ប៉ាគីស្ថាន បញ្ជូនជនភៀសខ្លួន តាមយន្តហោះត្រឡប់មកក្រិកវិញ
ក្រិកដែលបានបញ្ជូនយន្តហោះមួយ ដឹកជនភៀសខ្លួន ចំនួន ៤៩នាក់ ទៅកាន់ប្រទេសប៉ាគីស្ថាន ទើបតែត្រូវបានប្រទេសប៉ាគីស្ថាន រុញយន្តហោះត្រឡប់មកវិញ ជាមួយជនភៀសខ្លួន៣០នាក់ នៅថ្ងៃព្រហស្បតិ៍ម្សិលមិញ ដោយទទួលយកជនភៀសខ្លួនចំនួន តែ១៩នាក់ ប៉ុណ្ណោះ។ ប៉ាគីស្ថាន បានបញ្ជាក់ថា គ្មានអ្វីដែលអាចអះអាង ថាជនភៀសខ្លួនទាំងនោះ គឺជាជនជាតិប៉ាគីស្ថានទេ ហើយវាគឺជាតួនាទីរបស់អាជ្ញាធរក្រិក ដែលត្រូវត្រួតពិនិត្យឲ្យបានច្បាស់លាស់ មុននឹងបញ្ជូនមកកាន់ប្រទេសគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
គ្រាន់តែយន្តហោះបានចុះចតចំនួន៣ម៉ោង នៅទីក្រុងអ៊ីស្លាម៉ាបាត ប្រទេសប៉ាគីស្ថាន យន្តហោះនោះត្រូវបានអាជ្ញាធរប៉ាគីស្ថាន បញ្ជារឲ្យចេញដំណើរត្រលប់ទៅប្រទេសក្រិកវិញ។ ក្រិកបានបញ្ជូនយន្តហោះនោះ ដោយដឹកអ្នកដំណើរចំនួន ៤៩នាក់ ដែលក្រិកអះអាងថា ជាជនអន្តោប្រវេសន៍ប៉ាគីស្ថាន ហើយបានលួចឆ្លងចូលទៅក្រិក ដើម្បីសំដៅទៅសុំសិទ្ធិជ្រកកោន នៅបណ្តាប្រទេសអ្នកមាននៅអឺរ៉ុប។ បន្ទាប់ពីបានត្រួតពិនិត្យអ្នកដំណើរទាំង៤៩នាក់ អាជ្ញាធរប៉ាគីស្ថាន បានទទួលយកមនុស្សតែ១៩នាក់ប៉ុណ្ណោះ ឯចំណែក៣០នាក់ផ្សេងទៀត ត្រូវបញ្ជូនឲ្យឡើងយន្តហោះត្រឡប់មកក្រិកវិញ។ ប៉ាគីស្ថានបានអះអាងថា មនុស្សទាំងនោះ ពុំមានក្រដាសស្នាមអ្វីជាក់លាក់ បញ្ជាក់ថាពួកគេ ពិតជាជនជាតិប៉ាគីស្ថាននោះទេ។
សូមបញ្ជាក់ថា កាលពីដើមខែវិច្ឆិកា ប៉ាគីស្ថានធ្លាប់បានប្រកាសព្យួរទុកកិច្ចព្រមព្រៀងទទួលយកជនអន្តោប្រវេសន៍ប៉ាគីស្ថានត្រឡប់ពីអឺរ៉ុបទៅវិញ លើកលែងតែពីប្រទេសអង់គ្លេស។ ប៉ាគីស្ថានបានលើកមូលហេតុថា កន្លងមកពុំមានការត្រួតពិនិត្យ ឲ្យបានច្បាស់លាស់ បញ្ជាក់ថាជនអន្តោប្រវេសន៍ ពិតជាជនជាតិប៉ាគីស្ថានទេ។ ប៉ុន្តែបន្ទាប់ពីមានអន្តរាគមន៍របស់ភ្នាក់ងារសហភាពអឺរ៉ុបទទួលបន្ទុកកិច្ចការជនភៀសខ្លួន ទើបប៉ាគីស្ថាន យល់ព្រមអនុវត្ត កិច្ចព្រមព្រៀងឡើងវិញ កាលពី១០ថ្ងៃមុន។
យ៉ាងណាក៏ដោយ យន្តហោះដឹកជនអន្តោប្រវេសន៍នាពេលនេះ ត្រូវបានប៉ាគីស្ថានបរិហារថា មិនគោរពទៅតាមលក្ខខណ្ឌដែលមានចែង ក្នុងកិច្ចព្រមព្រៀង ដោយសារខាងសហភាពអឺរ៉ុប មិនបានបញ្ជូនលេខអត្តសញ្ញាណបណ្ណ។ ចំណែកខាងសហភាពអឺរ៉ុបបានបញ្ជាក់ថា លេខលិខិតឆ្លងដែនរបស់ជនអន្តោប្រវេសន៍ទាំង៤៩នាក់ ត្រូវបានអាជ្ញាធរក្រិកបញ្ជូនទៅឲ្យអាជ្ញាធរប៉ាគីស្ថាន តាំងពីមុនម្លេះ ហើយចំណែកលេខអត្តសញ្ញាណបណ្ណ គឺវាមិនមានចែងក្នុងកិច្ចព្រមព្រៀងថា ជាតួនាទីរបស់សហភាពអឺរ៉ុប ដែលត្រូវតែផ្តល់ឲ្យទេ។ លេខអត្តសញ្ញាណបណ្ណ គឺមានតែអាជ្ញាធរប៉ាគីស្ថានមួយគត់ ដែលអាចផ្តល់ជូនបាន។
ទាក់ទិន និងវិបត្តិជនភៀសខ្លួននេះដែរ នៅក្នុងសមុទ្រម៉េឌីទែរ៉ាណេ ខាងមុខប្រទេសលីប៊ី ក្រុមសង្រ្គោះសហភាពអឺរ៉ុប និងកងល្បាតដែនសមុទ្រអ៊ីតាលី ទើបបានជួយសង្រ្គោះជនភៀសខ្លួនចំនួន ១៥០០នាក់ កាលពីព្រឹកថ្ងៃព្រហស្បតិ៍ ដែលធ្វើដំណើរគជាន់លើគ្នា តាមទូកតូចៗ ចំនួន៧។ គួររំលឹកដែរថា បន្ទាប់ពីបានស្ងាត់មួយរយៈ ក្រុមឈ្មួញទុច្ចរិត បានចាប់ផ្តើមធ្វើសកម្មភាពដឹកជញ្ជូនជនភៀសខ្លួនឆ្លងសមុទ្រឡើងវិញ ដោយសារតែអាកាសធាតុអំណោយផល រលកសមុទ្រមិនសូវធំ។
ចំណែកនៅព្រំដែនរវាងក្រិក និងប្រទេសម៉ាសេដ្វាន់ឯនោះ ការប្រឈមមុខដាក់គ្នារវាងក្រុមជនអន្តោប្រវេសន៍ បានកើតឡើងកាន់តែខ្លាំង បន្ទាប់ពីមានជនអន្តោប្រវេសន៍ម្នាក់ ស្លាប់ដោយឆក់ចរន្តអគ្គីសនី នៅពេលដែលជននោះ ព្យាយាមឡើងទៅលើទូរថភ្លើង ចតនៅក្បែរព្រំដែន។ រីឯប្រទេសស្លូវ៉ាគី និងប្រទេសហុងគ្រី ទើបតែបានឲ្យដំណឹងថា គេបានដាក់ពាក្យបណ្តឹងរួចរាល់ហើយ ទៅកាន់តុលាការអឺរ៉ុប តវ៉ារឿងកំណត់កូតាចំនួនជនភៀសខ្លួន ដែល សហភាពអឺរ៉ុបបានចាប់បង្ខំប្រទេសពួកគេ ឲ្យទទួលយកជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ