ក្រោយភេរវកម្មជីហាតប៉ារីស ទាហានបារាំងរងការវាយប្រហារកាំបិតកណ្តាលប្រជុំជន
កំពុងឈរការពារនៅមុខសាលារៀនជ្វីហ្វក្រុងនីស ភាគខាងត្បូងប្រទេសបារាំង ស្របតាមផែនការត្រៀមអាសន្នភេរវកម្ម ទាហានបីនាក់បានរងរបួស ក្នុងការវាយប្រហារដោយកាំបិត ពីសំណាក់ជនពាលជ្រុលនិយម ម៉ូសា គូលីបាលី នៅរសៀលថ្ងៃអង្គារទី ៣កុម្ភៈ ២០១៥។ ប្រវត្តិរបស់ជនដៃដល់ បានបង្ហាញអំពីទម្រង់នៃការគំរាមកំហែងបែបថ្មី ដែលក្រុមភ្នាក់ងារស៊ើបអង្កេតបារាំងត្រូវប្រឈម ៖ ជាក្មេងពាលក្នុងភូមិ គ្មានទំនាក់ទំនងជាមួយពួកជីហាត តែក្នុងមួយប៉ប្រិចភ្នែកក៏ប្តូរចិត្តលើកកាំបិតបញ្ចេញសកម្មភាពបែបជ្រុលនិយម។
ចុះផ្សាយនៅថ្ងៃ៖
ចាប់ខ្លួនបានភ្លាមក្រោយពីដកកាំបិតទៅចាក់ទាហានពីរនាក់ឱ្យរបួសស្រាល ទាហានទីបីចាប់បង្ក្រាប ជនដៃដល់មានឈ្មោះថា ម៉ូសា គូលីបាលី មានដើមកំណើតជាអ្នកជាយក្រុងប៉ារី
មានអាយុ៣០ឆ្នាំ មានត្រកូលដូចគ្នានឹងភេរវជនជីហាតនៅក្រុងប៉ារីសអាមេឌី គូលីបាលីមែន ប៉ុន្តែគ្រប់ប្រភពអង្កេត សុទ្ធតែអះអាងថា ម៉ូសា គូលីបាលី គ្មានពាក់ព័ន្ធនឹងភេរវកម្មកាលពីខែមករា។ ម្តាយ បងប្អូនប្រុសស្រី របស់ជនដៃដល់ចាក់ទាហាននៅនីស ម្សិលមិញ ត្រូវបានប៉ូលិស កោះហៅមកសួរចម្លើយទាំងអស់។
ប៉ុន្តែ ម៉ូសា គូលីបាលី ធ្លាប់មានប្រវត្តិមិនល្អ ជាប់ឈ្មោះក្នុងបញ្ជីប៉ូលិស តាំងពីជាង១០ឆ្នាំមកហើយ ក្នុងបទលួច ប្រើគ្រឿងញៀន ជេរប្រមាថខ្លាំងៗភ្នាក់ងាររដ្ឋ ជាក្មេងពាលក្នុងភូមិ ធ្លាប់ត្រូវតុលាការកាត់ទោស៦លើក ក្នុងរវាងពីឆ្នាំ២០០៣ ដល់២០១២ ឱ្យបង់ពិន័យ ឬជាការជាប់ទោសនៅក្រៅឃុំ។ គឺទើបតែនៅពេលថ្មីៗនេះទេ ដែលភ្នាក់ងារស៊ើបការណ៍សម្ងាត់ចាប់ផ្តើមតាមដាន និងលបស្តាប់ ម៉ូសា គូលីបាលី ដោយសង្កេតឃើញមានអាកប្បកិរិយាជាអ៊ីស្លាមជ្រុលនិយម។
បាត់ដានឈឹងពីរ៉ាដានៅដើមឆ្នាំ ២០១៤ ស្រាប់តែនៅថ្ងៃទី២៧មករា២០១៥ ម៉ូសាគូលីបាលី បានលេចមុខជាថ្មីនៅខេត្តក័រ (កោះរបស់បារាំង) ចេញដំណើរទៅប្រទេសតួកគី ដោយទិញសំបុត្រយន្តហោះតែទៅ និងដោយឆ្លងកាត់ក្រុងជាច្រើន មុននឹងដល់ទិសដៅក្រុងអ៊ីស្តង់ប៊ូលរបស់តួកគី។ ជាហេតុធ្វើឱ្យភា្នក់ងារសង្ស័យថា ម៉ូសាគូលីបាលីទំនងជាចង់ធ្វើដំណើរបន្តទៅស៊ីរី ទើបបានទាក់ទងអាជ្ញាធរតួកគីអំពីវត្តមានរបស់ជនសង្ស័យនេះ។
ចាប់បញ្ជូនឱ្យត្រលប់មកក្រុងនីសវិញនៅថ្ងៃទី២៩មករា ប៉ូលិសបារាំងរង់ចាំទទួលជាសេ្រច ប៉ុន្តែដោយគ្មានឯកសារភស្តុតាងផ្លូវច្បាប់គ្រប់គ្រាន់ គូលីបាលី ក៏ត្រូវដោះលែងឱ្យមានសេរីភាព និងដាក់ឱ្យស្ថិតនៅក្រោមការតាមដាន។
មិនបានប៉ុន្មានថ្ងៃផង គូលីបាលីបានបញ្ចេញសកម្មភាពវាយប្រហារប្រឆាំងទាហាន ការពារនៅមុខសាលាសហគមន៍ជ្វីហ្វដែលជាផ្ទាំងស៊ីបប្រកបដោយនិមិត្តរូប។ ថ្វីបើរដ្ឋមន្ត្រីក្រសួងមហាផ្ទៃ ចៀសមិនប្រើពាក្យថា ភេរវកម្ម ដោយចាត់ទុកត្រឹមសកម្មភាពឧក្រិដ្ឋមែន ប៉ុន្តែក្រុមប៉ូលិសប្រឆាំងភេរវកម្មបានចាប់ផ្តើមបើកអង្កេតភ្លាម។ ការវាយប្រហារនេះបានធ្វើឱ្យគេនឹកគិតដល់ការវាយប្រហារចាក់ប៉ូលិសនឹងកាំបិតកាលពីថ្ងៃទី២០ធ្នូ។ ជនដៃដល់មានសញ្ញាផ្តាច់ខ្លួនជាអ៊ីស្លាមជ្រុលនិយម ហើយក្នុងថ្ងៃតែមួយនោះ អង្គការរដ្ឋអ៊ីស្លាមបានផ្សព្វផ្សាយវីដេអូ ប្រកូកប្រកាសឱ្យ “បំផ្ទុះប្រទេសបារាំង” ដោយប្រើកាំបិតសម្លាប់ប៉ូលិស ឬទាហាន បើមិនបានមកហ្វឹកហាត់ដល់ស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ