Sipri៖អឺរ៉ុប និងរុស្ស៊ីទទួលបានផលចំណេញច្រើនពីការលក់គ្រឿងសព្វាវុធក្នុងឆ្នាំ ២០១៥
នៅថ្ងៃចន្ទ ទី៥ វិច្ឆិកានេះ វិទ្យាស្ថានស្រាវជ្រាវសន្តិភាពអន្តរជាតិក្នុងទីក្រុងស្តុកខុល ប្រទេសស៊ុយអែតហៅកាត់ថា Sipri បានផ្សព្វផ្សាយរបាយការណ៍ប្រចាំឆ្នាំ ២០១៥ ស្តីពីការជួញដូរគ្រឿងសព្វាវុធក្នុងលោក។ របាយការណ៍បានប្រាប់ឲ្យដឹងថា ឧស្សាហកម្មអាវុធអឺរ៉ុប និងរុស្ស៊ីជាអ្នកដែលបានទទួលផលចំណេញច្រើនពីការលក់អាវុធក្នុងឆ្នាំ ២០១៥។ ទោះជាយ៉ាងនេះក្តី ឧស្សាហកម្មអាវុធអាមេរិកាំងនៅតែបន្តគ្របដណ្តប់លើទីផ្សារអាវុធក្នុងលោក។
ចុះផ្សាយនៅថ្ងៃ៖
ស្តាប់ - ០២:១៧
នៅក្នុងប្រទេសរុស្ស៊ី ឧស្សាហកម្មគ្រឿងសព្វាវុធមានសុខភាពល្អ និងបានស្គាល់កំណើនខ្លាំងក៏ដោយសារតែមានតម្រូវការខ្ពស់ពីក្រសួងការពារជាតិ ពិសេសតម្រូវការគ្រឿងអាវុធបន្ថែម ឬធ្វើការផ្លាស់ប្តូរគ្រឿងសព្វាវុធចាស់ៗចេញ។ ក្រៅពីកំណើនតម្រូវការក្នុងស្រុក ឧស្សាហកម្មអាវុធរុស្ស៊ីក៏បានលក់អាវុធទៅឲ្យប្រទេសផ្សេង ពិសេសឥណ្ឌា ចិន ឬមួយក៏ប្រទេសវៀតណាមជាដើម។ នៅក្នុងចំណោមឧស្សាហកម្មអាវុធរុស្ស៊ីទាំងអស់ មានឧស្សាហកម្មចំនួន ១៣ បានស្គាល់កំណើនលក់អាវុធខ្ពស់ក្នុងឆ្នាំ ២០១៥ ពោលកើន ៦,២% ធៀបនឹងឆ្នាំ ២០១៤។ យ៉ាងណាក៏ដោយ កំណើននេះនៅទាបឆ្ងាយណាស់បើធៀបនៅចន្លោះឆ្នាំ ២០១៣ និង ២០១៤ ដែលមានដល់ទៅ ៤៨,៤%។
សម្រាប់ឆ្នាំ ២០១៥ Sipri បានចាត់ចំណាត់ថ្នាក់ឧស្សាហកម្មអាវុធដ៏ធំជាងគេក្នុងលោកចំនួន ១០០ឧស្សាហកម្ម ក្នុងនោះ ឧស្សាហកម្មអាវុធអាមេរិកាំងដូចយ៉ាង Lockheed Martin ដែលមានប្រាក់ទុនជាង ៣៦ ៤០០លានដុល្លារ និង Boeing ដែលមានប្រាក់ទុនចំនួន ២៨ ០០០លានដុល្លារនៅបន្តស្ថិតចំណាត់ថ្នាក់ទី១ ដដែល និងបន្តដោយឧស្សាហកម្មអាវុធអង់គ្លេស BEA Systems ដែលមានប្រាក់ទុនជាង ២៥ ៥០០លានដុល្លារ។ យោងតាម Sipri ប្រាក់បានមកពីការលក់អាវុធសរុបក្នុងឆ្នាំ ២០១៥ មានជាង ៣៧០ ៧០០លានដុល្លារ ពោលមានការធ្លាក់ចុះតិចតួចជាប់ៗគ្នាក្នុងរយៈពេល ៥ឆ្នាំកន្លងទៅ ក្នុងនោះ ឧស្សាហកម្មអាវុធអាមេរិកាំងស្រូបយកតែឯងចំនួន ៥៦,៦%។
រីឯទីផ្សារនៅសេសសល់ត្រូវបានធ្លាក់លើអឺរ៉ុបដែលមាន ២៥,៨% និងរុស្ស៊ីដែលមាន ៨,១%។ ចិនក៏ជាប្រទេសផលិតអាវុធ និងទិញអាវុធពីបរទេសដែរ តែ Sipri មិនបានលើកយកមកនិយាយទេ ព្រោះគ្មានទិន្នន័យច្បាស់លាស់។ ដោយឡែក ឧស្សាហកម្មអាវុធបារាំងត្រូវបាន Sipri បញ្ជាក់ថា ទទួលបានកិច្ចសន្យាទិញអាវុធដ៏ច្រើនសម្បើមពីប្រទេសអេហ្ស៊ីប និងកាតាក្នុងឆ្នាំ ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ