លោកអាឡិចស៊ីស ស៊ីប្រាសជាប់ឆ្នោតជានាយករដ្ឋមន្រ្តីក្រិកបន្តទៀត
នេះជាលើកទីបីហើយ ក្នុងពេលមួយឆ្នាំនេះ ដែលគណបក្សស៊ីរីហ្សា ដឹកនាំដោយ លោក អាឡិចស៊ីស ស៊ីប្រាស នាយករដ្ឋមន្ត្រីក្រិក បានទទួលជ័យជំនះក្នុងការបោះឆ្នោត។ លោកអាឡិចស៊ីស ស៊ីប្រាស បានរំលាយរដ្ឋាភិបាល កាលពីខែសីហា កន្លងទៅ ដើម្បីឲ្យប្រជាជនក្រិក បោះឆ្នោតសាជាថ្មីម្តងទៀត ថាតើពួកគេ ពិតជាចង់ឲ្យលោក និងគណបក្សលោក បន្តដឹកនាំក្រិក ទៀតឬយ៉ាងណា។ ជាការដឹកនាំមួយ ដែលមានបន្ទុកយ៉ាងលំបាកបំផុត ព្រោះរដ្ឋាភិបាលក្រិក ត្រូវធ្វើយ៉ាងណា ជ្រោងសេដ្ឋកិច្ច និងជីវភាពប្រជាជនក្រិក ឲ្យងើបឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
នៅវេលាម៉ោង ៨ល្ងាច ម៉ោងនៅក្រិក លោក អាឡិចស៊ីស ស៊ីប្រាស បានលេចមុខឡើង ក្នុងទឹកមុខញញឹម ដោយសារតែបានទទួលលទ្ធផលបណ្តោះអាសន្ន នៃការរាប់សន្លឹកឆ្នោត។ តាមលទ្ធផល ជាជំហានដំបូង នៃចំនួនសន្លឹកឆ្នោត ជាង៥៤% ដែលរាប់រួច បានបង្ហាញថា គណបក្សស៊ីរីហ្សា របស់លោក បានទទួលសម្លេង ៣៥,៥៤% ដែលស្មើនឹងអាសនៈចំនួន ១៤៥ ក្នុងចំណោមអាសនៈ៣០០ នៅសភាក្រិក។
ចំណែក គណបក្សស្តាំនិយមប្រជាធិតេយ្យថ្មី ដែលជាគូប្រជែង យ៉ាងប្រផិតប្រផើយ ជាមួយគណបក្សស៊ីរីហ្សា បានទទួលសម្លេង ២៨,១១% ស្មើនឹង ៧៥អាសនៈ។ ក្រៅពីនេះ នៅមានគណបក្ស ស្តាំនិយមជ្រុល ដែលបានសម្លេងឆ្នោត ៧,០៩% ស្មើនឹង១៩អាសនៈ គណបក្សសង្គមនិយម Pasok បានសម្លេង ៦,៤២% ស្មើនឹង ១៧កៅអី គណបក្សកុម្មុយនីស្ត KKE បានសម្លេង ៥,៤៨% ស្មើ១៥អាសនៈ គណបក្សកណ្តាលនិយម Potami បានសម្លេង ៣,៩៣% ស្មើនឹង១០កៅអី គណបក្សស្តាំនិយមឯករាជ្យ បានសម្លេង ៣,៦៨ ស្មើនឹង១០កៅអី ហើយជាចុងក្រោយ គឺគណបក្សសហព័ន្ធកណ្តាលនិយម បានសម្លេង ៣,៤៣% ដែលស្មើនឹង ១០កៅអីដែរ។
នេះជាជ័យជម្នះដ៏សំខាន់សម្រាប់គណបក្សស៊ីរីហ្សា (...) សម្រាប់ក្រិក (...) ហើយវាក៏មានសារៈសំខាន់ដែរសម្រាប់អឺរ៉ុប។
ប្រសាសន៍របស់លោកហ្វ្រង់ស័រ ហូឡង់ ប្រធានាធិបតីបារាំង
ទោះបីជាយ៉ាងណាក៏ដោយ យើងមិនអាចចាត់ទុកថានេះ គឺជាជោគជ័យ ដ៏ត្រចះត្រចង់ របស់លោក អាឡិចស៊ីស ស៊ីប្រាស បានទេ ព្រោះចំនួន ប្រជាជនដែលមិនបានមកបោះឆ្នោត មានប្រហែលជាជាង ៤០% ឯណោះ។ ប៉ុន្តែយ៉ាងណាក៏ដោយ ជ័យជំនះនេះ សបញ្ជាក់ថា ក្នុងចំណោមប្រជាជនក្រិក ភាគច្រើន គេនៅតែបន្តផ្តល់សេចក្តីទុកចិត្ត ជូនលោក ក្នុងការតស៊ូមតិ ជាមួយសហភាពអឺរ៉ុប ព្រមទាំងក្រុមម្ចាស់បំណុល ដើម្បីផ្តល់ក្តីសង្ឃឹមថ្មី ដល់សេដ្ឋកិច្ច និងប្រជាជនក្រិក ដែលរស់ក្នុងវិបត្តិ ជិត១០ឆ្នាំមកហើយ។
ថ្វីដ្បិតតែសម្លេងឆ្នោត ឈ្នះមិនគ្រប់គ្រាន់ ឲ្យលោក អាឡិចស៊ីស ស៊ីប្រាស ឈានទៅបង្កើតរដ្ឋាភិបាល តែម្នាក់ឯងក៏ដោយ ក៏សម្លេងឆ្នោតនេះ អាចធ្វើ ឲ្យគណបក្សលោក ចាប់ដៃជាមួយគណបក្សណាមួយ ដើម្បីបានទទួលសម្លេងភាគច្រើន ក្នុងសភា ព្រមទាំងអាចបង្កើតរដ្ឋាភិបាលចម្រុះមួយ។ តាមការប៉ាន់ស្មាន លោក អាឡិចស៊ីស ស៊ីប្រាស ប្រហែលជាអាចចាប់ដៃ ជាមួយគណបក្សស្តាំនិយមឯករាជ្យ ដែលលោកធ្លាប់ បានចាប់ដៃបង្កើតរដ្ឋាភិបាលចម្រុះរួចម្តងទៅហើយ កាលពីអាណត្តិមុន។ ដូចនេះ សម្ព័ន្ធភាពថ្មីនេះ អាចនឹងធ្វើឲ្យលោក បានអាសនៈសរុប ១៥៥ ដែលជាសម្លេងភាគច្រើនដាច់ខាត ក្នុងសភាថ្មី។ ប៉ុន្តែចំនួននេះ វានៅមានលក្ខណផុយស្រួយណាស់ ពោលគឺ វាលើសតែ៤កៅអីប៉ុណ្ណោះ ពីចំនួនកំណត់។ ដូច្នេះ គេមិនទាន់ប្រាកដទេថា រដ្ឋាភិបាលក្រិកថ្មី ជារដ្ឋាភិបាលចម្រុះ រវាងតែពីរគណបក្ស ឬអាចច្រើនជាងនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ