ទស្សនកិច្ចលោកប្រមុខការទូតអាមេរិកនៅរដ្ឋធានីអ៊ុយក្រែន
សាច់រឿងចម្បងនៃកិច្ចចរចា លោក រដ្ឋមន្ត្រីការបរទេស ស.រ.អា. John Kerry នៅក្រុងគៀវថ្ងៃទី៥កុម្ភៈនេះ ដូចដែលកាសែត The New York Times បានចុះផ្សាយ គឺជុំវិញបញ្ហា ដែលថា ក្រុងវ៉ាស៊ីនតោន អាចផ្តល់អាវុធមែនពិត ទៅបំពាក់កងទ័ពអ៊ុយក្រែន ដែលនាពេល ចុងក្រោយ ចេះតែរងទទួលបរាជ័យ លើសមរភូមិតំបន់បះបោរប៉ែកខាងកើតប្រទេស។ ប៉ុន្តែ សម្ព័ន្ធមិត្តរបស់អាមេរិក ដូចជាបារាំង អាល្លឺម៉ង់ បានប្រកាសថាគេសម្រេច មិនបញ្ជូនអាវុធទៅអ៊ុយក្រែនឡើយ ហេតុដែលតាមមតិពួកអ្នកវិភាគ គឺដើម្បីកុំបង្កជាលេស សម្រាប់ក្រុងម៉ូស្គូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ថ្លែងទៅពួកអ្នកាសែតនៅក្រុងវ៉ាស៊ីនតោន អ្នកនាំពាក្យផ្លូវការរបស់សេតវិមាន លោក Josh Earnest បានលំអិតថា ជាប្រតិកម្មនឹងដំណឹងទម្លាយចេញមក ដោយប្រព័ន្ធផ្សព្វផ្សាយ អំពីរឿងថាអាមេរិកអាចចាប់ផ្តើផ្តល់អាវុធដែលហៅថា”នាំមរណភាព” ទៅឲ្យក្រុងគៀវ ទាំងសេតវិមាន ទាំងក្រសួងការពារជាតិ រំពឹងខ្លាំងជាងគឺទៅលើការខំប្រឹងប្រឺងតាមផ្លូវការទូតក្នុងឋានៈជាមធ្យោបាយដោះស្រាយវិបត្តិនៅអ៊ុយក្រែន។
មន្ត្រីនេះនៃរដ្ឋបាលអាមេរិក គូសបញ្ជាក់ថា លោកប្រធានាធិបតីស.រ.អា. បារ៉ាក់ អូបាម៉ា ដូចមុនដដែល នៅតែបន្តប្រកាន់យកយុទ្ធសាស្ត្រ “បង្ខាំងរបបពូទីននៅរុស្ស៊ី ឲ្យនៅឯកោ តទៅទៀត លើឆាកអន្តរជាតិ “ លុះទាល់តែបង្ខំក្រុងម៉ូស្គូឲ្យផ្លាស់ប្តូរគោលជំហរខ្លួនចំពោះអ៊ុយក្រែន។
ចំណែកអ្នកនាំពាក្យក្រសួងការពារជាតិអាមេរិកលោកឧត្តមនាវីត្រី John Kirby ថ្លែងទៅពួកអ្នកកាសែត បានរំលឹកថា ស.រ.អា.កំពុងផ្តល់ទៅហើយនូវការគាំទ្រដល់អ៊ុយក្រែនដោយបញ្ជូនទៅ គឺអ្វីដែលហៅថា ជំនួយយោធា”មិននាំមរណភាព” ។ ព្រមជាមួយនេះ តំណាងមន្ទីរបញ្ចកោណក៏បង្ហើបឲ្យដឹងថា ក្រសួងគាត់នឹងពិនិត្យមើលសំណូមពររបស់រដ្ឋាភិបាលអ៊ុយក្រែន ដែលសុំទាំងជំនួយ“មិននាំមរណភាព” ទាំងជំនួយ “នាំមរណភាព”។
គួរនិយាយថា ក្នុងដំណាក់បច្ចុប្បន្នបារាំងគ្មានចេតនាផ្តល់អាវុធ“នាំមរណភាព” ទៅឲ្យ អ៊ុយក្រែនឡើយ។ សេចក្តីនេះ ថ្លែងថ្ងៃ៤កុម្ភៈ ដោយរដ្ឋមន្ត្រីការពារជាតិបារាំង លោក Jean-Yves Le Drian ក្នុងសន្និសីទកាសែត រួមជាមួយសមភាគីកាណាដា។ ឥរិយាបថបែបនេះក៏ ត្រូវបានសំដែងប៉ុន្មានថ្ងៃមុន ដោយលោកស្រីប្រមុខរដ្ឋាភិបាលអាល្លឺម៉ង់ Angela Merkel ក្នុងដំណើរទស្សនកិច្ចនៅប្រទេសហុងគ្រី។
ជាការកត់សម្គាល់ លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ៉្រូវ តែងគូសបញ្ជាក់ថា រុស្ស៊ី មិនមែនជាភាគីជាប់ក្នុងជម្លោះជាមួយអ៊ុយក្រែនឡើយ។ សង្គ្រាមនៅអ៊ុយក្រែន ជាជម្លោះផ្ទៃក្នុង សុទ្ធសាធរបស់ប្រទេសនេះ ហើយច្រកចេញតែមួយគត់ គឺឲ្យក្រុងគៀវ ធ្វើកិច្ចចរចារកសន្តិភាព ជាមួយ ភាគីបះបោរនៅតំបន់ខាងកើតអ៊ុយក្រែនទៅ។ រុស្ស៊ីត្រៀមចាត់ចែង កិច្ចចរចាបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ