វិបត្តិនយោបាយរូម៉ានី៖លោកប្រធានាធិបតីស្នើឲ្យលោកនាយករដ្ឋមន្រ្តីលាចុះពីតំណែង
នៅក្នុងប្រទេសរូម៉ានី វិបត្តិនយោបាយបានជំរុញឲ្យលោកប្រធានាធិបតីខ្លៅ យ៉ូហានីស (Klaus lohannis) ចូលខ្លួនអន្តរាគមន៍នារសៀលថ្ងៃអង្គារ ទី៧ កុម្ភៈ។ នៅក្នុងបទអន្តរាគមន៍នោះ លោកឡូហានីសបានបញ្ជាក់ពីបំណងចង់ឃើញការលាចុះពីតំណែងរបស់លោកនាយករដ្ឋមន្រ្តីសូរីន គ្រីនដានូ។ សូមជម្រាបជូនថា វិបត្តិនយោបាយនៅរូម៉ានីបានផ្ទុះឡើង ក្រោយពីលោកសូរីនបានបង្កើតឲ្យមានច្បាប់មួយដើម្បីបន្ធូរបន្ថយអំពើពុករលួយ។ តែពលរដ្ឋមិនទទួលយក និងបានផ្លូវធ្វើបាតុកម្មប្រឆាំងយ៉ាងខ្លាំងក្លា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
គឺនៅចំពោះមុខសភាដែលលោកប្រធានាធិបតីខ្លៅ យ៉ូហានីសបានបញ្ជាក់ពីបំណងចង់ឃើញលោកនាយករដ្ឋមន្រ្តីសូរីន គ្រីនដានូចុះចេញពីតំណែង។ តែលោកនាយករដ្ឋមន្រ្តីបានឆ្លើយបកវិញដោយបញ្ជាក់ជាថ្មីថា លោកគ្មានបំណងនឹងលាចេញពីតំណែង និងបន្ថែមថា លោកនឹងបង្ហាញពីជំហរលំអិតរបស់លោកនៅថ្ងៃពុធ ទី៨ កុម្ភៈនេះនាឱកាសការជជែកតស៊ូមតិលើញត្តិចាប់ថ្នាក់មួយ។ សូមជម្រាបជូនថា លោកគ្រីនដានូបានបង្កើតឲ្យមានច្បាប់មួយដែលអនុញ្ញាតឲ្យឥស្សរជននយោបាយពុករលួយគេចផុតពីសំណាញ់តុលាការ។
តែបញ្ហានៅត្រង់ថា ច្បាប់មួយបានបញ្ឆេះកំហឹងរបស់ប្រជាពលរដ្ឋឲ្យចុះផ្លូវធ្វើបាតុកម្មប្រឆាំងយ៉ាងគគ្រឹកគ្រេងរហូតជំរុញឲ្យលោកគ្រីនដានូលប់ច្បាប់នោះចោលវិញកាលពីថ្ងៃអាទិត្យ ទី៥ កុម្ភៈ។ ក៏ប៉ុន្តែ កំហឹងរបស់ប្រជាពលរដ្ឋកំពុងបន្តមានដោយទាមទារឲ្យលោកគ្រីនដានូចុះចេញពីតំណែងតែម្តង។ លោកប្រធានាធិបតីយ៉ូហានីសបានយល់ឃើញថា ការលប់ច្បាប់ចោលវិញ ឬមួយក៏ការដកតំណែងលោករដ្ឋមន្រ្តីក្រសួងយុត្តិធម៌ពិតជាមិនទាន់គ្រប់គ្រាន់ដើម្បីរំងាប់កំហឹងរបស់ប្រជាពលរដ្ឋបានដែរ។
សម្រាប់លោកយ៉ូហានីស ដំណោះស្រាយនៃវិបត្តិមួយនេះស្ថិតនៅផ្ទៃក្នុងគណបក្សសង្គមប្រជាធិបតេយ្យដែលកំពុងកាន់អំណាចរបស់លោកគ្រីនដានូ។ លោកយ៉ូហានីសបានបន្ថែមថា ដំណោះស្រាយដែលលោកចង់បានដើម្បីបញ្ចប់វិបត្តិ គឺការរំលាយរដ្ឋាភិបាលសព្វថ្ងៃ ហើយគណបក្សសង្គមប្រជាធិបតេយ្យត្រូវរៀបចំបង្កើតរដ្ឋាភិបាលថ្មីជាមួយនឹងរូបនាយករដ្ឋមន្រ្តីថ្មី។ លោកយ៉ូហានីសបានគូសបញ្ជាក់ថា គណបក្សសង្គមប្រជាធិបតេយ្យដែលបានឈ្នះឆ្នោតកាលពីខែធ្នូត្រូវតែដឹកនាំប្រទេស តែមិនមែនដឹកនាំតាមតែទំនើងចិត្តរបស់ខ្លួនឡើយ។
នៅទីបញ្ចប់ លោកប្រធានាធិបតីបានព្រមានថា បើគណបក្សកាន់អំណាចដែលជាអ្នកបង្កើតវិបត្តិ ហើយបែរជាមិនព្រមដោះស្រាយឲ្យបានឆាប់រហ័សទេ លោកនឹងកោះហៅគណបក្សនយោបាយផ្សេងទៀតដើម្បីពិគ្រោះយោបល់ដោយផ្អែកតាមសិទ្ធិអំណាចរបស់ប្រធានាធិបតី។ សូមជម្រាបជូនថានៅរូម៉ានី អ្នកដែលមានអំណាចពិត គឺនាយករដ្ឋមន្រ្តី ចំណែកអំណាចប្រធានាធិបតីគ្រាន់ជាអំណាចនិមិត្តរូបប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ