ក្រុងហ្សឺណែវស្ថិតក្នុងភាពអាសន្នដើម្បីបង្ការភេរវកម្ម
ទីក្រុងហ្សឺណែវ របស់ប្រទេសស្វីស ត្រូវបានប្រកាសឲ្យស្ថិតនៅក្នុងភាពអាសន្ន ដោយមានការយាមកាមយ៉ាងតឹងរឹង ដើម្បីបង្ការ ខ្លាចក្រែងមានការវាយប្រហារភេរវកម្ម។ មនុស្សបួននាក់ដែលត្រូវគេសង្ស័យថា អាចជាកូនចៅ របស់ក្រុមជីហាដអង្គការរដ្ឋអ៊ីស្លាម កំពុងត្រូវបាននគរបាលស្វីស តាមប្រមាញ់ចាប់ យ៉ាងសកម្ម។ ក្រុងហ្សឺណែវ ដែលសំបូរទៅដោយ ទីតាំងរបស់ស្ថាប័នអន្តរជាតិធំៗ កំពុងស្ថិតនៅក្នុងគ្រោះថ្នាក់ ដោយសារតែក្រុមភេរវកម្មជីហាដអ៊ីស្លាម អាចធ្វើសកម្មភាព បានគ្រប់ពេលវេលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ការប្រកាសអាសន្ននៅក្រុងហ្សឺណែវ ត្រូវបានប្រកាសតាំងពីល្ងាចថ្ងៃពុធទី ៩ ធ្នូ ហើយបានបន្តរហូតមកដល់ថ្ងៃសុក្រនេះទៀត។ នៅមិនដល់មួយខែ បន្ទាប់ពី ភេរវកម្មដ៏សាហាវនៅទីក្រុងប៉ារីស និងបន្ទាប់ពីទីក្រុងព្រុយសែល បានប្រកាសភាពអាសន្នដែរ ពេលនេះ គឺដល់វេនទីក្រុងហ្សឺណែវរបស់ស្វីស ដែលជាទីក្រុងអន្តរជាតិ សំបូរទៅដោយ ទីស្នាក់ការរបស់ស្ថាប័នអន្តរជាតិធំៗ ដូចជាទីស្នាក់ការអង្គការសហប្រជាជាតិ អង្គការពាណិជ្ជកម្មពិភពលោក រឺអង្គការសុខភាពពិភពលោកជាដើម។
ការប្រកាសឲ្យស្ថិតនៅក្នុងភាពអាសន្ននេះ គឺធ្វើឡើងបន្ទាប់ពីនគរបាលស្វីល បានទទួលបញ្ជារ ឲ្យតាមចាប់មនុស្ស៤នាក់ ដែលត្រូវគេសង្ស័យថា ជាបក្សពួករបស់ចលនាជីហាដអ៊ីស្លាម ប្រចាំនៅហ្សឺណែវ និងដែលជាកូនចៅ របស់ក្រុមជីហាដអង្គការរដ្ឋអ៊ីស្លាម។ ដំណឹងនេះ ត្រូវបានផ្តល់ឲ្យដោយ ក្រុមនគរបាលសម្ងាត់អាមេរិក ហើយថា មិនមែនមានតែទីក្រុងហ្សឺណែវមួយទេ ដែលអាចត្រូវក្រុមជីហាដ វាយប្រហារ គឺនៅមានក្រុងតូរុងតូ ប្រទេសកាណាដា និងទីក្រុងឈីកាហ្គោផងដែរ។
សារព័ត៌មាន Le Matin ស្វីសបានបោះផ្សាយរូបថតមនុស្សប្រុស៤នាក់ ពុកមាត់ស្រម៉ូម ឈរក្បែរគ្នា ដោយយកម្រាមចង្អុលដៃ លើកឡើងទៅលើ ជាសញ្ញាថាពួកគេជាក្រុមជីហាដ បំរើឲ្យមនោគមន៍វិជ្ជា របស់ក្រុមអង្គការរដ្ឋអ៊ីស្លាម។ មនុស្សទាំងបួននេះ អាចនឹងកំពុងសំងំលាក់ខ្លួន ដើម្បីចេញធ្វើសកម្មភាពនៅក្នុងក្រុងហ្សឺណែវ ហើយបើយោងតាមនគរបាលស្វីស គឺមនុស្សទាំងបួននេះ មានអាវុធ និងគ្រាប់ផ្ទុះ ដ៏សន្ធឹកសន្ធាប់។
ក្រៅពីមនុស្ស៤នាក់ខាងលើ នគរបាលស្វីស កំពុងតាមចាប់មនុស្សពីរនាក់ ដែលធ្វើដំណើរជាមួយរថយន្តមួយ ពាក់ផ្លាកលេខចុះបញ្ជីរនៅប៊ែលហ្សិក។ មនុស្សម្នាក់ក្នុងចំណោម២នាក់នេះ ត្រូវនគរបាលបារាំងបញ្ជូនដំណឹងថា គឺជាបនភឿន របស់ជនឈ្មោះ Salah Abdeslam ដែលជាជនដៃដល់ ធ្វើភេរវកម្មនៅក្រុងប៉ារីស ហើយដែលនគរបាលបារាំង កំពុងតាមប្រមាញ់។ ប៉ុន្តែយ៉ាងណាក៏ដោយ គេមិនប្រកដថា មនុស្សពីរនាក់នេះ មានជាប់ពាក់ព័ន្ធ ជាមួយមនុស្ស៤នាក់ខាងលើទេ។
សូមបញ្ជាក់ថា ទីក្រុងហ្សឺណែវគឺជាបេះដូង នៃស្ថាប័នអន្តរជាតិកំពូលៗ។ ឆ្លើយតបនឹងការប្រកាសអាសន្ននេះ ទីស្នាក់ការអង្គការសហប្រជាជាតិ ត្រូវបានទាហានយាមយ៉ាងតឹងតែង ជាទីបំផុត។ មានបុគ្គលិកអន្តរជាតិរាប់ពាន់នាក់ បំរើការនៅក្នុងវិមានអង្គការសហប្រជាជាតិ។ ដោយឡែក ការប្រជុំស្តីពីដំណោះស្រាយសន្តិភាពនៅស៊ីរី រវាងអនុរដ្ឋមន្ត្រីអាមេរិក រុស្ស៊ី និងអ្នកតំណាងអង្គការសហប្រជាជាតិ ដែលត្រូវធ្វើឡើងនៅក្នុងវិមានអង្គការសហប្រជាជាតិ ត្រូវបានផ្លាស់ប្តូរ ទៅធ្វើនៅកន្លែងសម្ងាត់មួយទៀត ដើម្បីការពារសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ