នាយករដ្ឋមន្រ្តីរូម៉ានីត្រូវតុលាការចោទប្រកាន់ពីបទពុករលួយតែមិនព្រមចុះពីតំណែង
លោកវិចទ័រ ប៉ុងតា (Victor Ponta) នាយករដ្ឋមន្រ្តីរូម៉ានីត្រូវបានតុលាការធ្វើការចោទប្រកាន់កាលពីថ្ងៃចន្ទ ពីបទពាក់ព័ន្ធនឹងអំពើពុករលួយ។ ក៏ប៉ុន្តែ បើទោះបីជាត្រូវតុលាការចោទប្រកាន់បែបនេះក៏ដោយ លោកវិចទ័រ ប៉ុងតា បានបដិសេធមិនព្រមចុះចេញពីតំណែងនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
អង្គភាពប្រឆាំងអំពើពុករលួយរូម៉ានីបានឲ្យដឹង កាលពីថ្ងៃចន្ទថា លោកនាយករដ្ឋមន្រ្តីវិចទ័រ ប៉ុងតា ត្រូវបានចោទប្រកាន់ពីបទជាប់ពាក់ព័ន្ធនឹងការក្លែងឯកសារ ការគេចពន្ធ និងប្រតិបត្តិការលាងលុយកខ្វក់។ អង្គហេតុនៅក្នុងការចោទប្រកាន់នេះបានកើតមានឡើងនៅក្នុងចន្លោះពីឆ្នាំ២០០៧ ដល់ឆ្នាំ២០១១ ពោលគឺ នៅមុនពេលដែលលោកវិចទ័រ ប៉ុងតា ឡើងកាន់តំណែងជានាយករដ្ឋន្រ្តី។ ហេតុដូច្នេះហើយបានជាតុលាការអាចធ្វើការស៊ើបអង្កេត និងចោទប្រកាន់បាន ដោយមិនចាំបាច់មានការស្នើសុំឲ្យដកអភ័យឯកសិទ្ធិ។
គួររំឭកឡើងវិញថា មុននឹងឈានដល់ការចោទប្រកាន់នេះ អង្គភាពប្រឆាំងអំពើពុករលួយបានបើកការស៊ើបអង្កេតលើរូបលោកនាយករដ្ឋមន្រ្តីវិចទ័រ ប៉ុងតា តាំងពីខែមិថុនា។ នៅពេលដែលការស៊ើបអង្កេតនេះបានចាប់ផ្តើមធ្វើភ្លាម គណបក្សប្រឆាំងរូម៉ានីបានទាមទារឲ្យលោកវិចទ័រ ប៉ុងតា ចុះចេញពីតំណែង ក៏ប៉ុន្តែ លោកបានបដិសេធ ដោយអះអាងថា លោកមានភាពស្អាតស្អំ មិនបានប្រព្រឹត្តកំហុសដូចការចោទប្រកាន់។ រហូតមកទល់នឹងថ្ងៃចន្ទ ក្រោយពីមានការចោទប្រកាន់ជាផ្លូវការពីតុលាការពីបទពុករលួយ ក៏លោកនាយករដ្ឋមន្រ្តីរូម៉ានីនៅតែបដិសេធមិនចុះចេញពីតំណែងដដែល។
តាមការពិត អង្គភាពប្រឆាំងអំពើពុករលួយក៏ចង់បើកការស៊ើបអង្កេតលើករណីសង្ស័យមួយចំនួនទៀតដែរ ដែលជាប់ពាក់ព័ន្ធនឹងសកម្មភាពរបស់លោកវិចទ័រ ប៉ុងតា ក្នុងអំឡុងពេលលោកកាន់តំណែងជានាយករដ្ឋមន្រ្តី។ ក៏ប៉ុន្តែ ដោយសារតែគណបក្សរបស់លោកមានសំឡេងភាគច្រើននៅសភា ហើយបដិសេធមិនព្រមដកអភ័យឯកសិទ្ធិ ទើបគេអាចធ្វើការស៊ើបអង្កេតតែទៅលើអង្គហេតុ ដែលកើតឡើងកាលពីមុនពេលលោកឡើងកាន់តំណែង។
គួរបញ្ជាក់ថា នៅក្នុងចំណោមប្រទេសសមាជិកសហភាពអឺរ៉ុប រូម៉ានីគឺជាប្រទេសក្រីក្របំផុតលំដាប់ទី២បន្ទាប់ពីប៊ុលហ្ការី ហើយក៏ជាប្រទេសដែលសម្បូរទៅដោយអំពើពុករលួយផងដែរ។ គេសង្កេតឃើញថា នៅក្នុងរយៈពេលប៉ុន្មានឆ្នាំចុងក្រោយនេះ យុទ្ធនាការប្រឆាំងអំពើពុករលួយត្រូវបានបើកធ្វើយ៉ាងសកម្មនៅរូម៉ានី ដែលធ្វើឲ្យអ្នកនយោបាយសំខាន់ៗជាច្រើនរូបត្រូវធ្លាក់ពីតំណែង។ លោកវិចទ័រ ប៉ុងតា ដែលជានាយករដ្ឋមន្រ្តីកំពុងកាន់តំណែង គឺជាអ្នកនយោបាយកំពូលបំផុត ដែលត្រូវជាប់ក្នុងសំណាញ់នៃយុទ្ធនាការបោសសម្អាតអំពើពុករលួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ