ជនភៀសខ្លួនរាប់ពាន់នាក់សម្រុកចូលអឺរ៉ុប តាមប្រទេសម៉ាសេដ្វាន
ប្រទេសម៉ាសេដ្វាន ដែលមានព្រំដែនជាប់នឹង ភាគខាងជើងប្រទេសក្រិក កំពុងតែប្រឈមមុខយ៉ាងធ្ងន់ធ្ងរ ដោយសារជនភៀសខ្លួនរាប់ពាន់នាក់ ដែលភាគច្រើនជាជនជាតិស៊ីរី កំពុងសំរុកឆ្លងព្រំដែន ចូលទៅក្នុងទឺកដីខ្លួន ដើម្បីបន្តធ្វើដំណើរ ឡើងរថភ្លើង ឆ្ពោះទៅកាន់ប្រទេសនៅអ៊ឺរ៉ុបខាងលិច។ អាជ្ញាធរប្រទេសនេះ បានធ្វើការស្តីបន្ទោស ដល់អាជ្ញាធរក្រិក ថាមិនត្រឹមតែបណ្តែតបណ្តោយមិនការពារព្រំដែនហើយ ថែមទាំងមានរៀបចំសេវាដឹកជញ្ជូនជនភៀសខ្លួន មកដាក់ក្បែរនៅព្រំដែនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ទីក្រុង Gevgelija នៅក្បែរព្រំដែនរវាងម៉ាសេដ្វាន និងក្រិក កំពុងតែក្លាយជាទីតាំងប្រយុទ្ធតស៊ូ រវាងអាជ្ញាធរម៉ាសេដ្វាន និងក្រុមជនភៀសខ្លួនរាប់ពាន់នាក់ ដែលបានធ្វើដំណើរផ្សេងព្រេង ឆ្លងទូកមកដល់ក្រិក ហើយចង់បន្តដំណើរនេះទៅសុំសិទ្ធិជ្រកកោន នៅតាមបណ្តាប្រទេសអឺរ៉ុបភាគខាងលិច និងភាគខាងជើង។
អស់រយៈពេល៣ថ្ងៃមកហើយ ដែលអាជ្ញាធរម៉ាសេដ្វាន ព្យាយាមរារាំង ក្រុមជនភៀសខ្លួន ប្រមាណជា ជាង១៥០០នាក់ មិនឲ្យចូលទៅក្នុងទឹកដីម៉ាសេដ្វាន។ កាលពីថ្ងៃសៅរ៍ ទី២២ សីហា នគរបាលព្រំដែនម៉ាសេដ្វាន បានប្រើគ្រាប់បែកផ្សែងជាច្រើនគ្រាប់ ដើម្បីបំបែកក្រុមជនភៀសខ្លួន ដែលព្យាយាមរុញច្រានគ្នា ដណ្តើមឆ្លងព្រំដែន។ មានជនភៀសខ្លួន យ៉ាងហោចណាស់៤នាក់ បានរងរបួសផងដែរ។
ថ្វីបើមានការបដិសេធ ពីអាជ្ញាធរម៉ាសេដ្វាន ប៉ុន្តែក្រុមអ្នកស្ម័គ្រចិត្តគ្រូពេទ្យគ្មានព្រំដែន បានបញ្ជាក់ថា នរគរបាលព្រំដែនម៉ាសេដ្វាន បានប្រើកម្លាំងជ្រុលហួសហេតុ ដូចជា បាញ់គ្រាប់បែកផ្សែង បាញ់គ្រាប់កាំភ្លើងប្លាស្ទិក និងបានយកដំបងវាយទៅលើ ជនភៀសខ្លួន បណ្តាលឲ្យរបួសជាច្រើននាក់។ ទីបំផុតទៅ អាជ្ញាធរម៉ាសេដ្វាន បានអនុញ្ញាតឲ្យជនភៀសខ្លួនដែលងាយរងគ្រោះ ដូចជាគ្រួសារ ដែលមានកូនតូចៗ ជាច្រើនរយនាក់ ឆ្លងចូលទៅកាន់ក្រុង Gevgelija។
សូមបញ្ជាក់ថា ជាច្រើនសប្តាហ៍មកហើយ ដែលម៉ាសេដ្វានបន្ធូរបន្ថយ បណ្តោយឲ្យជនភៀសខ្លួន ឆ្លងកាត់តាមទឹកដីខ្លួន ប៉ុន្តែរយៈពេលចុងក្រោយនេះ ស្ថានភាពកាន់តែធ្ងន់ធ្ងរ។ ជនភៀសខ្លួនទាំងអស់ មានបំណងឡើងជិះរថភ្លើង នៅក្រុង Gevgelija ដើម្បីបន្តដំណើរទៅប្រទេសស៊ែប៊ី មុននឹងបន្តឆ្ពោះទៅប្រទេសសហភាពអឺរ៉ុប។ ការនេះបានធ្វើឲ្យជនភៀសខ្លួន ប្រវាយប្រតប់គ្នា ដណ្តើមគ្នាឡើងជិះរថភ្លើង យ៉ាងអាណាធិបតេយ្យ។
អ្នកនាំពាក្យក្រសួងមហាផ្ទៃម៉ាសេដ្វាន Ivo Kotevski បានបន្ទោសដល់អាជ្ញាធរក្រិក ថាមិនបានជួយការពារព្រំដែន ហើយមិនត្រឹមតែប៉ុណ្ណោះ ថែមទាំងបានដឹកជញ្ជូនជនភៀសខ្លូន មកដាក់ចោលក្បែរព្រំដែនម៉ាសេដ្វានទៀត។ យ៉ាងណាមិញ អាជ្ញាធរម៉ាសេដ្វាន ក៏បានធ្វើដូចគ្នាដែរ ដោយបានអំពាវនាវសុំជំនួយពីប្រទេសជិតខាង ដើម្បីបន្ថែមទូររថភ្លើង និងរថយន្តក្រុង ដើម្បីដឹកជញ្ជូនជនភៀសខ្លួន។
តំណាងឧត្តមក្រុមប្រឹក្សាទទូលបន្ទុកជនភៀសខ្លួន បានបញ្ជាក់ថា លោកបានទទួលការធានា ពី រដ្ឋមន្ត្រីការបរទេសម៉ាសេដ្វានថា ពីពេលនេះទៅ ម៉ាសេដ្វាន និងមិនបិទព្រំដែនទេ។ ជាតួលេខ ចាប់តាំងពីខែមិថុនាមក មានជនភៀសខ្លួន ប្រមាណជា ៤២០០០នាក់ ក្នុងនោះ មានកុមារ៤០០០នាក់ ដែលបានឆ្លង មកដល់ប្រទេសម៉ាសេដ្វាន។ ចំណែកក្រិកវិញ បានស្រង់ស្ថិតិថា គិតពីដើមឆ្នាំ២០១៥មក មានជនភៀសខ្លួនចំនួន ១សែន ៦ម៉ឺននាក់ ដែលឆ្លងមកដល់ប្រទេសខ្លួន។ ដោយឡែក នៅក្នុងសមុទ្រម៉េឌីទែរ៉ានេ ឯណោះ អាជ្ញាធរអ៊ីតាលី ទើបបានជួយសង្រ្គោះ ទូកដឹកជនភៀសខ្លួន យ៉ាងហោចណាស់ ៣០០០នាក់ ដែលហៀបនឹងលិចនៅក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ