ម៉ូស្គូអំពាវនាវអន្តរជាតិ ឲ្យគិតគូរអំពី ”ទំនោរជាតិនិយមជ្រុល” នៅអ៊ុយក្រែន
សេចក្តីអំពាវនាវ ឲ្យសហគមន៍អន្តរជាតិចាត់វិធានការ នៅពីមុខការងើបមុខ នៃពួកជាតិនិយមជ្រុល នៅអ៊ុយក្រែន ត្រូវបានបន្លឺឡើងថ្ងៃ ២៦មីនា ដោយរដ្ឋមន្ត្រីការបរទេសរុស្ស៊ី លោក Serguei Lavrov ក្នុងសន្និសីទកាសែត នៅប្រទេសក្វាតេម៉ាឡា (Guatemala) ជាដំណាក់ចុងក្រោយនៃ ដំណើរទស្សនកិច្ចរបស់គាត់ នៅតាមទ្វីបអាមេរិកឡាទីន។ ប្រាកដណាស់ដែល ទស្សនកិច្ចនេះ តាំងគោលដៅ រឹតចំណងជាមួយបណ្តាប្រទេសតំបន់នេះ ដែលធ្លាប់ស្ថិតក្រោមឥទ្ធិពលស.រ.អា.ជាមហាអំណាច ដែលបានឆ្លងមហាសមុទ្រអាត្លង់ទិក មកពង្រឹងទីតាំងខ្លួន នៅអឺរ៉ុបនៅជាប់នឹងចង្កេះរុស្ស៊ីទៅហើយ។
ចុះផ្សាយនៅថ្ងៃ៖
ស្តាប់ - ០២:០៩
តាមប្រសាសន៍លោកប្រមុខការទូតរុស្ស៊ី ដែលថ្លែងក្នុងសន្និសីទកាសែតនោះ ៖ “ស្ថានការណ៍នៅអ៊ុយក្រែនគឺហួសហេតុ ដោយមកពីមនោសញ្ចេនាជាតិនិយមជ្រុល ស្រាប់តែ ពុះខ្ជោលបានដៃឡើងវិញ”។
លោក Serguei Lavrov បន្ថែមថា ៖ ម៉ូស្គូទាមទារឲ្យចាត់វិធានការខានមិនបាន ដើម្បីបញ្ចៀស កុំឲ្យអ៊ុយក្រែនប្រែក្លាយទៅ រដ្ឋជាតិនិយមមួយ ដែលមិនឆ្លើយស្របសោះឡើយនឹងបទដ្ឋាន ណាក៏ដោយរបស់សហភាពអឺរ៉ុប។ គួរនិយាយថា ពិតជាសហភាពអឺរ៉ុបនេះ ដែលអ៊ុយក្រែនខ្លួនឯង តែងថ្លែងក្តែងៗ ថាចង់ចូលជាសមាជិក។
ដោយឡែក លោករដ្ឋមន្ត្រីការបរទេសរុស្ស៊ី បានសំដែងអំណរគុណទៅកាន់បណ្តារដ្ឋអាមេរិក ឡាទីន ដែលមិនព្រមធ្លាក់ខ្លួន សាមគ្គីជាមួយទណ្ឌកម្មរបស់បស្ចិមលោកប្រឆាំងរុស្ស៊ី។
គឺនៅក្វាតេម៉ាឡាដែលថ្ងៃព្រហស្បត៍ទី២៦មីនា ប្រមុខការទូតរុស្ស៊ីបានបញ្ចប់ទស្សនកិច្ចខ្លួន តាមទ្វីបអាមេរិកឡាទីន ក្រោយពីគាត់បានទៅកាន់ប្រទេស គុយបា កូឡុំប៊ី នីការ៉ាហ្គេ។ ជាការកត់សម្គាល់ កូឡុំប៊ីតែងត្រូវគេចាត់ទុកជាដៃគូរបស់ស.រ.អា.ទេតើ។ ទោះយ៉ាងណាក្តី ក៏ក្នុងសេចក្តីថ្លែងការណ៍ បូកសរុបលទ្ធផលនៃកិច្ចចរចា ជាមួយសមភាគីរុស្ស៊ី រដ្ឋមន្ត្រីការបរទេស គុយបា កូឡុំប៊ី នី នីការ៉ាហ្កា ក្វាតេម៉ាឡាសុទ្ធតែគូសបញ្ជាក់ថា គោលជំហរប្រកាន់យក ដោយអាមេរិកឡាទីន និង រុស្ស៊ី ចំពោះបញ្ហាអន្តរជាតិ ឬមួយត្រូវគ្នាទាំងស្រុង ឬមួយស្រដៀងគ្នា ដោយចាត់ទុកជា ការមិនអាចទទួលយកបានឡើយ ៖
-ទណ្ឌកម្មប្រឆាំងគុយបា ក៏ ដូចជា ប្រឆាំងប្រទេសឯទៀត
-និង ការលូកដៃរបស់ ស.រ.អា.ជ្រៀតជ្រែកចូលកិច្ចការផ្ទៃក្នុង របស់វ៉េណេស៊ុយអេឡា។
តាមកាសែតក្រុងម៉ូស្គូ Kommersant លេខថ្ងៃនេះសរសេរ ៖ អាចចាត់ទុក ជាព្រឹត្តិការណ៍ ចម្បងនៃទស្សនកិច្ចគាត់នៅក្វាតេម៉ាឡា លោកប្រមុខការទូតរុស្ស៊ី Lavrov បានជួបចរចា ជាមួយសមភាគី នៃ៨ប្រទេស-សមាជិក “ប្រព័ន្ធសមាហរ័ណកម្មអាមេរិកកណ្តាល” គឺ ប្រទេស បេលី ហុងឌូរ៉ាស ក្វាតេម៉ាឡា សាធារណរដ្ឋដូមីនីក កូស្តារីកា នីការ៉ាហ្កា ប៉ាណាម៉ា សាលវ៉ាដរ ដោយ រុស្ស៊ីប្រាថ្នាក្លាយជាដៃគូរបស់ប្រព័ន្ធនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ