រុស្ស៊ីនៅតែបន្តរៀបចំខ្លួន សម្រាប់ទទួល ការប្រកួតបាល់ទាត់ពិភពលោក២០១៨
វិមានក្រេមឡាំងថ្ងៃពុធទី៣មិថុនា បានថ្លែងថា ទោះបី លោកប្រធានសហព័ន្ធ បាល់ទាត់ពិភពលោក “FIFA” Joseph Blatter បានប្រកាសលាចេញពីតំណែង ទាំងនាំឲ្យគេ ភ្ញាក់ផ្អើលក្តី ទោះបីមានលាន់ឮជាសេចក្តីអំពាវនាវ ឲ្យធ្វើពហិការទល់នឹង World Cup – 2018 នៅរុស្ស៊ីក្តី ក៏ រុស្ស៊ីក្នុងឋានៈជាម្ចាស់ផ្ទះដែលត្រូវទទួលការប្រកួតកីឡានេះ នៅតែបន្តធ្វើការ រៀបចំ គ្មានបង្អង់ដំណើរឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ថ្លែងទៅពួកអ្នកកាសែត នារសៀលម្សិលមិញ អ្នកនាំពាក្យផ្លូវការរបស់វិមានក្រេមឡាំង លោក ឌ្មីទ្រី ពេស្កូវ បានលើកឡើងជាអាទ៏ ៖ ការលាចេញពីតំណែងរបស់លោក Joseph Blatter បាននាំឲ្យរុស្ស៊ីងឿងឆ្ងល់ក្រៃ ប៉ុន្តែក្រុងម៉ូស្គូ នៅតែបន្តសហការជាមួយរូបគាត់ដដែល។ មកទល់ឥឡូវ រុស្ស៊ីនៅតែមិនដឹងនៅឡើយ តើអ្វីជាមូលហេតុនៃការលាចេញពីតំណែងនេះ។
ដោយហេតុថា លោក Blatter នៅបន្តបំពេញកាតព្វកិច្ចខ្លួន រហូតដល់ពេលបោះឆ្នោតថ្មី ដែលនឹងប្រព្រឹត្តទៅ លុះក្នុងចន្លោះពីខែធ្នូឆ្នាំនេះ ទៅខែមិនាឆ្នាំក្រោយ បានជារុស្ស៊ី នៅតែសហការ ដដែលជាមួយនឹងអង្គការ”FIFA” ។ ដូច្នេះ អ្វីជាចម្បង គឺថារុស្ស៊ី បន្តធ្វើការរៀបចំខ្លួនសម្រាប់ ទទួលការប្រកួតបាល់ទាត់រើសជើងឯកពិភពលោក ក្នុង៣ឆ្នាំទៀត ហៅថា World Cup -2018។
តបនឹងសំនួរ៖ តើអាជ្ញាធររុស្ស៊ី មិនព្រួយបារម្ភទេឫ ថា ប្រធានថ្មីរបស់”FIFA” អាចពិនិត្យសើរើ ឡើងវិញ ទីកន្លែងសម្រាប់ការប្រកួត World Cup -2018? តំណាងវិមានក្រេមឡាំងឆ្លើយថា ៖ យើងមិនដឹងឡើយ ថាតើនរណា ដែលនឹងជាប់ជាប្រធានថ្មីនោះ។ ប្រធានថ្មីនេះសោត មិនមែន លេចចេញមកស្អែក ឫខានស្អែកឡើយ ដូច្នេះ កុំអាលរត់ទៅមុនព្រឹត្តិការណ៍។
គួរនិយាយថា ថ្ងៃ៣មិថុនា តាំងពីមុនពេលលោក Blatter បានប្រកាសលាចេញពីតំណែងម៉្លេះ ស្រាប់តែមានដំណឹងថា សហភាពនៃសមាគមកីឡាបាល់ទាត់អឺរ៉ុប ហៅថា UEFA នឹងបើកធ្វើ កិច្ចប្រជុំ នៅថ្ងៃស្អែក ទី៥មិថុនា ដើម្បីពិនិត្យមើល បញ្ហាធ្វើពហិការទល់នឹង World Cup -2018 នៅរុស្ស៊ី ដែលស្ថិតនៅក្រោមការដឹកនាំរបស់ “FIFA” ហើយចាត់ចែង ជា ការប្រកួតបាល់ទាត់ ពិភពលោកផ្សេង ដើម្បីធ្វើឲ្យរុស្ស៊ីបាក់មុខ។
អំពីការពួតដៃគ្នាបង្កើតជាឧបសគ្គ រាំងរាកុំឲ្យ World Cup -2018 ប្រព្រឹត្តទៅកើតនៅរុស្ស៊ី គ្រប់តែស្ថានីយ៍ទូរទស្សន៍រដ្ឋរុស្ស៊ី បាននាំគ្នាបរិហារ ប្រតិបត្តិការវាតដោយស.រ.អា. ចាប់ ពួកមន្ត្រី FIFA តាមបទពុករលួយ។ លោកប្រធានាធិបតីរុស្ស៊ីពូទីន បានត្មិះតិះដៀល
ក្រុងវ៉ាស៊ីនតោន ដោយមិនញញើតមាត់ឡើយថា ជាទង្វើ បំពានលើបទដ្ឋានអន្តរជាតិតែម្តង ការដែលស.រ.អា. វាតសុពលភាពច្បាប់ខ្លួន ទៅអនុវត្តលើរដ្ឋដ៏ទៃ ឲ្យតែសម្រេចបាន នូវ គោលដៅយង់ឃ្នងរបស់ខ្លួន ប្រឆាំងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ