ប្រែក្លាយក្រិកឲ្យទៅជាឃ្លាំងយក្ខសំរាប់ដាក់ជនអន្តោប្រវេស្តន៍ពុំមែនជាដំណោះស្រាយសមស្របទេ
នៅក្នុងវិបត្តិជនភៀសខ្លួននៅអឺរ៉ុប លោកស្រី Eva Cosse អ្នកជំនាញរបស់អង្គការការពារសិទ្ធមនុស្ស Human Rights Watch ទទួលបន្ទុកកិច្ចការក្រិកបានថ្លែងអះអាងថា”ប្រទេសក្រិកក៏មានភារៈកិច្ចទទួលខុសត្រូវមួយផ្នែកដែរនៅលើបញ្ហាជនអន្តោប្រវេស្តន៍ ក៏ប៉ុន្តែប្រែក្លាយក្រិកឲ្យទៅជាឃ្លាំងយក្ខស្តុកទុកជនអន្តោប្រវេស្តន៍ ពុំមែនជាដំណោះស្រាយសមហេតុសមផលឡើយ។
ចុះផ្សាយនៅថ្ងៃ៖
ស្តាប់ - ០២:២៥
សហភាពអឺរ៉ុប ទើបព្រមានក្រិកថា” ពីអំណេះទៅ បើក្រិកពុំពង្រឹងការត្រួតពិនិត្យលំហូរអន្តោប្រវេស្តន៍នៅតាមព្រំដែនខ្លួនជាមួយតួកគីឲ្យបានម័តធ្យ័តនោះទេ សហភាពអឺរ៉ុបនឹងចាត់វិធានការត្រួតពិនិត្យព្រំដែននៅក្នុងបណ្តាប្រទេសហត្ថលេខីនៃកិច្ចព្រមព្រៀង Schengen សំរាប់រយៈពេល២ឆ្នាំ។
រដ្ឋមន្ត្រីបែលហ្សិកមួយរូប បានបញ្ចេញយោបល់ដោយសុំឲ្យបង្កើតជំរំដ៏ធំមហិមាមួយនៅលើទឹកដីក្រិកនិងដែលអាចទទួលជនអន្តោប្រវេស្តន៍រហូតដល់៣០ម៉ឺននាក់ បន្តែប្រទេសហូឡង់បានទាមទារឲ្យក្រិកធ្វើការបញ្ជូនជាបន្ទាន់ពួកអន្តោប្រវេស្តន៍ដែលទើបចូលមកដល់ទឹកដីក្រិកនោះ ឲ្យត្រឡប់ទៅតួកគីវិញ ដើម្បីប្តូរជាមួយនឹងកិច្ចសន្យាទទួលយកជនភៀសខ្លួន២៥ម៉ឺននាក់នៅក្នុងទឹកដីអឺរ៉ុបដែលបច្ចុប្បន្នកំពុងសំចតនៅក្នុងទឹកដីតួកគី។
សំណើរនេះ ត្រូវបានលោកស្រី Eva Cosse អ្នកជំនាញរបស់ Human Rights Watch រិះគន់ទិះតៀន ថា “តួកគី ពុំអាចចាត់ទុកជាប្រទេសមួយប្រកបដោយសុវត្ថិភាពសំរាប់ការវិលត្រឡប់ដោយស្វ័យប្រវត្តិរបស់ជនអន្តោប្រវេស្តន៍នោះទេ”។
រីឯ ប្រទេសអឺរ៉ុបផ្សេងទៀត បានស្តីបន្ទោសទីក្រុងអាថែន ថាពុំបានធ្វើការចុះបញ្ជីនិងប្រមែប្រមូលស្នាមក្រយៅដៃរបស់ជនអន្តោប្រវេស្តន៍រាប់ពាន់នាក់ឲ្យបានត្រឹមត្រូវទេដែលទើបធ្វើដំណើរចូលទៅដល់ទឹកដីក្រិកជារៀងរាល់ថ្ងៃ។គ្រាន់តែក្នុងឆ្នាំ២០១៥ចំនួនជនអន្តោប្រវេស្តន៍ចូលក្នុងទឹកដីក្រិកមានចំនួនរហូតដល់ ៨៥ ម៉ឹននាក់ ។
លោកស្រី |Eva Cosse អ្នកជំនាញរបស់អង្គការការពារសិទ្ធមនុស្ស Human Rights Watch វិញ បានគូសបញ្ជាក់ថា រដ្ឋាភិបាលក្រិកនៅតែពុំទាន់ចាត់វិធានការបានល្អត្រឹមត្រូវទេនៅក្នុងការទទួលជនភៀសខ្លួន ជាអាទិ៍នៅលើបញ្ហា ស្រ្តីមានផ្ទៃពោះ កូនក្មេងៗ ដែលគ្មានអ្នកអមដំណើរ ឬក៏ជនពិការជាដើម។ មិនតែប៉ុណ្ណោះ បណ្តាជនដែលដាក់ពាក្យសុំសិទ្ធិជ្រកកោន ក៏ជួបប្រទះនឹងបញ្ហាពិបាកស្មុកស្មាញក្រែលែងទៀតផង។
អង្គការ Amnesty international វិញ បានត្អូញត្អែរអំពីស្ថានភាពដ៏យ៉ាប់យឺននៅ Idomeni ដែលជាតំបន់ព្រំដែនរវាងក្រិកនិងម៉ាសេដ៊ន។ នៅទីនោះ ជនអន្តោប្រវេស្តន៍ និងជនភៀសខ្លួនរាប់ពាន់នាក់ដែលប៉ុនប៉ងឆ្លងកាត់តំបន់ព្រំដែន នាំ គ្នាស្នាក់អាស្រ័យនៅពេលយប់លើទីកន្លែងស្ថានីយចាក់សាំងមួយ ដោយពួកគេត្រូវប្រឈមមុខនឹងស្ថានភាពអាកាសធាតុដ៏ត្រជាក់ខ្លាំងនិងដោយលំបាកទាំ្រទ្រជាកៃ្រលែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ