រុស្ស៊ីបានសម្ពោធព្រលានអវកាសថ្មី Vostotchny
នៅវេលាម៉ោង ៥និង១នាទីព្រឹកមិញម៉ោងម៉ូស្គូ កាំជ្រួចរុស្ស៊ី ធុន Soyuz បញ្ឈរ ដល់កំពស់ ៥១ម៉ែត្រ ទម្ងន់ដល់ ៣១៣ តោន បានត្រូវបង្ហោះចេញ ពីព្រលានអវកាសថ្មី របស់ រុស្ស៊ី ឈ្មោះ Vostotchny ប្រែមកថា បូព៌ា ស្ថិតនៅចម្ងាយជាង ៧.០០០គ.ម. ខាងកើតពី រដ្ឋធានី ម៉ូស្គូ ដោយផ្ទុកទៅជាមួយ គឺ ផ្កាយរណប ៣គ្រឿង សរុបទៅទម្ងន់ ៣តោន ដើម្បីដាក់វាឲ្យហោះ ជាប្រចាំនៅតាមតារាវិថី របស់វា ព័ទ្ធជុំវិញផែនដី សម្រាប់បម្រើដល់គោលដៅវិទ្យាសាស្ត្រ។ ការបង្ហោះនេះ តាមដែលវិមានក្រេមឡាំងប្រកាសឲ្យដឹង ត្រូវបានតាមដានផ្ទាល់ពីចម្ងាយ ដោយលោកប្រធានាធិបតីពូទីន ដែលខិតខំស្តារឡើងវិញ មហិច្ឆិតាវិទ្យាសាស្ត្ររបស់រុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
មិនមែនចៃដន្យទេ ដែលលោកប្រធានាធិបតីពូទីន បានតាមដានការបង្ហោះនេះ ដោយ ផ្ទាល់ភ្នែក ពីព្រោះពិតជារូបគាត់ ដែលក្នុងឆ្នាំ២០០៧ បានបញ្ជាឲ្យសាងសង់ឡើង ជាព្រលាន អវកាសដ៏ទំនើបនេះ នៅលើដីរុស្ស៊ីតែម្តង នៅត្រង់កន្លែងដែលកាលមុនជា មូលដ្ឋានកងកាំជ្រួច មីស៊ីលសូវៀត ស្ថិតនៅតំបន់មិនសូវមានអ្នកស្រុករស់នៅ ឯចុងបូព៌ា ដើម្បីក្នុងអនាគត វានឹងចូលខ្លួន ទៅជំនួសព្រលានបែបនេះ ឈ្មោះ Baikonour បន្សល់ទុក នៅលើដែនដីកាហ្សាក់ស្ថាន ក្រោយពីសហភាពសូវៀតរលាយទៅ ហើយរុស្ស៊ី បង្ខំចិត្តជួលវាប្រើ ដោយបង់ថ្លៃក្នុងមួយឆ្នាំៗ ១១៥លានដុល្លារ។
តាមពិត ព្រលាន Vostotchny ត្រូវបានចាប់ផ្តើម សង់គឺលុះក្នុងឆ្នាំ២០១២ ហើយទម្រាំសង់រួច វាបានស៊ីពេលជាង៤ឆ្នាំ និងបានតម្រូវឲ្យចំណាយ អស់ ប្រមាណ ៥.០០០លានអឺរ៉ូ ដោយប្រើ កម្លាំងកម្មករ ១ម៉ឺននាក់ឯណោះ។ ព្រលាននេះ មានន័យជា មជ្ឈមណ្ឌលអវកាស ដោយហេដ្ឋារចនាសម្ព័ន្ធវា រួមក្តោបផ្លូវដែកប្រវែង១០០គ.ម. និង ផ្លូវរថយន្ត ប្រវែង១០០គ.ម.ដែរ ព្រមទាំង មានសង់ឡើងជា បុរីអវកាស សម្រាប់បុគ្គលិកបម្រើការព្រលាននេះ រស់នៅចំនួនដល់ ២ម៉ឺន៥ពាន់នាក់។
គុណសម្បត្តិនៃព្រលានថ្មីនេះ គឺ វាស្ថិតនៅលើ រយៈទទឹង ហៅថា Latilude របស់ផែនដី ប្រហាក់ប្រហែលនឹង ស្ថានភាព ព្រលាន Baikonour នៅកាហ្សាក់ស្ថាន ចម្ងាយស្រដៀងគ្នាពី ខ្សែ Equateur របស់ផែនដី បានន័យថា ពេលបង្ហោះកាំជ្រួចចេញទៅ វារងទំនាញរបស់ផែនដី តិចជាងទំនាញ រងដោយកាំជ្រួច ពេលបង្ហោះចេញពី ព្រលានអវកាសរុស្ស៊ី មួយទៀតឈ្មោះ Plessetsk ដែលស្ថិតនៅត្រង់រយៈទទឹងខ្ពស់ជាង។
មានផ្ទៃក្រឡា ដល់ ១.០០០ឝម2 មជ្ឈមណ្ឌលអវកាស Vostotchny ដែលសម្ពោធព្រឹកមិញ គឺទុកសម្រាប់បង្ហោះ កាំជ្រួចធុន Soyuz ដែលបន្តស្ថិតនៅជា យានជំនិះតែមួយគត់ ដែល បំពេញ មុខងារខាងដឹកអ្នកអវកាសទាំងជាតិរុស្ស៊ី ទាំងបរទេស ទៅស្នាក់នៅធ្វើការមួយលើកៗ រយៈពេលកន្លះឆ្នាំ ក្នុងស្ថានីយអវកាសអន្តរជាតិ ហៅកាត់ថា SSI ដើរតួជាមន្ទីរពិសោធហោះជាប្រចាំ នៅអវកាសកំពស់ ប្រមាណ ៤០០គ.ម.ពីផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ