ក្រុងប្រ៊ុយសែល ប្រកាសអាសន្ន ខ្លាចមានភេរវកម្ម
ជាងមួយសប្តាហ៍ ក្រោយហេតុការណ៍ភេរវកម្ម នៅក្រុងបារីស និងបន្ទាប់ពីមានការតាមប្រម៉ាញ់ ពួកបណ្តាញភេរវជនទាំងនៅបារាំង ទាំងនៅប៊ែលហ្សិក នៅថ្ងៃនេះ ទីក្រុងប្រ៊ុយសែល បានត្រូវប្រកាសឲ្យស្ថិតក្នុងភាពអាសន្ន ក្នុងកំរិតបន្ទាន់ ដើម្បីបង្ការ ក្រែងមានភេរវកម្ម។ ស្របពេលនេះដែរ កាលពីយប់ថ្ងៃសុក្រ ក្រុមប្រឹក្សាសន្តិសុខអង្គការសហប្រជាជាតិ ទើបបានអនុម័តលើសេចក្តីសម្រេចចិត្តមួយ ដែលមានខ្លឹមសារ បោសសម្អាតក្រុមជីហាដអង្គការរដ្ឋអ៊ីស្លាម ឲ្យវិនាស ដើម្បីស្ថាបនាសន្តិភាពពិភពលោកឡើងវិញ។ តួកគី ដែលមានព្រំដែនជាប់ស៊ីរី មានតួនាទីសំខាន់ណាស់ ក្នុងកិច្ចការនេះ ព្រោះតាមការស៊ើបអង្កេត តួកគីនេះហើយ ដែលជាច្រកចេញចូល ដោយសេរី របស់ពួកភេរវករជីហាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៣០
ទីក្រុងប៊្រុយសែល ត្រូវដាក់ឲ្យស្ថិតក្នុងភាពអាសន្ន៖
ខុសពីទីក្រុងប៉ារីស រដ្ឋធានីប្រទេសបារាំង ដែលជានិម្មិតរូបនៃសិទ្ធិសេរីភាព និម្មិតរូបនៃសេចក្តីស្នេហា ទីក្រុងប្រ៊ុយសែល រដ្ឋធានីប្រទេសប៊ែលហ្សិក គឺប្រៀបដូចជាស្នូលចំណុចកណ្តាល របស់ទ្វីបអឺរ៉ុប។ ក្រុងប្រ៊ុយសែលជានិម្មិតរូប នៃអំណាចរដ្ឋបាលរបស់សហភាពអឺរ៉ុបទាំងមូល ព្រោះទីនោះហើយ ដែលជាទីស្នាក់ការនៃស្ថាប័នកំពូលៗ របស់សហភាពអឺរ៉ុប។ ដូច្នេះ ទាំងនេះ គឺជាមូលហេតុ ដែលអាចធ្វើឲ្យក្រុងប្រ៊ុយសែល ក្លាយជាចំណី របស់ក្រុមភេរវករជីហាដអ៊ីស្លាម បន្ទាប់ពីទីក្រុងប៉ារីស។
អញ្ចឹងហើយ បានជានៅព្រឹកថ្ងៃ សៅរ៍ អាជ្ញាធរក្រុងប្រ៊ុយសែល ដោយមានការពិនិត្យពិចារណាយ៉ាងល្អិតល្អន់ ពីក្រុមស៊ើបអង្កេតពិសេស របស់ប៊ែលហ្សិក បានសម្រេចដាក់ទីក្រុងប្រ៊ុយសែល ក្នុងភាពអាសន្ន។ ភាពអាសន្ននេះ មានន័យយ៉ាងម៉េច? គឺថា ជាការបង្ការ ជាការត្រៀមលក្ខណៈ ឲ្យបានខ្ជាប់ខ្ជួន ខ្លាចក្រែង ក្រុមភេរវករធ្វើប្រតិបត្តិការណាមួយ។
ការប្រកាសភាពអាសន្ន គឺគេមានកម្រិតរបស់វា ដោយយោងទៅលើគ្រោះថ្នាក់ និងអាទិភាព ដែលទាំងអស់មាន៤កម្រិត។ សម្រាប់ប្រទេសប៊ែលហ្សិកទាំងមូល ក្រោយពីមានហេតុការណ៍បាញ់រះនៅ ប៉ារីស គឺគេបានប្រកាសភាពអាសន្នកម្រិតទីបី។ ប៉ុន្តែសម្រាប់ក្រុងប្រ៊ុយសែល នៅថ្ងៃនេះ បានតម្លើង ដល់កំរិតខ្ពស់បំផុត គឺកំរិតទី៤។ អាជ្ញាធរក្រុងប្រ៊ុយសែល បានបញ្ជារឲ្យបិទ ចរាចរណ៍រថភ្លើង ក្រោមដីទាំងស្រុង នៅក្នុងទីក្រុង។ ស្ថានីយ៍ទាំងអស់ ត្រូវបិទទ្វារ រហូតទាល់តែមានការសម្រេច ថ្មីទៀត។ បន្ថែមពីនេះ អាជ្ញាធរប៊ែលហ្សិក បានស្នើទៅដល់ សង្កាត់ទាំង១៩ នៃទីក្រុងប្រ៊ុយសែល ឲ្យបិទផ្អាក រាល់ការជួបជុំទាំងអស់ ឧទាហរណ៍ ដូចជាការប្រគុំតន្ត្រី ការប្រកួតកីឡាជាដើម ដើម្បីចៀសវាង មិនឲ្យមានមនុស្សមកកកកុញ ផ្តុំគ្នាច្រើន តែមួយកន្លែង។
ដូចដែលយើងបានតាមដាន ប៉ុន្មានថ្ងៃមកនេះ ពីសកម្មភាពតាមចាប់ក្រុមភេរវករ គឺយើងសង្កេតឃើញថា ក្រុងប្រ៊ុយសែល គឺជាជង្រុករបស់ក្រុមជីហាដអ៊ីស្លាម ដែលវាចេញចូល និងសំងំលាក់ខ្លួន។ ប៉ុន្មានម៉ោង មុននិងចេញសេចក្តីសម្រេចនេះ អាជ្ញាធរប៊ែលហ្សិក ទើបតែបានចាប់ជនសង្ស័យម្នាក់ទៀត នៅក្នុងក្រុងប្រ៊ុយសែល ហើយដែលជននេះ មានជាប់ពាក់ព័ន្ធនឹងបណ្តាញក្រុមជីហាដ ដែលបានធ្វើភេរវកម្ម នៅក្រុងប៉ារីស កាលពីសប្តាហ៍មុន។
តួកគី ច្រកចេញចូលដោយសេរី របស់ពួកជីហាដអ៊ីស្លាម៖
តួកគីគឺជាស្ពានឆ្លងរបស់ក្រុមជីហាដ អ៊ីស្លាម ដើម្បីចូលទៅស៊ីរី ហើយត្រឡប់ចូលមកអឺរ៉ុបវិញ ដើម្បីធ្វើភេរវកម្ម។ ដូចដែលយើងបានតាមដាន ការស៊ើបអង្កេត ស្តីពីបណ្តាញក្រុមភេរវកម្ម ដែលបង្ករការបាញ់ប្រហារនៅប៉ារីស យើងឃើញថា ពួកនេះ បានចេញចូលឆ្លងកាត់តួកគី មិនចេះតិចលើកទេ ហើយគ្មាននរណា ខ្វល់ខ្វាយតាមចាប់ទេ រហូតទាល់តែពួកនេះចេញធ្វើភេរវកម្ម ទើបនាំគ្នា បើកភ្នែកឡេងឡង់ៗ។
តាមព័ត៌មានដែលទើបទទួលបាន គឺខាងតួកគី បានចាប់ជនសង្ស័យម្នាក់ ឈ្មោះ អាម៉េដ ដាហម៉ានី អាយុ២៦ឆ្នាំ ជាជនជាតិ ប៊ែលហ្សិក ដើមកំណើត ម៉ារ៉ុក ។ តាមការសង្ស័យជននេះ ជាបក្សពួក របស់ក្រុមជីហាដ ដែលធ្វើភេរវកម្ម កាលពីថ្ងៃទី ១៣ វិច្ឆិកា នៅប៉ារីស។ នគរបាលតួកគី បានតាមដានជននេះ ពីព្រលានយន្តហោះ ហើយទៅចាប់ដល់កន្លែងស្នាក់នៅ នៅភាគខាងត្បូងតួកគី ក្បែរព្រំដែន ស៊ីរី។ បើតាមការសន្និដ្ឋាន ជននេះ កំពុងតែរងចាំមេខ្យល់ពីរនាក់ ដើម្បីជួយនាំឆ្លងចូលទៅខាងស៊ីរី។
ហេតុអី បានជាគ្មានការត្រួតពិនិត្យឲ្យបានតឹងតែង បណ្តោយឲ្យក្រុមជីហាដចេញចូលឆ្លងតាមតួកគី? ចម្លើយគឺថា វាស្មុគស្មាញបន្តិច តែបើនិយាយឲ្យងាយយល់គឺថា តួកគីដែលជាម្ចាស់ផ្ទះ គ្មានសមត្ថភាព រឺមួយក៏មាន តែគេមិនសូវចង់ធ្វើ។ យើងត្រូវយល់ជាបឋមថា អ្វីជាប្រយោជន៍តួកគី? តួកគី កន្លងមកគឺដេកគងថ្ងាសចំាឲ្យតែរបបបាស្ឆាអាល់ អាសាដរលំ ដើម្បីពង្រីកឥទ្ធិពលខ្លួនម្តង។ ដូច្នេះ មានប្រយោជន៍អ្វី ដែលតួកគី បិទផ្លូវ មិនឲ្យ ក្រុមយុវជនបរទេសឆ្លងចូលទៅបំរើក្រុមជីហាដអង្គការរដ្ឋអ៊ីស្លាម? ព្រោះថាក្រុមនេះហើយ ដែលកំពុងតែផ្តួលរំលំរបបបាស្ឆា អាល់អាសាដ។ ហើយចំណុចមួយទៀត គឺថា ក្រុមឧទ្ទាមគួដ នៅស៊ីរី ក៏នឹងថមថយកម្លាំងដែរ បើសិនជាក្រុមជីហាដឈ្នះ។
ក៏ប៉ុន្តែពេលនេះ ក្រុមជីហាដ មិនមែនឆ្លងទៅស៊ីរី ហើយ នៅទីនោះរហូតទេ គឺពួកគេ បកត្រឡប់មកវិញដើម្បីមកធ្វើភេរវកម្មនៅអឺរ៉ុប។ ស្រួលមិនស្រួល ភេរវកម្មកន្លងមក នៅក្រុងអ៊ីស្តង់ប៊ូល ក៏អាចជាស្នាដែរបស់ពួកនេះផង។ ហើយមួយវិញទៀត តួកគីកំពុងតែទទួលថ្មបាក់ ដោយសារតែកំហុសខ្លួនឯង ព្រោះថាជនភៀសខ្លួនស៊ីរី បានរត់មកនៅពេញតួកគី។ អញ្ចឹងហើយបានជាពេលនេះ លោកប្រធានាធិបតីតួកគី ដូចជាបត់ក្បាល មកសហការជាមួយអឺរ៉ុប ក្នុងការទប់ស្កាត់ការចេញចូលរបស់ក្រុមជីហាដ។
ព្រំដែនរវាងតួកគី និងស៊ីរី មានប្រហែល ៩០០គីឡូម៉ែត្រ។ តាមការឲ្យដឹងពីអ្នកនាំពាក្យរដ្ឋាភិបាលតួកគី គឺគេបានបិទជិតទាំងស្រុង បាន៧៥% ពោលគឺនៅសល់ចំនួន ៩៨គីឡូម៉ែត្រទៀត។ រដ្ឋមន្ត្រីការបរទេសតួកគី បានប្រកាសថា តួកគីមិនអនុញ្ញាតិ ឲ្យក្រុមជីហាដអង្គការរដ្ឋអ៊ីស្លាម យកទឹកដីខ្លួន ជាស្ពានឆ្លង ដើម្បីទៅសម្លាប់មនុស្សទេ។ គាត់បន្ថែមថា តួកគី នឹងធ្វើការរឹតបន្តឹង ការយាមកាមតាមព្រំដែន បើមិនជឿចាំតែមើលចុះ។ ឥឡូវយើងចាំមើល ថាតួកគីធ្វើបានប៉ុណ្ណា ព្រោះថានេះ មិនមែនជាលើកទីមួយទេ ដែលតួកគីប្រកាសរឹតបន្តិងព្រំដែនជាមួយស៊ីរី។
សេចក្តីសម្រេចចិត្តរបស់អង្គការសហប្រជាជាតិ ផ្តល់សន្ទុះថ្មីដល់ការបោសសម្អាតក្រុមជីហាដ៖
សេចក្តីសម្រេចចិត្ត ដែលក្រុមប្រឹក្សាសន្តិសុខ របស់អង្គការសហប្រជាជាតិ ទើបតែបានបោះឆ្នោតសម្រេច កាលពីល្ងាចថ្ងៃម្សិលមិញ គឺមានខ្លឹមសារអំពាវនាវ ឲ្យប្រជាជាតិទាំងអស់ រួមគ្នា កម្ទេចក្រុមជីហាដអង្គការរដ្ឋអ៊ីស្លាម ឲ្យវិនាស។ នេះជាលើកទីមួយហើយ ដែលក្រុមជីហាដអង្គការរដ្ឋអ៊ីស្លាម ក្លាយជាកម្មវត្ថុច្បាស់លាល់ នៃសេចក្តីសម្រេចចិត្តរបស់អង្គការសហប្រជាជាតិ។ ប៉ុន្តែយ៉ាងណាក៏ដោយ សេចក្តីសម្រេចចិត្តនេះ មិនបានធ្វើការបញ្ជាក់ទេ អំពីដំណើរការកសាងសន្តិភាពនៅស៊ីរី និងជាពិសេស អំពីវាសនាអំណាច របស់បាស្ឆា អាល់អាសាដ។
តាមពិត សេចក្តីសម្រេចចិត្តនេះជា ការស្នើសុំពីរ ដាច់ដោយឡែក មួយរបស់បារាំង មួយរបស់រុស្ស៊ី។ ជាគម្រោងដាច់ដោយឡែកពីគ្នា ក៏ប៉ុន្តែចំណុចរួមរវាងសំណើរុស្ស៊ី និងបារាំង គឺថា ត្រូវកសាងសម្ព័ន្ធមិត្តតែមួយ ដើម្បីធ្វើការប្រយុទ្ធកម្ទេចក្រុមជីហាដ។
ថ្មីត្បិតតែសេចក្តីសមេ្រចចិត្តនេះ គ្រាន់តែមានលើក្រដាស ដែលមានលក្ខណៈនយោបាយ ក៏ប៉ុន្តែវាបង្ហាញពីការសាមគ្គីភាពរបស់ពិភពលោកទាំងមូល ចំពោះមុខគ្រោះថ្នាក់ដែលបង្កឡើងដោយក្រុមជីហាដអង្គការរដ្ឋអ៊ីស្លាម។ ផលវិជ្ជមាន គឺមាន មានត្រង់ថា វារឹតតែផ្តល់ភាពស្របច្បាប់ ដល់ប្រតិបត្តិការទម្លាក់គ្រាប់ របស់អាមេរិក បារាំង រស្ស៊ី នៅស៊ិរី និងនៅអ៊ីរ៉ាក់។ ហើយបន្ថែមពីនេះ ប្រទេសមហាសេដ្ឋីអារ៉ាប់ធំៗ ដូចជាកាតា អារ៉ាប៊ីសាអ៊ូឌិត ដែលកន្លងមកឈរឱបដៃមើល នឹងត្រូវតែរអៀសខ្លួន ហើយចូលរួមជាមួយគេជាមួយឯង ក្នុងការកម្ទេចក្រុមជីហាដ ដ៏ព្រៃផ្សៃនេះ។ ដូចគ្នាដែរ លោកដាវីដ ខាមេរុន នឹងយកសេចក្តីសម្រេចចិត្តនេះ ទៅបង្ខំរដ្ឋសភាអង់គ្លេស ឲ្យយល់ព្រមបញ្ជូនទ័ព ទៅជួយអាមេរិក និងបារាំង។ តាមការគ្រោងទុក លោកដាវិដ ខាមឺរុន នាយករដ្ឋមន្ត្រីអង់គ្លេស នឹងជួបលោក ប្រធានាធិបតីបារាំង នៅថ្ងៃចន្ទ ដើម្បីនិយាយការសហការយោធា ជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ