ក្រិក៖ ជិតដល់ថ្ងៃធ្វើប្រជាមតិ ក្រុម”ព្រម” និងក្រុម”មិនព្រម” មានកម្លាំងប្រហាក់ប្រហែលគ្នា
នៅសល់ពេលតែមួយថ្ងៃទៀតប៉ុណ្ណោះ ដែលប្រជាជនក្រិក ត្រូវធ្វើការបោះឆ្នោតប្រជាមតិ ថាតើត្រូវព្រមរឺមិនព្រម ទៅលើសំណើររបស់សហភាពអឺរ៉ុប ក្នុងការធ្វើកំណែទម្រង់រឹតត្បិត ជាថ្នូរនឹងប្រាក់ជំនួយ។ លោកនាយករដ្ឋមន្រ្តីក្រិក អាឡិចស៊ីស ស៊ីប្រា បានអំពាវនាវឲ្យប្រជាជនក្រិកនាំគ្នា បោះឆ្នោតបដិសេធ ព្រោះសម្រាប់លោក ក្រិកចង់នៅក្នុងរង្វង់គ្រួសារអឺរ៉ុប បន្តែនៅដោយមានកិត្តិយស និងភាពថ្លៃថ្នូរ មិនមែនដោយត្រូវរងការដាក់គំនៀបហិរញ្ញវត្ថុ ពីសហភាពអឺរ៉ុប នោះទេ។
ចុះផ្សាយនៅថ្ងៃ៖
ស្តាប់ - ០៣:០០
យប់ថ្ងៃសុក្រ នៅកណ្តាលក្រុងអាតែន ខាងមុខវិមានរដ្ឋសភា លោកនាយករដ្ឋមន្រ្តី អាឡិចស៊ីស ស៊ីប្រា បានធ្វើសន្ទរកថា ដែលមានអ្នកចូលរួមប្រមាណជា ២៥០០០នាក់។ អ្នកទាំងនោះ សុទ្ធសឹងតែជាក្រុមប្រជាជនដែលគាំទ្រ ការអំពាវនាវរបស់លោក នាយករដ្ឋមន្ត្រីក្រិក ថាត្រូវបោះឆ្នោត មិនព្រម ទទួលយកសំណើររបស់សហភាពអឺរ៉ុប។
ថ្លែងក្នុងសន្ទរកថា លោកនាយករដ្ឋមន្ត្រីក្រិក បានពោលថា ប្រជាជនក្រិកត្រូវតែជាម្ចាស់វាសនា លើប្រទេសជាតិខ្លួន។ ដូច្នេះការធ្វើប្រជាមតិ ថាព្រម រឺមិនព្រម គឺជាវិធីតែមួយគត់ ដោយផ្តល់ការសម្រេចចិត្ត ដោយផ្ទាល់ទៅឲ្យប្រជាពលរដ្ឋទាំងមូល ជាអ្នកសម្រេច។ លោកបន្តថា សម្រាប់លោក លោកសូមឲ្យប្រជាជននាំគ្នាបោះឆ្នោតបដិសេធ ព្រោះថាមិនមែនយើងមិនចង់នៅក្នុងរង្វង់គ្រួសារប្រទេសចាយលុយអឺរ៉ូទេ ប៉ុន្តែយើងមានកិត្តិយស និងភាពថ្លៃថ្នូររបស់យើងដែលត្រូវការពារ។ ដូច្នេះបើយើងទ្រាំនៅទាំងវេទនា យើងសុខចិត្តដើរចេញវាប្រសើរជាជាង។
នៅមិនឆ្ងាយពីនោះប៉ុន្មាន ក្រុមអ្នកទាមទារឲ្យបោះឆ្នោតព្រមទទួលយក គម្រោងរបស់អឺរ៉ុប ក៏មានចំនួនមិនតិចដែរ។ បើតាមអាជ្ញាធរ មានមនុស្សប្រមាណជា ២២០០០នាក់ បានមកឈរស្តាប់ ការប្រកូកប្រកាស របស់ក្រុមដែលយល់ព្រម នៅក្នុងទីលានពហុកីឡាដ្ឋាន ក្រុងអាតែន។ សម្រាប់ក្រុមអ្នកគាំទ្រ បើសិនជាសម្លេងបដិសេធ បានជោគជ័យនៅថ្ងៃអាទិត្យនេះ នោះក្រិកនឹងធ្លាក់ កប់ទៅក្នុងវិបត្តិ និងភាពចលាចល កាន់តែជ្រៅ។
យ៉ាងណាមិញ បើយោងតាមការស្ទាបស្ទង់មតិផ្លូវការរបស់វិទ្យាស្ថានពីរ ផ្សេងគ្នា បានបង្ហាញថា សម្លេងព្រម និង សម្លេងមិនព្រម មានកម្លាំងប្រហាក់ប្រហែលគ្នា។ ការស្ទាបស្ទង់មតិទីមួយ បង្ហាញថា សម្លេងព្រម មានចំនួន ៤៤,៨% ទល់នឹងសម្លេងមិនព្រម៤៣,៤%។ ចំណែកការស្ទាបស្ទង់របស់វិទ្យាស្ថានទីពីរ បានបង្ហាញថាសម្លេងមិនព្រម មានចំនួន ៤៣% ទល់នឹងសម្លេងព្រម ចំនួន ៤២,៥%។
សូមរំលឹកថា សហភាពអឺរ៉ុប បានដាក់កំហឹតនូវគម្រោងធ្វើកំណែទម្រង់ យ៉ាងតឹងរឹង ជាច្រើនចំណុច ទៅលើរដ្ឋាភិបាលក្រិក ជាថ្នូរនឹងប្រាក់កម្ចី ចំនួន ៧ពាន់លានអឺរ៉ូ ដែលក្រិកត្រូវការ ដើម្បីយកទៅសង មូលនិធិរូបិយវត្ថុអន្តរជាតិ។ ប៉ុន្តែសម្រាប់រដ្ឋាភិបាលលោក អាឡិចស៊ីស ស៊ីប្រា កំណែទម្រង់យ៉ាងតឹងរឹង ទាំងនោះនឹងច្របាច់ក ប្រជាជនក្រិក ដែលកំពុងតែក្រីក្រស្រាប់ទៅហើយ ឲ្យរឹតតែវេទនាថែមទៀត។ មិនត្រឹមតែប៉ុណ្ណោះ កម្ចីថ្មីនេះ នឹងពង្រីកជាកាប្រាក់បន្ថែម ធ្វើឲ្យក្រិកផុងខ្លួន កាន់តែជ្រៅ។ ចំណែក មូលនិធិរូបិយវត្ថុអន្តរជាតិ ដែលជាម្ចាស់បំណុល គឺអង្គុយចាំតែកើបកាប្រាក់ យ៉ាងស្រួលជាទីបំផុត។ អ្វីដែលលោក នាយករដ្ឋមន្ត្រីក្រិកបានទាមទារ គឺសុំឲ្យម្ចាស់បំណុល កាត់បន្ថយបំណុលចំនួន ៣០% ព្រមទាំងពន្យាពេលសងរហូតដល់២០ឆ្នាំទៀត។
ការធ្វើប្រជាមតិ នៅថ្ងៃអាទិត្យនេះ គឺការសម្រេចវាសនារបស់ក្រិក ថានឹងនៅ រឺក៏នឹងដើរចេញពីក្រុមប្រទេសចាយលុយអឺរ៉ូ។ ការនេះ បានពុះច្រៀកក្រិកចេញជាពីរ ដោយមានម្ខាង អ្នកគាំទ្រ ម្ខាងអ្នកមិនគាំទ្រ។ សម្រាប់អ្នកវិភាគមួយចំនួនយល់ថា ការធ្វើប្រជាមតិដ៏តក់ក្រហល់បែបនេះ វាមិនមែនជាការល្អនោះទេ ព្រោះប្រជាជន គ្មានពេលវេលាគ្រប់គ្រាន់ ដើម្បីពិចារណា ស្វែងយល់ពីផលវិបាក គុណសម្បត្តិ គុណវិបត្តិ នៃការសម្រេចចិត្តរបស់ខ្លួន ឲ្យបានសព្វគ្រប់ជ្រុងជ្រោយឡើយ។ ការសម្រេចចិត្តរបស់គេម្នាក់ៗ អាចធ្វើទៅតាមតែចិត្តឆេវឆាវ ខឹងមួយពេល រឺក៏ជឿតាមតែគ្នា ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ