បារាំងចាប់ផ្តើមបង្កើតរដ្ឋាភិបាលថ្មី
លោកអេម៉ានុយអែល ម៉ាក្រុង ប្រធានាធិបតីថ្មីរបស់បារាំង នៅថ្ងៃចន្ទម្សិលមិញ បានតែងតាំង លោកអេដ័រ ហ្វីលីព អ្នកនយោបាយមកពីក្រុមប្រឆាំង គឺគណបក្សសាធារណរដ្ឋ ឲ្យធ្វើជានាយករដ្ឋមន្រ្តី។ នៅថ្ងៃអង្គារទី ១៦ ឧសភា លោកអេដ័រ ហ្វីលីព នាយករដ្ឋមន្រ្តីថ្មី មាននាទី បង្កើតរដ្ឋាភិបាលដែលមានរដ្ឋមន្រ្តី ជាង១៥រូប។ ប៉ុន្តែ នៅរសៀលថ្ងៃអង្គារដដែល វិមានប្រធានាធិបតីបានប្រកាសពន្យារពេលការប្រកាសទៅថ្ងៃពុធទី ១៧ឧសភាវិញ
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥៥
លោកប្រធានាធិបតីបារាំង អេម៉ានុយអែល ម៉ាក្រុង មានប្រភពមកពីគណបក្សឆ្វេង កណ្តាលនិយម ប៉ុន្តែ លោកបានតែងតាំងមនុស្សមកពីគណបក្សប្រឆាំង គណបក្សស្តាំនិយម ឲ្យធ្វើជានាយករដ្ឋមន្រ្តីបង្កើតរដ្ឋាភិបាលថ្មី។ នេះជារឿងដែលមិនធ្លាប់កើតមានទេ នៅក្នុងប្រវត្តិសាស្រ្តនយោបាយបារាំង។ កន្លងមក ប្រធានាធិបតីបារាំង ត្រូវបង្ខំចិត្ត ធ្វើការជាមួយនាយករដ្ឋមន្រ្តីមកពីគណបក្សប្រឆាំង ដោយសារតែគណបក្សរបស់ប្រធានាធិបតីមិនអាចឈ្នះឆ្នោត ប្រមូលបានសំឡេងភាគច្រើននៅរដ្ឋសភា។
ប៉ុន្តែ នៅក្នុងអាណត្តិរបស់លោកអេម៉ានុយអែល ម៉ាក្រុង ប្រធានាធិបតីនិងនាយករដ្ឋមន្រ្តីមកពីគណបក្សនយោបាយពីរផ្ទុយគ្នា ចាប់ដៃធ្វើការជាមួយគ្នា ដោយគ្មានការចាប់បង្ខំ តាំងពីមុន មានការបោះឆ្នោតសភា។ លោកអេម៉ានុយអែល ម៉ាក្រុង ដឹងថា គណបក្សរបស់លោក ដែលទើបតែបង្កើតឡើង នៅតែជាងមួយឆ្នាំមុននេះ មិនទាន់មានសមាជិកដែលមានប្រជាប្រិយភាព ធ្វើយុទ្ធនាការ អូសទាញអ្នកបោះឆ្នោត នៅក្នុងការបោះឆ្នោតសភា នៅខែមិថុនាខាងមុខនេះទេ។ ដើម្បីសង្ឃឹមឈ្នះឆ្នោតសភា នាពេលខាងមុខ ប្រធានាធិបតីបារាំងគឺមានតែលេងសន្លឹកបៀរ អូសទាញ អ្នកនយោបាយចាស់ៗ មកពីគណបក្សប្រឆាំង ឬគណបក្សសង្គមនិយម ដែលជាគណបក្សកាន់អំណាចកន្លងមក ឲ្យមកចូលរួមក្នុងរដ្ឋាភិបាលថ្មី តាំងពីដំបូងទី។
លោកអេម៉ានុយអែល ម៉ាក្រុង បានសន្យាបង្កើតរដ្ឋាភិបាលមួយ ប្រមូលផ្តុំដោយអ្នកនយោបាយ មកពីគ្រប់និន្នាការនយោបាយ ក្នុងនោះមានផង សមាជិករបស់បក្សប្រឆាំង។ លោកអេដ័រ ហ្វីលីព មកពីគណបក្សប្រឆាំង មិនដែលបានចូលរួមក្នុងចលនាEn Marche តាំងពីដំបូងទីមែន ប៉ុន្តែ ដោយតែងតាំងលោកអេដ័រ ហ្វីលីព មកពីគណបក្សសាធារណរដ្ឋ ដែលជាគណបក្សប្រឆាំង លោកប្រធានាធិបតីម៉ាក្រុង រំពឹងអូសទាញ បានសំឡេងពីម្ចាស់ឆ្នោត ដែលគាំទ្រគណបក្សស្តាំនិយម នៅស្រុកបារាំង។
សម្រាប់អ្នកវិភាគមួយចំនួន នយោបាយអូសទាញរបស់លោកអេម៉ានុយអែល ម៉ាក្រុង គឺមានន័យស្មើនឹងបំផ្លាញ គណបក្សប្រឆាំងឲ្យបែកបាក់ខ្ទេចខ្ទីរគ្មានសល់ ម្តងទៀត នៅបន្ទាប់ពីលោកបានបំផ្លាញគណបក្សឆ្វេងនិយម។ ជាក់ស្តែង លោកអេដ័រ ហ្វីលីព មកពីគណបក្សសាធារណរដ្ឋ ដែលជាគណបក្សប្រឆាំង។ ប៉ុន្តែ នៅពេលត្រូវតែងតាំងឲ្យធ្វើជានាយករដ្ឋមន្រ្តីរបស់លោកម៉ាក្រុង លោកអេដ័រ ហ្វីលីព ត្រូវមានកាតព្វកិច្ចបង្កើតរដ្ឋាភិបាលមួយ ដែលមានទិសដៅ យកឈ្នះ លើគណបក្សប្រឆាំង គណបក្សសាធារណរដ្ឋនៅក្នុងការបោះឆ្នោតសភានាពេលខាងមុខ។ មន្រ្តីបក្សប្រឆាំងសោកស្តាយ ដែលឃើញលោកអេដ័រ ហ្វីលីពចុះចូលជាមួយលោកម៉ាក្រុង។ នៅក្នុងលិខិតមួយសរសេរនៅថ្ងៃអង្គារ លោកLuc Chatel មន្រ្តីជាន់ខ្ពស់របស់បក្សសាធារណរដ្ឋបាននិយាយថា លោកអេដ័រ ហ្វីលីពកំពុងចូលរួម ចូលដៃ ជួយគណបក្សរបស់ប្រធានាធិបតី ឲ្យសម្លាប់គណបក្សប្រឆាំង ដែលជាគណបក្សកំណើតរបស់លោកអេដ័រ ហ្វីលីពយ៉ាងដូច្នេះឯង។
ញតិ្តរបស់បក្សប្រឆាំង ទាមទារឲ្យគេចាប់ដៃធ្វើជាមួយរដ្ឋាភិបាល
នៅក្រោយពេលដែល លោកអេដ័រ ហ្វីលីពមកពីគណបក្សប្រឆាំង ត្រូវបានលោកម៉ាក្រុង ជ្រើសរើសឲ្យធ្វើជានាយករដ្ឋមន្រ្តីបង្កើតរដ្ឋាភិបាលថ្មី សមាជិករបស់បក្សស្តាំ និងកណ្តាលនិយមផ្សេងទៀត បានចេញមុខ ចង់ចូលរួមជាមួយរដ្ឋាភិបាលរបស់លោកម៉ាក្រុងដែរ។ សម្រាប់ពួកគេ ការប្តូរឈ្មោះគណបក្ស ដូចជាការផ្លាស់ប្តូរអាវ មិនសំខាន់ទេ។ អ្វីដែលសំខាន់ គឺគេអាចធ្វើការបម្រើជាតិ។
នៅថ្ងៃចន្ទម្សិលមិញ សមាជិកសំខាន់ៗ របស់បក្សសាធារណរដ្ឋ និងបក្សកណ្តាលនិយមដូចជាUDI ប្រមាណ ៣០នាក់ បានចុះហត្ថលេខាលើញត្តិ មួយដែលទាមទារឲ្យសមាជិករបស់បក្សប្រឆាំង ពិចារណាទទួលយកការបោះដៃរបស់ប្រធានាធិបតីម៉ាក្រុង។ លោកBruno Le Maire ជាដើមដែលធ្លាប់ជាបេក្ខជនប្រធានាធិបតីរបស់បក្សសាធារណរដ្ឋ ត្រូវគេរំពឹងថា នឹងអាចទទួលតំណែងសំខាន់ ដូចជាការបរទេស ឬការពារជាតិ នៅក្នុងរដ្ឋាភិបាលរបស់លោកម៉ាក្រុង។
វាយតម្លៃសមត្ថភាពរបស់រដ្ឋមន្រ្តីជាទៀងទាត់ នៅរៀងរាល់ឆ្នាំ
លោកម៉ាក្រុងធ្លាប់បានសន្យាបង្កើតក្រុមអ្នកនយោបាយថ្មី នៅក្នុងអាណត្តិរបស់លោក។ ជាក់ស្តែង លោកអេដ័រ ហ្វីលីព ដែលត្រូវលោកម៉ាក្រុងតែងតាំងជានាយករដ្ឋមន្រ្តី នៅថ្ងៃចន្ទម្សិលមិញ ជាចៅហ្វាយស្រុកមួយ ដែលគេមិនធ្លាប់ ឃើញ កន្លងមក នៅតាមទូរទស្សន៍ និងដែលមិនដែលធ្លាប់ចូលរួមដឹកនាំក្នុងរដ្ឋាភិបាលកន្លងមក។
លោកប្រធានាធិបតី ម៉ាក្រុង អះអាងហើយថា អ្នកដែលចូលរួមក្នុងរដ្ឋាភិបាលរបស់ជាមនុស្សដែលស្អាតស្អំ គ្មានជាប់ប្រឡាក់នឹងរឿងក្តីក្តាំនៅតុលាការ។ លោកជ្រើសរើសសមាជិករបស់រដ្ឋាភិបាល ដោយមើលទៅលើសមត្ថភាព បទពិសោធន៍។ លោកម៉ាក្រុងបានបញ្ជាក់ថា មនុស្សដែលមកធ្វើការនៅក្នុងរដ្ឋាភិបាលរបស់លោក គឺជាមនុស្សដែលធ្លាប់មានបទពិសោធន៍ធ្វើការនៅក្នុងស្ថាប័នរដ្ឋ ដូចជាចៅហ្វាយក្រុង ដែលធ្វើការជិតស្និទ្ធ ដឹងពីសុខទុក្ខរបស់ប្រជាជន។ ដូច្នេះ លោកនឹងមិនស្វាគមទេ អ្នកដែលមានតួនាទីត្រឹមតំណាងរាស្រ្ត ដែលមិនធ្លាប់ចុះធ្វើការជិតស្និទ្ធជាមួយប្រជាជននោះទេ។
លោកម៉ាក្រុងបានបំបែកប្រព័ន្ធនយោបាយ ទំនៀមទម្លាប់ចាស់របស់បារាំង ដោយបានបើកចំហរឲ្យមនុស្សគ្រប់គ្នា អាចចូលរួមធ្វើនយោបាយ។ ជាក់ស្តែង បើមើលទៅលើបញ្ជីរ គណបក្សសាធារណរដ្ឋEn Marche របស់លោកម៉ាក្រុង បេក្ខជនដែលឈរឈ្មោះ សម្រាប់ការបោះឆ្នោតសភា គឺមានលាយចម្រុះ ដោយអ្នកសេដ្ឋកិច្ច អ្នកនយោបាយ និស្សិត សិល្បករ ឬអ្នកគ្មានការងារក៏មាន។ ម្យ៉ាងវិញទៅ ដើម្បីធានាភាពស្មើគ្នា ក្នុងពិភពការងារ លោកម៉ាក្រុងបានសន្យាផងដែរនូវការចូលរួម ពាក់កណ្តាលរបស់មនុស្សស្រី នៅក្នុងជួររដ្ឋាភិបាលរបស់លោក។ លើសពីនោះ មួយភាគបីនៃសមាជិករបស់រដ្ឋាភិបាល មានប្រភពមកពីសង្គមស៊ីវិល ដូចជាអ្នកជំនួញ ជាដើម។ ដើម្បីធានាប្រសិទ្ធិភាពការងារ របស់រដ្ឋាភិបាលរបស់លោក លោកម៉ាក្រុងបានទាមទារឲ្យមានការវាយតម្លៃជាប្រចាំ លើសមត្ថភាពរបស់មន្រ្តី រដ្ឋាភិបាល។
លោកម៉ាក្រុងបាននិយាយថា នៅក្រោយពេលវាយតម្លៃសមត្ថភាព លោកនឹងសម្រេចជាមួយនាយករដ្ឋមន្រ្តី នៅរាល់មួយឆ្នាំម្តងថា តើរដ្ឋមន្រ្តីណា ដែលត្រូវទុក ត្រូវដកចេញពីតំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ