ប្រព័ន្ធផ្សព្វផ្សាយបារាំងបើកយុទ្ធនាការ ២៤ម៉ោងនៃកីឡាស្ត្រី
ស្រ្តីក្នុងវិស័យកីឡា។ នៅប្រទេសបារាំង នៅថ្ងៃនេះ ប្រព័ន្ធផ្សព្វផ្សាយមិនថា រដ្ឋ ឬឯកជននឹងផ្តោតកម្មវិធីផ្សាយរបស់ខ្លួនដើម្បីនិយាយតែពីកីឡាករជាស្រ្តី។ វិទ្យុបារាំងអន្តរជាតិក៏បានចូលរួមនៅក្នុងយុទ្ធនាការថ្ងៃនេះដែរ។ យុទ្ធនាការដែលមានឈ្មោះថា២៤ម៉ោងនៃកីឡារបស់ស្រ្តី ចេញពីគំនិតផ្តួចផ្តើមរបស់ឧត្តមក្រុមប្រឹក្សាប្រព័ន្ធផ្សព្វផ្សាយជាតិបារាំង ជាមួយក្រសួងកីឡា និងអង្គការសមាគមដែលធ្វើការទៅលើកីឡារបស់ស្រ្តី។ នេះជាលើកទីពីរដែលយុទ្ធនាការនិយាយពីស្រ្តីក្នុងវិស័យកីឡាត្រូវបានរៀបចំក្នុងប្រទេសបារាំង។
ចុះផ្សាយនៅថ្ងៃ៖
ស្តាប់ - ០៤:១២
ជំរុញស្រ្តីឲ្យមានមុខកាន់តែច្រើននៅក្នុងកីឡា បើអាចទៅរួច នៅក្នុងកីឡាអាជីព។ ទូរទស្សន៍ វិទ្យុ កាសែត និងបណ្តាញសង្គមនៅលើអ៊ីនធ័រនែតគឺជាឧបករណ៍ផ្សព្វផ្សាយយ៉ាងមានប្រសិទ្ធិភាពដើម្បីសម្រេចគោលដៅនេះ។ នៅថ្ងៃនេះ ប្រព័ន្ធផ្សព្វផ្សាយនឹងរក្សាម៉ោងផ្សាយដើម្បីនិយាយជាពិសេសពីស្រ្តីក្នុងវិស័យកីឡា។ គ្រប់ភាគី មិនថា ប្រព័ន្ធផ្សព្វផ្សាយ ឬក្រុមហ៊ុនឯកជនត្រូវបានជំរុញឲ្យនិយាយ និងជួយឧបត្ថម្ភកីឡាការនី នៅបារាំង។ នៅយប់ថ្ងៃសុក្រម្សិលមិញ សមាគមFemix sport ដៃគូសហការរៀបចំកម្មវិធី២៤ម៉ោងនៃកីឡារបស់ស្រ្តី បានចាប់ផ្តើមផ្តល់រង្វាន់លើកទឹកចិត្តដល់អ្នកដែលបានបោះវិនិយោគលើកីឡាស្រ្តី អាជ្ញាកណ្តាលជាស្រ្តី និងសមាគមដែលធ្វើការផ្នែកកីឡាស្រ្តី។ អ្នកស្រីCarole Bretteville ប្រធានគណៈកម្មការជាតិនៃស្រ្តី និងកីឡារបស់សហព័ន្ធកីឡា និងសហគ្រាស និងជាប្រធានរបស់Femix នៅខេត្តAlsaceបាននិយាយថា៖
“មានកីឡាការនីតិចណាស់ដែលគេថតនៅតាមទូរទស្សន៍រដ្ឋ ឯកជន ឬនិយាយចុះផ្សាយនៅតាមទំព័រកាសែត។ នៅក្នុងយុទ្ធនាការ២៤ម៉ោងនៃកីឡារបស់ស្រ្តី នៅថ្ងៃនេះ យើងបានចំណាយលុយដើម្បីទិញកម្មវិធីជាច្រើននៅតាមវិទ្យុទូរទស្សន៍ ដើម្បីឲ្យគេនិយាយរយៈពេល២៤ម៉ោង ពីព្រឹត្តិការណ៍កីឡារបស់ស្រ្តី។ មានន័យថា នឹងមានអ្នកកាសែតស្រ្តីដែលធ្វើអត្ថាធិប្បាយលើការប្រកួតកីឡា។ យើងនឹងធ្វើការផ្សព្វផ្សាយពាណិជ្ជកម្មផងដែរពីការប្រកួតនានាដែលមានស្រ្តីជាកីឡាក។ ធ្វើដូច្នេះ គឺមនុស្សគ្រប់គ្នានឹងទៅចូលរួមមើលការប្រកួត និងលើកទឹកចិត្តស្រ្តីដែលជាកីឡាករ។”
សម្រាប់Carole Bretteville ការដែលប្រព័ន្ធផ្សព្វផ្សាយនិយាយកាន់តែច្រើនពីស្រ្តីនៅក្នុងវិស័យកីឡា នោះនឹងជំរុញឲ្យស្រ្តីធ្វើកីឡាកាន់តែច្រើន។
“គំនិតរបស់យើងគឺជំរុញឲ្យមនុស្សស្រ្តីធ្វើកីឡា។ នៅពេលដែលប្រព័ន្ធផ្សព្វផ្សាយមិនសូវនិយាយពីកីឡារបស់ស្រ្តី នោះស្រ្តីក៏មិនសូវធ្វើកីឡាដែរ។ ធម្មតាទេ នៅពេលមនុស្សស្រីមើលការប្រកួតកីឡានៅតាមទូរទស្សន៍ អ្នកឃើញតែ កីឡាករប្រុស។ អីចឹងមនុស្សស្រីគិតថា កីឡាមិនមែនសម្រាប់មនុស្សស្រីទេ។ ការធ្វើកីឡាមិនថា កីឡាអាជីព គឺល្អសម្រាប់សុខភាព។ យើងដឹងថា មនុស្សស្រីជាង៥០ភាគរយ នៅពេលខ្លួនពេញវ័យបានបោះបង់ចោលការធ្វើកីឡា។ ការសិក្សារបស់យើងមួយបង្ហាញថា មនុស្សស្រីចំណាយពេលជាច្រើនម៉ោងនៅកន្លែងធ្វើការ ចំណែកមនុស្សប្រុសនៅតែបន្តធ្វើកីឡា ឬចេញទៅទាត់បាល់ នៅខាងក្រៅ។ ម្យ៉ាងទៀត ជីវិតជាម្តាយបានរារាំងស្រ្តីមិនឲ្យអាចធ្វើកីឡា។ នៅក្នុងគ្រួសារជាច្រើន ស្រ្តីនៅផ្ទះមើលកូន ចំណែកមនុស្សប្រុសនៅតែអាចធ្វើកីឡាដូចមុន។ ដូច្នេះ ដោយបង្ហាញថា ស្រ្តីមិនថាជាម្តាយ ឬជាអ្នកធ្វើការ សុទ្ធតែអាចធ្វើកីឡា។ នៅក្នុងយុទ្ធនាការរបស់យើងលើកនេះ ប្រព័ន្ធផ្សព្វផ្សាយនឹងបង្ហាញថា មានកីឡាច្រើនប្រភេទដែលស្រ្តីអាចធ្វើបាន និងមានកីឡាការនីដែលជាគំរូសម្រាប់មនុស្សស្រីដែលចង់ធ្វើកីឡា។”
កីឡាការនីបាល់ទាត់ចាប់ផ្តើមមានតាំងពីទសវត្សរ៍ ឆ្នាំ ១៩៧០ និងRugby នៅឆ្នាំ ១៩៨០។ ជិតកន្លះទសវត្សរ៍ ស្រ្តីនៅក្នុងកីឡានៅតែមិនទាន់ត្រូវគេលើកតម្លៃ និងនិយាយច្រើន។ ស្រ្តីកីឡាករមាននិយាយ លេចមុខនៅក្នុងប្រព័ន្ធផ្សព្វផ្សាយ នៅពេលណាដែលពួកគេបានឈ្នះរង្វានមេដាយតែប៉ុណ្ណោះ។ នៅក្នុងប្រទេសអភិវឌ្ឍដូចជាបារាំង គំនិតផ្តល់តម្លៃស្រ្តី កីឡាករនៅមិនទាន់រីកចម្រើននៅឡើយ ហើយទិវា ២៤ម៉ោងនៃកីឡារបស់ស្រ្តី នៅថ្ងៃនេះ គ្រាន់តែកូនម៉ាស៊ីនតូចមួយដែលអាចជួយជំរុញ បន្ថែមឲ្យប្រព័ន្ធផ្សព្វផ្សាយនិយាយកាន់តែច្រើនពីស្រ្តី។ កាសែត វិទ្យុ និងទូរទស្សន៍និយាយច្រើនពីស្រ្តីកីឡាករ នោះ ក្រុមហ៊ុនឯកជននឹងសម្រុកមកបោះទុនវិនិយោគកីឡា ស្រ្តី ដោយគ្មានរង់ចាំយូរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ