ប្រជាជនបារាំង បោះឆ្នោតជុំទីពីរ ជ្រើសរើសបេក្ខជនប្រធានាធិបតី របស់បក្សស្តាំនិយម
ថ្ងៃអាទិត្យ ទី២៧ វិច្ឆិកានេះ គឺជាថ្ងៃបោះឆ្នោតជុំទីពីរ នៅប្រទេសបារាំងដើម្បីជ្រើសរើសបេក្ខជនឈរឈ្មោះប្រធានាធិបតី តំណាងឲ្យគណបក្សស្តាំនិយម។ គឺបេក្ខជនពីររូប ដែលបានជ័យជំនះកាលពីជុំទីមួយ សប្តាហ៍មុន ដែលត្រូវមកប្រកួតគ្នាចុងក្រោយក្នុងពេលនេះ បេក្ខជនទីមួយគឺលោក ហ្វ្រង់ស័រ ហ្វីយ៉ុង អតីតនាយករដ្ឋមន្ត្រីរបស់រដ្ឋាភិបាលលោកសាកូហ្ស៊ី និងទីពីរ គឺលោក អាឡាំង ហ៊្សុបប៉េ ដែលធ្លាប់ជារដ្ឋមន្ត្រីក្រសួងការបរទេស ហើយបច្ចុប្បន្ន គឺជាអភិបាលក្រុងប័រដូ។ តើបេក្ខជនណា នឹងបានជ័យលាភី ក្លាយជាបេក្ខជនប្រធានាធិបតី ដើម្បីឈានទៅចូលរួមការបោះឆ្នោតប្រធានាធិបតីបារាំង នៅខែឧសភា ឆ្នាំ២០១៧ ?
ចុះផ្សាយនៅថ្ងៃ៖
បេក្ខជនដែលទទួលបានជ័យលាភីនៅថ្ងៃនេះ គឺត្រូវគេរំពឹងទុកថានឹងអាចក្លាយជាប្រធានាធិបតីបារាំង ក្នុងអាណត្តិថ្មី ព្រោះបេក្ខជននោះ អាចនឹងត្រូវទៅប្រជែងជាមួយលោកស្រី Marine Le Pen មកពីគណបក្សស្តាំនិយមជ្រុល នៅជុំទីពីរ នៃការបោះឆ្នោតប្រធានាធិបតីនៅឆ្នាំក្រោយ ឆ្នាំ២០១៧។ ហេតុដូច្នេះហើយបានជាការបោះឆ្នោតជ្រើសរើសបេក្ខជនរបស់បក្សស្តាំនិយមបារាំងនាពេលនេះ ត្រូវគេចាប់អារម្មណ៍យ៉ាងខ្លាំងជាទីបំផុត។ ចំនួនអ្នកទៅចូលរួមបោះឆ្នោត ត្រូវគេរំពឹងថា អាចនឹងមានច្រើនលើសពីធម្មតា ជាក់ស្តែងកាលពីជុំទីមួយ នៅសប្តាហ៍មុន មានអ្នកចូលរួមបោះឆ្នោត ដល់ទៅជាង៤លាននាក់។
កាលពីជុំទីមួយ ក្នុងចំណោមបេក្ខជនទាំងអស់៧នាក់ លោក François Fillon បានទទួលសម្លេងឆ្នោត សរុបចំនួន៤៤% ចំណែកលោក Alain Juppé បានទទួលសម្លេងឆ្នោត២៨,៥%។ លោក François Fillon បានទទួលជ័យជំនះនៅជុំទីមួយ ធ្វើឲ្យគេភ្ញាក់ផ្អើលជាទីបំផុត ព្រោះចាប់តាំងពីពេលបើកការឃោសនា គឺលោក Alain Juppé ទេដែលមតិទូទៅគិតថានឹងឈ្នះ។
កាលពីថ្ងៃព្រហស្បតិ៍ ទី ២៤ វិច្ឆិកា បេក្ខជនទាំងពីរ បានចូលរួមឆ្លើយសំណួរជជែកដេញដោលយោបល់គ្នា នៅលើកញ្ចក់ទូរទស្សន៍ ដើម្បីឲ្យប្រជាជនវិនិច្ឆ័យអំពីកម្មវិធីនយោបាយរៀងៗខ្លួន។ លោក François Fillon ត្រូវបានគេមើលឃើញថា មានកម្មវិធីនយោបាយបែបសេរីនិយមខ្លាំងខាងផ្នែកសេដ្ឋកិច្ច តែខាងផ្នែកសង្គមវិញ គឺមានគំនិតអភិរក្សជ្រុល។ ជាងនេះទៅទៀត លោក François Fillon បានសន្យាលុបបុគ្គលិករដ្ឋចំនួន ៥សែននាក់ចោល ដើម្បីកាត់បន្ថយការចំណាយ។ គឺត្រង់ចំណុចនេះហើយ ដែលលោក Alain Juppé បានរិះគន់វាយបកទៅវិញ ដោយអះអាងថា ការសន្យាលុបបុគ្គលិករដ្ឋចោលដល់ទៅ៥សែននាក់ គឺជារឿងដែលមិនអាចធ្វើបានទេ ហើយវាជារឿងដែលមិនសមហេតុផលទៀត។
សូមបញ្ជាក់ថា កម្មវិធីនយោបាយរបស់លោក Alain Juppé ត្រូវបានអ្នកវិភាគយល់ថា មានចេតនាធ្វើកំណែទម្រង់ ក៏ប៉ុន្តែហាក់មិនសូវស៊ីជំរៅ ពោលគឺនៅមានភាពស្ទើរស្ទាក់។ តាមការវិភាគ គឺប្រហែលជាភាពស្ទាក់ស្ទើរ របស់លោក Alain Juppé នេះហើយ ដែលធ្វើឲ្យប្រជាជនសុខចិត្តយកសន្លឹកឆ្នោតទៅប្រគល់ឲ្យលោក François Fillon វិញ កាលពីជុំទីមួយ ព្រោះពួកគេត្រូវការអ្នកដែលហ៊ានសន្យាខ្លាំងៗ។
ជាមួយនឹងជ័យជំនះដាច់ឆ្ងាយពីលោក Alain Juppé កាលពីជុំទីមួយ ក្រុមលោក François Fillon បានមានសង្ឃឹមលួចញញឹមក្នុងចិត្តរួចទៅហើយថា លទ្ធផលជុំទីពីរនៅល្ងាចនេះ គឺលោក François Fillon នឹងឈ្នះដាច់ហៅមិនឮ។ យ៉ាងណាក៏ដោយ ក្រុមលោក Alain Juppé នៅតែបន្តមានសេចក្តីសង្ឃឹម ដោយអ្វីៗមិនអាចស្មានដឹងនៅឡើយ ព្រោះប្រជាជនអ្នកគាំទ្រខាងបក្សឆ្វេងនិយម អាចនឹងមកចូលរួមបោះឆ្នោត ដើម្បីសង្គ្រោះលោក Alain Juppé។ ចំណែកយោងតាមការស្ទាបស្ទង់មតិរបស់វិទ្យាស្ថានស្ថិតិបារាំង IFOP វិញបង្ហាញថា លោក François Fillon និងបាន៦៥% ទល់ ៣៥% សម្រាប់លោក Alain Juppé៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ