លោកប្រមុខរដ្ឋបារាំងអេម៉ានុយអែល ម៉ាក្រុងផ្តើមទស្សនកិច្ចមួយជុំទ្វីបអាហ្រ្វិកលើកទី១
នៅថ្ងៃចន្ទ ទី២៧ វិច្ឆិកា លោកប្រធានាធិបតីបារាំងអេម៉ានុយអែល ម៉ាក្រុងផ្តើមទស្សនកចិ្ចមួយជុំទ្វីបអាហ្រ្វិក។ នេះជាទស្សនកិច្ចលើកទី១ តាំងពីលោកឡើងកាន់តំណែងប្រធានាធិបតីបារាំង។ មានប្រទេសអាហ្រ្វិកចំនួន ៣ គឺបួគីណា ហ្វាសូ កូតឌីវ័រ និងប្រទេសហ្កាណាដែលលោកម៉ាក្រុងអញ្ជើញទៅធ្វើទស្សនកិច្ច។ គោលដៅ គឺពង្រឹងឡើងវិញនូវទំនាក់ទំនងរវាងបារាំង និងអាហ្រ្វិក ពិសេសស្តារឡើងវិញនូវរូបភាព និងឥទ្ធិពលរបស់បារាំងនៅក្នុងតំបន់។ ក្រៅពីនោះ លោកម៉ាក្រុងក៏និយាយផងដែរពីភាពជាដៃគូក្នុងវិស័យសេដ្ឋកិច្ច ឧស្សាហកម្ម អប់រំ កីឡា និងថាមពលកើតឡើងវិញ។
ចុះផ្សាយនៅថ្ងៃ៖
ស្តាប់ - ០២:០៨
ប្រទេសអាហ្រ្វិកដែលលោកម៉ាក្រុងទៅទស្សនកិច្ចមុនគេ គឺបួគីណា ហ្វាសូដែលលោកម៉ាក្រុងត្រូវឡើងថ្លែងសុន្ទកថានយោបាយនៅចំពោះមុខនិស្សិតប្រមាណជា ៨០០នាក់ក្នុងមហាវិទ្យាល័យ Ouagadougou នាថ្ងៃអង្គារ ទី២៨ វិច្ឆិកា ហើយត្រូវឆ្លើយនឹងសំណួររបស់និស្សិតទាំងនោះ។ វិមានប្រធានាធិបតីបារាំងបានទទួលស្គាល់ថា វត្តមានមហាជនជានិស្សិតនាឱកាសនោះមិនមែនជារូបភាពល្អប៉ុន្មានទេសម្រាប់បារាំង ពិសេសតាំងពីលោក Blaise Compaoré ត្រូវបានបាតុករមហាជនទម្លាក់ពីអំណាចប្រធានាធិបតីបួគីណា ហ្វាសូក្នុងឆ្នាំ ២០១៤ និងដែលបារាំងបានជួយអន្តរាគមន៍ជម្លៀសលោក Blaise Compaoré ឲ្យទៅជ្រកកោណក្នុងប្រទេសកូតឌីវ័រ។
ទន្ទឹមគ្នានេះ បួគីណា ហ្វាសូក៏បានទាមទារបារាំងឲ្យចាប់បញ្ជូនប្អូនប្រុសលោក Blaise Compaoré គឺលោក François Compaoré ទៅឲ្យអាជ្ញាធរបួគីណា ហ្វាសូវិញ។ លោក François Compaoré ដែលកំពុងជាប់ដីការចាប់ខ្លួនអន្តរជាតិបានជាប់ចោទពីបទឃាតកម្មសម្លាប់អ្នកកាសែតម្នាក់កាលពីឆ្នាំ ១៩៩៨។ នាឱកាសវត្តមានលោកម៉ាក្រុងក្នុងទឹកដីបួគីណា ហ្វាសូ អង្គការក្នុងស្រុកជាច្រើនបានអំពាវនាវឲ្យធ្វើបាតុកម្មប្រឆាំងនឹងវត្តមានទាហានបារាំង ការបូមយកធនធានធម្មជាតិពីសំណាក់រោងចក្រ សហគ្រាសបារាំង និងការរក្សាទុករូបិយប័ណ្ណ Franc CFA សល់ពីសម័យអាណានិគម។
បន្ទាប់ពីបួគីណា ហ្វាសូ លោកម៉ាក្រុងបន្តទស្សនកិច្ចទៅកាន់ប្រទេសកូតឌីវ័រដើម្បីចូលរួមជំនួបកំពូលអឺរ៉ុប អាហ្រ្វិក។ អាទិភាពរបស់លោកម៉ាក្រុងនៅក្នុងជំនួបកំពូលអឺរ៉ុប អាហ្រ្វិក គឺទទួលបានការគាំទ្រផ្នែកហិរញ្ញវត្ថុពីអឺរ៉ុបសម្រាប់កម្លាំងប្រយុទ្ធប្រឆាំងភេរវនិយមនៅក្នុងតំបន់ Sahel និងសម្រាប់យុទ្ធនាការប្រឆាំងនឹងក្រុមឈ្មួញនាំជនអន្តោប្រវេសន៍មកកាន់អឺរ៉ុបដែលមានជនអន្តោប្រវេសន៍ខ្លះត្រូវបានគេទិញ លក់ដូចជាទាសករ។ ប្រទេសចុងក្រោយនៃទស្សនកិច្ចរបស់លោកម៉ាក្រុង គឺហ្កាណាដែលមិនមែនជាប្រទេសនិយាយភាសាបារាំងទេ តែលោកម៉ាក្រុងចង់បង្ហាញពីការខិតចូលជិតរបស់បារាំងជាមួយប្រទេសអាហ្រ្វិកផ្សេងដែលមិនមែនជាអតីតអាណានិគមបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ