បារំាង-ក្រិក៖ប៉ារីសសន្យាជួយអាថែនឲ្យសម្រេចគម្រោងកំណែទម្រង់
លោកប្រធានាធិបតីបារំាងហ្រ្វង់ស័រ ហូឡង់បានបញ្ចប់ទស្សនកិច្ចរយៈពេល ២ថ្ងៃនៅក្នុងប្រទេសក្រិក។ នៅថ្ងៃសុក្រ ទី២៣ តុលាដែលជាថ្ងៃទី២ និងថ្ងៃចុងក្រោយនៃទស្សនកិច្ច លោកហូឡង់ និងលោកនាយករដ្ឋមន្រ្តីក្រិកអាឡិចស៊ី ស៊ីប្រាសបានចុះហត្ថលេខាលើសេចក្តីថ្លែងការណ៍មួយស្តីពី « ដៃគូយុទ្ធសាស្រ្តដើម្បីអនាគត »។ នៅក្នុង « ដៃគូយុទ្ធសាស្រ្តដើម្បីអនាគត » ទីក្រុងប៉ារីសបានសន្យាជួយទីក្រុងអាថែនឲ្យសម្រេចបាននូវគម្រោងកំណែទម្រង់មួយចំនួនរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៤០
គឺនៅក្រោយជំនួបរវាងលោកប្រធានាធិបតីបារំាងហ្រ្វង់ស័រ ហូឡង់ និងលោកនាយករដ្ឋមន្រ្តីក្រិកអាឡិចស៊ី ស៊ីប្រាសដែលប៉ារីស និងអាថែនបានឯកភាពគ្នាក្នុងការបង្កើតឲ្យមានគណៈកម្មាធិការចម្រុះបារំាង ក្រិកមួយ។ គណៈកម្មាធិការនេះនឹងអនុញ្ញាតឲ្យមានកិច្ចសហប្រតិបត្តិការនៅលើវិស័យអាទិភាពមួយចំនួនរវាងប៉ារីស និងអាថែន ដូចយ៉ាងជួយធ្វើឲ្យទំនើបកម្មផ្នែករដ្ឋបាលក្រិក ការអភិវឌ្ឍន៍នៃការដោះដូរសេដ្ឋកិច្ច និងវិនិយោគ ព្រមទំាងកិច្ចសហប្រតិបត្តិការនៅក្នុងវិស័យអប់រំ ភាសា និងសកលវិទ្យាល័យជាដើម។ លោកហូឡង់បានបញ្ជាក់ថា បារំាងនៅតែបន្តស្ថិតក្បែរក្រិក និងបន្តជួយក្រិកជានិច្ច។
គួរជម្រាបជូនថាកាលពីខែកក្កដាកន្លងទៅ គឺបារំាងជាអ្នកដែលបានជួយរដ្ឋាភិបាលក្រិករបស់លោកអាឡិចស៊ី ស៊ីប្រាសឲ្យងើបផុតពីវិបត្តិដែលក្រិកមានជាមួយដៃគូអឺរ៉ុប។ កាលណោះ ក្រិកបានទទួលការគំរាមកំហែងពីការដកខ្លួនចេញពីតំបន់ចាយប្រាក់អឺរ៉ូ។ តែទីបំផុតក្នុងថ្ងៃទី១៣ កក្កដា ទីក្រុងអាថែនបានយល់ព្រមចុះហត្ថលេខាលើកិច្ចព្រមព្រៀងមួយដែលក្រិកយល់ព្រមទទួលប្រាក់កម្ចីថ្មីរបស់អន្តរជាតិជាថ្នូរនឹងការបន្តអនុវត្តន៍នយោបាយត្បិតត្បៀត។ លោកហូឡង់បានបន្ថែមថា ថ្នាក់ដឹកនំាក្រិកចង់ឲ្យគម្រោងកំណែទម្រង់របស់ខ្លួនទទួលបានជោគជ័យ តែក្រិកមិនអាចធ្វើតែម្នាក់ឯងដោយគ្មានការជួយពីដៃគូអឺរ៉ុបបានឡើយ។
ជាការឆ្លើយតបវិញ លោកនាយករដ្ឋមន្រ្តីក្រិកអាឡិចស៊ី ស៊ីប្រាសបានចាត់ទុកទស្សនកិច្ចរបស់លោកហូឡង់ថា មានសារៈសំខាន់ខ្លំាងណាស់ ព្រោះវាបានធ្វើឡើងចំពេលដែលសហភាពអឺរ៉ុបកំពុងស្ថិតលើកំណាត់ផ្លូវមួយនៃការវិលទៅរកតម្លៃពិតរបស់អឺរ៉ុប។ ទស្សនកិច្ចរបស់លោកហូឡង់បានបិទបញ្ចប់តាមរយៈសុន្ទរកថារបស់លោកនៅរដ្ឋសភានារសៀលថ្ងៃសុក្រ ទី២៣ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ