាក់អឺរ៉ុប (PNR) ចែករំលែកព័ត៌មានរវាងភ្នាក់ងារស៊ើបការណ៍ ប្រយុទ្ធប្រឆាំងនឹងចរាចរណ៍អាវុធ ត្រួតពិនិត្យអ៊ីនធ័រនែតដើម្បីទប់ស្កាត់ការផ្តាច់ខ្លួនទៅជាជនជ្រុលនិយម ... រដ្ឋមន្ត្រីក្រសួងមហាផ្ទៃបារាំង បានរាយមុខវិធានការដែលអឺរ៉ុបត្រូវអនុវត្ត។
ទាំងនេះមិនមែនជាគំនិតថ្មីថ្មោងទេ។ អ្នកទទួលខុសត្រូវផ្នែកប្រឆាំងភេរវកម្មសហភាពអឺរ៉ុបបានលើកឡើងពី យុទ្ធសាស្ត្រប្រយុទ្ធប្រឆាំងនឹងការផ្តាច់ខ្លួនទៅធ្វើជីហាត តាំងពីឆ្នាំ២០០៨ ប៉ុន្តែប្រទេសជាសមាជិកមិនព្រមព្រៀងគ្នា។ នៅអឺរ៉ុបនៅតែនិយាយមិនត្រូវគ្នាលើនិយមន័យ “យុទ្ធជនបរទេស” បើទោះបីជាពេលនេះ មានយុវជនអឺរ៉ុបជាងបីពាន់នាក់ ក្នុងនោះ ១ពាន់នាក់ជាបារាំង បានភ្ជាប់ខ្លួនទៅនឹងពួកអ៊ីស្លាមជ្រុលនិយមនៅស៊ីរី និងអ៊ីរ៉ាក់ក៏ដោយ។ សម្រាប់អ្នកឯកទេស ការផ្តោះប្តូរ និងចែកចាយព័ត៌មាន ជាគន្លឹះសម្រាប់ប្រយុទ្ធប្រឆាំងនឹងចលនាយុវជនចេញទៅធ្វើជីហាត ប៉ុន្តែប្រទេសនីមួយៗមិនចង់បាត់បង់ មិនចង់ឃើញព័ត៌មានលេចសាយភាយច្រើនប្រទេសពេក ចូលចិត្តកិច្ចសហប្រតិបត្តិការទ្វេភាគី ជាក្រុមតូចៗជាង។
ការត្រួតពិនិត្យនិងតាមដានការធ្វើដំណើរជាវិធានការមួយនៃការប្រយុទ្ធប្រឆាំងនឹងភេរវកម្មដែរ។ ប៉ុន្តែសម្រាប់សភាអឺរ៉ុប ដើម្បីអាចបង្កើតបញ្ជីព័ត៌មានអ្នកដំណើរ គេត្រូវការច្បាប់អឺរ៉ុបដើម្បីការពារទិន្និន័យបុគ្គល ជាហេតុធ្វើឱ្យជាប់គាំងតាំងពីឆ្នាំ២០០១មក។ សេរីភាពនៃការធ្វើដំណើរស្របតាមសន្ធិសញ្ញាSchengen ក៏កំពុងត្រូវបានគាស់កកាយ។ ជាធម្មតា គ្មានទេការត្រួតពិនិត្យជាស្វ័យប្រវត្តិតាមព្រំដែនប្រទេសជាសមាជិកសន្ធិសញ្ញា ប៉ុន្តែកាលពីថ្ងៃអាទិត្យ ក្រោយហេតុការណ៍ភេរវកម្មនៅប៉ារីសមក រដ្ឋមន្ត្រីក្រសួងមហាផ្ទៃអេស្ប៉ាញ បានផ្លុំភ្លើងដោយចង់ដាក់ឱ្យប៉ូលិសត្រួតតាមព្រំដែន តែត្រូវបាននាយករដ្ឋមន្ត្រីកាយកប់វិញ នៅថ្ងៃចន្ទទី១១មករាថាគ្មានការកែប្រែសន្ធិសញ្ញាជាឯកតោភាគីទេ។
យ៉ាងណាក៏ដោយ ក៏វិធានការទាំងនេះនឹងត្រូវរដ្ឋមន្ត្រីក្រសួងមហាផ្ទៃនិងយុត្តិធម៌សហភាពអឺរ៉ុបលើកមកពិភាក្សាគ្នានៅចុងខែនៅប្រទេសឡេតូនីជាប្រធានផ្លាស់វេន ឬអាចឆាប់ជាងនេះបើយោលទៅតាមស្ថានការណ៍អាសន្នបច្ចុប្បន្ន ហើយជំនួបវិសាមញ្ញមួយត្រូវចាប់ផ្តើមនៅថ្ងៃសុក្រខាងមុខនេះតែម្តង នៅទីក្រុងព្រុចសែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ