សោកនាដកម្ម ស្លាប់មនុស្ស នៅក្នុងភ្លើងឆេះព្រៃនៅព័រទុយហ្កាល់
ភ្លើងឆេះព្រៃដ៏កាចសាហាវ នៅព័រទុយហ្កាល់ បានលេបត្របាក់ជីវិតមនុស្សយ៉ាងហោច ៦២នាក់ នៅថ្ងៃសៅរ៍ទី១៧ មិថុនា។ តាមតួលេខរបស់រដ្ឋាភិបាល ភ្លើងឆេះព្រៃដែលរាលដាលយ៉ាងលឿន និងឆាប់រហ័ស នៅល្ងាចថ្ងៃសៅរ៍ បានធ្វើឲ្យមនុស្សរងរបួសផងដែរ ប្រមាណ៥៦នាក់ ដែលនៅក្នុងនោះ មានអ្នកពន្លត់អគ្គិភ័យព័រទុយហ្កាល់បីនាក់។
ចុះផ្សាយនៅថ្ងៃ៖ កែប្រែថ្ងៃទី៖
ជនរងគ្រោះភាគច្រើនបានស្លាប់ ឆេះខ្លោច នៅក្នុងរថយន្តរបស់ពួកគេដែលជាប់គាំងលើផ្លូវ ដោយសារអណ្តាតភ្លើងឆេះព្រៃ។ លោកនាយករដ្ឋមន្រ្តីព័រទុយហ្កាល់ Antonio Costa បានចាត់ទុក ភ្លើងឆេះព្រៃ នៅថ្ងៃសៅរ៍ ថា ជាសោកនាដកម្មដ៏ធ្ងន់ធ្ងរដែលព័រទុយហ្កាល់មិនធ្លាប់ជួបប្រទះនៅក្នុងប្រវត្តិភ្លើងឆេះព្រៃ។ ព័រទុយហ្កាល់ធ្លាប់រងគ្រោះដោយសារភ្លើងឆេះព្រៃ នៅឆ្នាំ ២០០៣ ដែលបានសម្លាប់មនុស្ស២០នាក់ និងនៅឆ្នាំ ១៩៦៦ ដែលបានសម្លាប់ទាហាន២៥នាក់ ប៉ុន្តែ មិនដែលបាត់បង់ជីវិតមនុស្សច្រើន ដូចនៅក្នុងភ្លើងឆេះព្រៃ នៅថ្ងៃសៅរ៍ម្សិលមិញនេះទេ។ ប្រមុខរដ្ឋាភិបាលព័រទុយហ្កាល់បានប្រកាសកាន់ទុក្ខជាតិ ៣ថ្ងៃ សម្រាប់សោកនាដកម្មភ្លើងឆេះសម្លាប់មនុស្សនៅថ្ងៃសៅរ៍។
ភ្លើងឆេះព្រៃ បានចាប់ផ្តើមនាពេលរសៀល ថ្ងៃសៅរ៍ម្សិលមិញ និងបានរាលដាលយ៉ាងឆាប់រហ័សក្នុងបួនមុខព្រួញ នៅភាគកណ្តាលប្រទេសព័រទុយហ្កាល់។ អ្នកពន្លត់អគ្គិភ័យប្រមាណ ៦០០នាក់ ហើយនិងរថយន្តដឹកទឹក១៩០គ្រឿងត្រូវបានបញ្ជូនឲ្យបាញ់បង្រ្កាបភ្លើងយក្ស តាំងពីយប់ថ្ងៃសៅរ៍ រហូតដល់ភ្លើងបានថមថយកម្លាំង នៅព្រឹកថ្ងៃអាទិត្យ។
តាមនាយករដ្ឋមន្រ្តី ព័រទុហ្កាល់ រន្ទះបាញ់ខែប្រាំង អាចជាដើមហេតុមួយ បង្កឲ្យមានភ្លើងឆេះព្រៃ។ នៅថ្ងៃសៅរ៍ម្សិលមិញ សីតុណ្ហភាពនៅតំបន់ខ្លះ របស់ព័រទុយហ្កាល់ បានឡើងក្តៅខ្លាំង រហូតដល់៤០អង្សារសេ។ នៅថ្ងៃសៅរ៍ម្សិលមិញនេះដែរ អ្នកពន្លត់អគ្គិភ័យជាង ១៧០០នាក់ បានញាប់ដៃជើង ពន្លត់ភ្លើងឆេះព្រៃជាង៦០កន្លែង ដែលបានកើតឡើង នៅទូទាំងប្រទេស ព័រទុយហ្កាល់។
ព័រទុយហ្កាល់ឧស្សាហ៍ជួបភាពរាំងស្ងួត និងក្តៅខ្លាំងនៅអំឡុងរដូវក្តៅ។ ប្រទេសនេះបានរួចផុតពីគ្រោះកាចភ្លើងឆេះព្រៃ តែនៅឆ្នាំ ២០១៤ និងឆ្នាំ ២០១៥តែប៉ុណ្ណោះ។ នៅឆ្នាំ ២០១៦កន្លងទៅ ភ្លើងឆេះព្រៃដ៏សន្ធោសន្ធៅ ដែលឡើងកម្លាំងខ្លាំងដោយសារខ្យល់ និងអាកាសធាតុក្តៅខ្លាំង បានបំផ្លាញលេបត្របាក់ព្រៃ ជាង១ម៉ឺនហិចតា នៅលើដីគោក ប៉ុន្តែ មិនបានសម្លាប់ជីវិតមនុស្សនោះទេ។ នៅលើកោះទេសចរណ៍របស់ព័រទុយហ្កាល់ ឈ្មោះ Madère ភ្លើងឆេះព្រៃបានសម្លាប់មនុស្ស៣នាក់ និងបានបំផ្លាញផ្ទះជាង៤០ខ្នង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ