ហេតុអ្វីបានជាប្រមុខរដ្ឋប្រទេសធំៗសម្រុកនាំគ្នាទៅធ្វើទស្សនកិច្ចនៅអាហ្សង់ទីន ?
អមដំណើរដោយថៅកែក្រុមហ៊ុនជាង៣០រូប និងកីឡាករបាល់ទាត់ផង លោក ហ្វ្រង់ស័រ ហូឡង់ ប្រធានាធិបតីបារាំង បានអញ្ជើញទៅដល់ប្រទេសអាហ្សង់ទីនហើយនៅថ្ងៃពុធនេះ ដើម្បីបំពេញទស្សនកិច្ចផ្លូវរដ្ឋ។ អាហ្សង់ទីនដែលទើបមានប្រធានាធិបតីថ្មី មាននយោបាយសេដ្ឋកិច្ចថ្មី ដែលមានន័យស្មើនឹងការបើកឱកាសថ្មីឱ្យពិភពលោក។
ចុះផ្សាយនៅថ្ងៃ៖
ស្តាប់ - ០៥:៣៧
លោកហ្វ្រង់ស័រ ហូឡង់ គឺជាប្រធានាធិបតីប្រទេសបស្ចឹមលោក ទីមួយដែលអាហ្សង់ទីន លាកម្រាលព្រំទទួលស្វាគមន៍ ជាទស្សនកិច្ចផ្លូវរដ្ឋ ដោយប្រធានាធិបតីអាហ្សង់ទីនលោក ម៉ូរីស្យូ ម៉ាគ្រី ដែលទើបជាប់ឆ្នោតថ្មីៗ កាលពីពីរខែមុន។
ទស្សនកិច្ចនៅអាហ្សង់ទីននេះ ជាដំណាក់កាលទីពីរ នៃដំណើរទស្សនកិច្ចមួយជុំធំ នៅទ្វីបអាមេរិកខាងត្បូងរបស់លោកហ្វ្រង់ស័រ ហូឡង់។ ម្សិលមិញ លោកបានអញ្ជើញទៅ ប្រទេសប៉េរ៉ូ ដើម្បីអរគុណក្រុងលីម៉ា ដែលបានជួយជ្រោមជ្រែងឱ្យសម្រេចកិច្ចព្រមព្រៀងស្តីពីអាកាសធាតុ។ ហើយនៅថ្ងៃស្អែក លោកនឹងបន្តទស្សនកិច្ចនៅប្រទេសអ៊ុយរ៉ាហ្កាយ។
នៅក្នុងអាណត្តិជាប្រធានាធិបតីនេះ លោកហ្វ្រង់ស័រហូឡង់ បានអញ្ជើញទៅរួចហើយប្រទេសប្រេស៊ីល ម៉ិចស៊ិក គុយប៉ា និងថ្ងៃនេះនៅអាហ្សង់ទីន។ លោកប្រធានាធីបតី ចង់ភ្ជាប់ទំនាក់ទំនងជាមួយតំបន់នេះ ឱ្យមានសណ្តាប់ធ្នាប់ឡើងវិញ ព្រោះបារាំងច្រើនភ្លេចភូមិភាគនេះ។ គេត្រូវសើរើដល់១៩ឆ្នាំមុនទើបឃើញមានប្រធានាធិបតីបារាំងមកអាហ្សង់ទីន។
អាហ្សង់ទីន គឺជាប្រទេសដែលមានកម្លាំងសេដ្ឋកិច្ចលំដាប់ទីបី ប្រចាំអាមេរិកឡាទីន និងមានសម្បូរធនធានធម្មជាតិច្រើន ទើបលោកហ្វ្រង់ស័រហូឡង់ ចង់សាកល្បងជួយផ្តល់កម្លាំងប៉ូវបន្ថែមដល់ក្រុមហ៊ុនបារាំងជាច្រើនដែលតាំងទីរកស៊ីនៅអាហ្សង់ទីនរួចហើយ និងសម្រួលឱ្យក្រុមហ៊ុនថ្មីអាចមកឈរជើងរកស៊ីបាន។ ជាសរុបមានក្រុមហ៊ុនបារាំង ប្រមាណ២៣០ រកស៊ីនៅទីនេះ និងមានសលផលពាណិជ្ជកម្មដល់ទៅជាងមួយពាន់លានអឺរ៉ូនៅឆ្នាំ២០១៥កន្លងមកនេះ។
ប៉ុន្តែនៅក្នុងអំឡុងពេលទស្សនកិច្ចនេះ នឹងគ្មានទេ ការប្រកាសចុះហត្ថលេខាពាណិជ្ជកម្មធំៗឡើយ គឺមានតែការចុះកិច្ចសហប្រតិបត្តិការពង្រឹងចំណងលើវិស័យផ្សេងៗ ដូចជាវិទ្យាសាស្ត្រ អវកាស ឧត្តមសិក្សានិងវប្បធម៌។
អាហ្សង់ទីនជាប្រទេសមួយដែលមានបណ្តាញសម្ព័ន្ធភាពបារាំងធំជាងគេ ហេតុដូច្នេះហើយបានជាប្រធានាធិបតីអាហ្សង់ទីនចង់ប្រើឱកាសនេះដើម្បីពង្រឹងទំនាក់ទំនងជាប្រវត្តិសាស្ត្រជាមួយបារាំង។
ទិសដៅទស្សនកិច្ចដ៏ពេញនិយម
ប្រមុខរដ្ឋាភិបាលអ៊ីតាលី បាននាំមុខលោកហ្វ្រង់ស័រ ហូឡង់ទៅទៀត ! លោក ម៉ាតេអូ រេនហ្ស៊ី បានអញ្ជើញទៅអាហ្សង់ទីន កាលពីសប្តាហ៍មុន តែមិនសូវមានអ្នកនិយាយ ព្រោះមិនមែនជាទស្សនកិច្ចផ្លូវរដ្ឋ។ ឯលោក បារ៉ាក់ អូបាម៉ា ប្រធានាធិបតីអាមេរិក នឹងត្រូវអញ្ជើញមកដល់ក្រុងប៊ុយណូហ្សែរ នៅរវាងមួយខែទៀតខាងមុខ។
វ៉ាស៊ីនតោនក៏ត្រូវការបញ្ជាក់វត្តមានអាមេរិក លើតំបន់ភូមិភាគអាមេរិកខាងត្បូង ប្រជែងជាមួយបារាំងដែរ បន្ទាប់បែរខ្នងដាក់អស់រយៈពេលពេញទសវត្សរ៍មក។ ដំណើរមកដល់របស់លោកអូបាម៉ា ដែលបង្កបង្កើតឱ្យមានពាក្យអាស្រូវរអេចរអូចទៅហើយ ព្រោះលោកបានជ្រើសរើសចំថ្ងៃខួប ៤០ឆ្នាំ នៃការធ្វើរដ្ឋប្រហារយោធា ទម្លាក់រដ្ឋាភិបាល។ ហើយរដ្ឋប្រហារឆ្នាំ១៩៧៦នោះបានទទួលការគាំទ្រយ៉ាងពេញទំហឹងពីសហរដ្ឋអាមេរិក ដែលបន្ទាប់មកបានរុញច្រានអាហ្សង់ទីនឱ្យធ្លាក់ក្នុងរបបដឹកនាំយោធាផ្តាច់ការអស់ជាច្រើនឆ្នាំ និងបន្សល់ទុកនូវស្នាមរបួស ព្រមទាំងការបែកបាក់ បាត់បង់ជីវិតមនុស្សអស់ច្រើនរកមិនឃើញ ទល់សព្វថ្ងៃ។ លោកហ្វ្រង់ស័រហូឡង់ក៏បានទៅគោរពវិញ្ញាណក្ខន្ធ ជនរងគ្រោះជាង១ម៉ឺននាក់ ក្នុងនោះ២២នាក់ជាបារាំង។
អាហ្សង់ទីន ទើបមានប្រធានាធិបតីថ្មី ដែលជាអ្នកស្តាំកណ្តាលនិយម បានន័យថាជាអ្នកនិយមទីផ្សារសេរី។ ដូច្នេះអ្វីៗក៏ត្រូវតែប្តូរផ្លាស់ដែរ។ ជាមួយរដ្ឋាភិបាលថ្មី ការត្រូតពិនិត្យទីផ្សាររូបិយបណ្ណ ត្រូវលុបចោល សហគាសបរទេសអាចនាំភាគចំណេញរបស់ខ្លួនទៅប្រទេសដើមបាន។
ដើម្បីទាក់ទាញវិនិយោគទុនបរទេស ប្រធានាធិបតីអាហ្សង់ទីនថ្មី លោក ម៉ាគ្រី ដែលជាកូនកាត់អ៊ីតាលី រកស៊ីមានបាននៅអាហ្សង់ទីន បានលើកចេញនូវរាលបម្រាមពាក់ព័ន្ធនឹងការនាំចូល បន្ធូរបន្ថយពន្ធលើឧស្សាហកម្ម កសិកម្ម និងការរុករ៉ែ។ ដោយសារតែនយោបាយបើកចំហទីផ្សារទៅរកអន្តរជាតិនេះហើយ ទើបប្រមុខមុខរដ្ឋ-រដ្ឋាភិបាលបរទេសជាបន្តបន្ទាប់ផ្តើមធ្វើដំណើរមកអាហ្សង់ទីន ដើម្បីជាការបើកផ្លូវឱ្យក្រុមហ៊ុនសហគ្រាសរបស់ខ្លួនមកវិនិយោគក្នុងប្រទេសនេះ។
សូមបញ្ជាក់ថា អាហ្សង់ទីន បានជួបគ្រោះក្ស័យធន តាំងពីឆ្នាំ២០០១មក ដែលជាឧបសគ្គបិទខ្ទប់ប្រទេសនេះ មិនឱ្យចូលក្នុងទីផ្សារហិរញ្ញវត្ថុអន្តរជាតិបានទេ។ នយោបាយដឹកនាំដោយការត្រួតត្រាយ៉ាងតឹងរឹង ការពារប្រយោជន៍សេដ្ឋកិច្ចជាតិជ្រុលហួសហេតុ របស់ប្រធានាធិបតីមុនៗបានធ្វើឱ្យសេដ្ឋកិច្ចអាហ្សង់ទីនថប់ដង្ហើមខ្លាំងវិះស្លាប់។
ប្រធានាធិបតីអាហ្សង់ទីនថ្មី បានសម្រេចភ្ជាប់ខ្លួនឡើងវិញជាមួយពិភពលោក បើកទម្លាយ ដាក់ប្រព័ន្ធមានតម្លាភាព ប៉ុន្តែការប្តូរផ្លាស់នេះអាចនឹងធ្វើឱ្យសង្គមមានសម្ពាធបន្តិចហើយ ជាក់ស្តែងបាតុកម្មមួយបានរៀបចំឡើងចំថ្ងៃមកដល់របស់លោកហ្វ្រង់ស័រ ហូឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ