ចៅក្រមបារាំងចោទប្រកាន់សមាជិកសភារុស្ស៊ី ក្នុងបទបន្លំ គេចពន្ធ
សមាជិកព្រឹទ្ធសភា រុស្ស៊ី លោក Souleïma Kerimov នៅថ្ងៃព្រហស្បតិ៍ នេះត្រូវបានចៅក្រមស៊ើបអង្កេតបារាំងសម្រេចចោទប្រកាន់ជាផ្លូវការ និងដកហូតលិខិតឆ្លងដែន មិនឲ្យចាកចេញពីទឹកដីបារាំង។ ជាមហាសេដ្ឋី មានប្រាក់រាប់ពាន់លានដុល្លារ និងជាម្ចាស់អចលនទ្រព្យច្រើនកន្លែង នៅភាគខាងត្បូងបារាំង លោក Souleïma Kerimov ត្រូវបានរដ្ឋអាជ្ញាបារាំងចោទប្រកាន់បានលួចបន្លំ គេច មិនបង់ពន្ធរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
សមាជិកព្រឹទ្ធសភារុស្ស៊ី លោក Souleïma Kerimov ត្រូវបានអាជ្ញាធរបារាំង ចាប់ឃាត់ខ្លួន នៅថ្ងៃចន្ទ នៅព្រលានយន្តហោះក្រុងនីសភាគខាងត្បូងបារាំង។ ផ្ទុយពីរដ្ឋអាជ្ញារបស់បារាំង ដែលបានទាមទារឲ្យមានការចាប់ឃុំខ្លួនបណ្តោះអាសន្ន ចៅក្រមស៊ើបអង្កេតបានសម្រេចត្រឹមដកហូតលិខិតឆ្លងដែន និងតម្រូវឲ្យសមាជិកព្រឹទ្ធសភា រុស្ស៊ីបង់តម្កល់ប្រាក់ ៥លានអឺរ៉ូ។
ការសម្រេចរបស់តុលាការបារាំងបានបង្កឲ្យមានក្តីខឹងសម្បាររបស់ក្រុងម៉ូស្គូ។ សភារុស្ស៊ីបានបោះឆ្នោតលើសេចក្តីសម្រេច ដែលបរិហារ លើការរំលោភសន្ធិសញ្ញាក្រុងវីយ៉ែនដែលចែងពីអភ័យឯកសិទ្ធិរបស់មន្រ្តីការទូត។ តាមអ្នកនាំពាក្យរបស់វិមានក្រេមឡាំង រុស្ស៊ី នឹងធ្វើគ្រប់យ៉ាងដើម្បីការពារសិទ្ធិ តាមផ្លូវច្បាប់របស់លោក Souleïma Kerimov ដែលជាសមាជិកព្រឹទ្ធសភា និងជាពលរដ្ឋរុស្ស៊ី។ ក្រសួងការបរទេសបារាំងវិញបានប្រតិកម្មថា នៅក្នុងដំណើរផ្លូវឯកជន លោក Souleïma Kerimovដែលជាមហាសេដ្ឋី មានប្រាក់រាប់ពាន់លានអឺរ៉ូ មិនបានប្រើលិខិតឆ្លងដែនការទូត នៅពេលលោកធ្វើដំណើរចូលក្នុងទឹកដីបារាំង នៅថ្ងៃចន្ទនោះទេ។
លោក Souleïma Kerimov អាយុ ៥១ឆ្នាំ ត្រូវបានទស្សនាវដ្តី Forbes ចាត់ទុកចូលក្នុងចំណាត់ថ្នាក់ លេខ២១ ជាមហាសេដ្ឋី ដែលមានប្រាក់ច្រើនជាងគេ ៧ពាន់លានដុល្លារ។ លោក Souleïma Kerimov បានទាញយកប្រយោជន៍ពីការដួលរលំនៃសហភាពសូវៀតដើម្បី គ្រប់គ្រងសហគ្រាសផលិតជីគីមីធំជាងគេលើពិភពលោក។ ជាម្ចាស់ក្លិបបាល់ទាត់ និងម្ចាស់អណ្តូងរ៉ែមាស មហាសេដ្ឋី និងជាសមាជិកព្រឹទ្ធសភារុស្ស៊ីរូបនេះ បានចំណាយលុយរាប់លានអឺរ៉ូ ដើម្បីទិញ វីឡា និងអចលនទ្រព្យសំខាន់ៗជាច្រើន នៅភាគខាងត្បូងប្រទេសបារាំង។ ការចោទប្រកាន់លើសមាជិកព្រឹទ្ធសភារុស្ស៊ី ធ្វើឡើងនៅក្រោយការស៊ើបអង្កេត ប្រមាញ់រយៈពេល៣ឆ្នាំ របស់ប៉ូលិសប្រឆាំងការគេចពន្ធរបស់បារាំង។ តាមអាជ្ញាធរពន្ធដារបារាំង មហាសេដ្ឋីរុស្ស៊ី បានបន្លំ ប្រើជនជាតិបារាំង និងស្វ៊ីស ដើម្បី ទិញ អចលនទ្រព្យ នៅបារាំង និងបានកុហក មិនប្រកាសតម្លៃទ្រព្យសម្បត្តិពិតប្រាកដ ដើម្បីលួច គេចមិនបង់ពន្ធរដ្ឋបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ