លោកពូទីនអញ្ជើញទៅបំពេញទស្សនកិច្ច នៅអេហ្ស៊ីប ដើម្បីបង្កើនឥទ្ធិពលរុស្ស៊ី
លោកប្រធានាធិបតីរុស្ស៊ី វ្លាដេមៀ ពូទីន ត្រូវអញ្ជើញទៅដល់ក្រុងគែរ ប្រទេសអេហ្ស៊ីប នារសៀលថ្ងៃចន្ទទី ៩ កុម្ភៈ២០១៥។ កម្មវត្ថុនៃទស្សនកិច្ចផ្លូវរដ្ឋរយៈពេលពីរថ្ងៃនេះ គឺដើម្បីបង្កើនកិច្ចសហប្រតិបត្តិការសេដ្ឋកិច្ច ពាណិជ្ជកម្ម យោធា ជាមួយអេហ្ស៊ីប។ និយាយជារួមរុស្ស៊ីកំពុងឆ្លៀតចង់បង្កើនឥទ្ធិពលរបស់ខ្លួននៅអេហ្ស៊ីប ខណៈដែលប្រទេសអារ៉ាបដ៏ធំមួយនេះ កំពុងមានទំនាក់ទំនងមិនសូវរលូនជាមួយមហាមិត្តសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៩
នេះជាលើកទីមួយហើយ ដែលប្រធានាធិបតីរុស្ស៊ី ពូទីន អញ្ជើញទៅ បំពេញទស្សនកិច្ចនៅក្នុងក្រុងគែរ ជាថ្មី គិតចាប់ពីឆ្នាំ២០០៥មក (ឆ្នាំដែលអេហ្ស៊ីបមានលោក ម៉ូបារ៉ាក់ ជាអ្នកដឹកនាំប្រទេសនៅឡើយ)
នាឱកាសទស្សនកិច្ចពីរថ្ងៃនេះ ភាគីទាំងពីរនឹងពិភាក្សារួមគ្នា អំពីយន្តការចង់ដាក់ឱ្យដំណើរការកិច្ចព្រមព្រៀងដែលអេហ្ស៊ីបនិងរុស្ស៊ី ធ្លាប់បានជជែកគ្នាខ្លះរួចមកហើយ កាលពី ទស្សនកិច្ចរបស់ប្រធានាធិបតីអេហ្ស៊ីប ស៊ីស៊ី ( Abdel Fattah al-Sissi) នៅម៉ូស្គូ នាខែសីហាឆ្នាំ២០១៤ កន្លងទៅ។ កិច្ចសន្យាបង្កើតតំបន់ផ្តោះប្តូរពាណិជ្ជកម្មសេរី ក្នុងតំបន់ក្បែរព្រែកជីកSuez រវាងក្រុងគែរ និងម៉ូស្គូ តែបៀឡារុស្ស៊ី និងកាហ្សាក់ស្ថាន ចូលរួមដែរ ជាចំណែកមួយនៃគម្រោងកិច្ចព្រមព្រៀងនេះ។
ពង្រឹងទំនាក់ទំនងពាណិជ្ជកម្ម និងសេដ្ឋកិច្ច នឹងត្រូវបានប្រមុខដឹកនាំទាំងពីរគិតគូរជាពិសេស ហើយអាចនឹងមានការចុះហត្ថលេខាលើកិច្ចព្រមព្រៀងវិនិយោគមួយចំនួនផង។ កិច្ចសហប្រតិបត្តិការដើម្បីប្រយុទ្ធប្រឆាំងនឹងអំពើភេរវនិយមអន្តរជាតិ វិបត្តិនៅស៊ីរី អ៊ីរ៉ាក់ លីប៊ី ឬក៏ជម្លោះអ៊ីស្រាអែល ប៉ាឡេស្ទីនក៏មិនត្រូវបានមើលរំលងដែរ។
ការដឹកបញ្ជូនអាវុធរុស្ស៊ី ទៅឱ្យអេហ្ស៊ីប ដូចជាយន្តហោះចម្បាំង Mig 29 ប្រព័ន្ធខែលប្រឆាំងរថក្រោះKorent ឧទ្ធម្ភាគចក្រចម្បាំង ដែលបានប្រគល់ឱ្យមួយភាគទៅហើយកាលពីឆ្នាំ២០១៣ ក៏ជាប្រធានបទសំខាន់ក្នុងរបៀបវារៈនៃទស្សនកិច្ចនេះដែរ។ នេះបើតាមប្រភពអេហ្ស៊ីប។
អេហ្ស៊ីបជាមហាមិត្តរបស់សហរដ្ឋអាមេរិក ! មានប្រជាជនច្រើនគេ ក្នុងចំណោមបណ្តាប្រទេសអារ៉ាប តែក៏ជាប្រទេសដែលរុស្ស៊ី ចង់បង្កើនប្រយោជន៍ការទូត និងសេដ្ឋកិច្ចជាមួយដែរ។
អាមេរិករិះគន់ រុស្ស៊ីចូលស្និទ្ធនឹងអេហ្ស៊ីប
អេហ្ស៊ីបតាំងពីឆ្នាំ២០១១មក បានស្គាល់រលកបះបោរប្រជាជនធ្វើបដិវត្តទម្លាក់ប្រធានាធិបតីផ្តាច់ការ កាន់អំណាចម្នាក់ឯងជាង៣០ឆ្នាំ ម៉ូបារ៉ាក់។ ប្រមុខរដ្ឋថ្មី លោក ស៊ីស៊ី ជាអតីតមេទ័ព បានឡើងកាន់អំណាចដោយច្រានទម្លាក់និងចាប់ខ្លួនប្រធានាធិបតីប្រសូតចេញពីអ៊ីស្លាមនិយម នៅពាក់កណ្តាលឆ្នាំ២០១៣ ដឹកនាំប្រទេសផ្តាច់ការ និងគាបបង្ក្រាប ខ្លាំងជាសម័យម៉ូបារ៉ាក់ទៅទៀត។ បស្ចឹមលោក បានរិះគន់គ្រប់មាត់ អាមេរិកក៏បានប្រទេសម្ចាស់ជំនួយដ៏ធំរបស់អេហ្ស៊ីបក៏សម្រេចបង្កកជំនួយ និងទើបស្តារឡើងវិញមួយភាគនៅឆ្នាំ២០១៤ នៅពែលលោកស៊ីស៊ី បានជាប់ឆ្នោតជាប្រធានាធិបតី បន្ទាប់ពីបានកម្ចាត់បក្សនយោបាយប្រឆាំង ក្រុមអ៊ីស្លាមជ្រុលនិយម បក្សសេរីនិយម។
ឯរុស្ស៊ីវិញ មិនដែលខ្វល់នឹងបញ្ហាសិទ្ធិមនុស្ស ក៏បានលេចមុខលេចមាត់ខ្លាំង ក្លាយជាអ្នកគាំទ្ររបបដឹកនាំដោយយោធារបស់អេហ្ស៊ីប ដ៏សំខាន់បំផុត។ ជារដ្ឋមន្ត្រីក្រសួងការពារជាតិ បន្ទាប់មកជាប្រធានាធិបតីអេហ្ស៊ីប បានចុះឡើងទៅជួបប្រធានាធិបតីរុស្ស៊ីដល់ផ្ទះ ដើម្បីរកទិញសព្វាអាវុធពីរុស្ស៊ី។
ដូច្នេះ ក្នុងពេលដែលបស្ចឹមលោក មានជំហរមិនជាក់លាក់ ប្រទាញប្រទង់នយោបាយចំពោះតំបន់ដើមបូព៌ា គឺជាការធម្មតាតែលោកពូទីន ត្រូវឆក់ឱកាសនេះ បន្តរក្សាភាពល្អូកល្អើនជាមួយរដ្ឋាភិបាលអេហ្ស៊ីបនោះ។ ការរិះគន់ជាប់រហូតមក របស់អាមេរិកអំពីដំណើរថយក្រោយនៃលទ្ធិប្រជាធិបតេយ្យនៅអេហ្ស៊ីប ដូចជាបានបើកច្រកឱ្យម៉ូស្គូអាចជ្រៀតចូលបានយ៉ាងងាយទៅពង្រឹងឥទ្ធិពលរបស់ខ្លួននៅអេហ្ស៊ីប។ ម្យ៉ាងទៀត រុស្ស៊ីចេះផ្លុំភ្លើង បង្ហាញថាម៉ូស្គូកំពុងក្លាយជាតួអង្គមិនអាចខ្វះបានក្នុងវិបត្តិនៅតំបន់ដើមបូព៌ា និងកំពុងស្វែងរកសម្ព័ន្ធមិត្តដែលគ្មាននរណាក្រៅពីអេហ្ស៊ីបនេះឡើយ។
ឯចំណែកអេហ្ស៊ីបរបស់លោក ស៊ីស៊ី ក៏ត្រូវការរុស្ស៊ីដែរ។ អេហ្ស៊ីបមិនមែនប្រហែលលេងល្បែងក្រឡាប់ចាក់ប្តូរសម្ព័ន្ធមិត្តទេ តែអេហ្ស៊ីបអោបរុស្ស៊ី គឺក្នុងបំណងកុំឱ្យអាមេរិកអាចដាក់សម្ពាធលើអេហ្ស៊ីបខ្លាំងជ្រុលពេក។ អាមេរិក បានសុខចិត្តផ្តល់ជំនួយហិរញ្ញវត្ថុដល់អេហ្ស៊ីប តាំងពី៣៥ឆ្នាំមកដើម្បីជាថ្នូរនឹងសន្តិភាពអេហ្ស៊ីប-អ៊ីស្រាអែល។ ហើយរដ្ឋាភិបាលលោកស៊ីស៊ីក៏ត្រូវរ៉ូវជាមួយអ៊ីស្រាអែល ដូច្នេះគ្មានអ្វីដែលត្រូវខ្លាចសហរដ្ឋអាមេរិកទេ ល្បែងសម្ព័ន្ធភាពនេះមានផ្តល់តែប្រយោជន៍ដល់អេហ្ស៊ីប និងធ្វើឱ្យរុស្ស៊ីរីករាយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ