លោកប្រធានាធិបតីបារាំងម៉ាក្រុងព្រមានតួកគីពីឆន្ទៈចូលឈ្លានពានប្រទេសស៊ីរី
នៅក្នុងប្រទេសបារាំង លោកប្រធានាធិបតីអេម៉ានុយអែល ម៉ាក្រុងបានចេញមុខព្រមានតួកគីត្រង់ៗពីឆន្ទៈចូលឈ្លានពានប្រទេសស៊ីរី។ ការព្រមានរបស់ប្រមុខរដ្ឋបារាំងពេលនេះបានធ្វើឡើង ចំពេលដែលកម្លាំងទ័ពអាកាសតួកគី រួមជាមួយកម្លាំងសម្ព័ន្ធមិត្តអារ៉ាប់កំពុងបន្តការវាយប្រហារលើពួកគួដឌីស្ថាននៅតំបន់អាហ្រ្វីនក្នុងទឹកដីស៊ីរី។ សូមជម្រាបជូនថា ពួកគួដឌីស្ថានស៊ីរីត្រូវបានអាមេរិក និងប្រទេសលោកខាងលិចមួយចំនួនចាត់ទុកជាសម្ព័ន្ធមិត្តនៅក្នុងយុទ្ធនាការប្រឆាំងនឹងពួកជីហាតអង្គការរដ្ឋអ៊ីស្លាម។ តែតួកគីចាត់ទុកជាពួកភេរវជន។
ចុះផ្សាយនៅថ្ងៃ៖
ប្រតិកម្មព្រមានរបស់លោកប្រមុខរដ្ឋបារាំងម៉ាក្រុងត្រូវបានកាសែតបារាំងមួយឈ្មោះ Le figaro ចុះផ្សាយនៅក្នុងអត្ថបទមួយលើគេហទំព័ររបស់ខ្លួននាថ្ងៃពុធ ទី៣១ មករា។ លោកម៉ាក្រុងបានបញ្ជាក់ច្បាស់ៗថា លោកមិនជំទាស់ទេ ប្រសិនបើការវាយប្រហាររបស់ទ័ពតួកគីមានគោលដៅកម្ទេចពួកភេរវជនដែលកំពុងគំរាមកំហែងនៅតាមបណ្តោយព្រំដែនតួកគីមែននោះ តែអ្វីដែលលោកបារម្ភ គឺខ្លាចតែប្រតិបត្តិការមួយនេះមានឆន្ទៈ និងគោលដៅចូលឈ្លានពានទឹកដីស៊ីរី។ បើវាដូច្នេះមែន កិច្ចសហប្រតិបត្តិការនោះពិតជាបង្កឲ្យមានបញ្ហាដល់យើងជាមិនខាន នេះជាការបន្ថែមរបស់លោកម៉ាក្រុង។
ជាថ្មីម្តងទៀត លោកម៉ាក្រុងបានអំពាវនាវឲ្យមានការប្រុងប្រយ័ត្ន និងភាពអត់ធ្មត់ រួចលើកឡើងពីក្តីបារម្ភរបស់បារាំង។ តាមលោកម៉ាក្រុង ប្រតិបត្តិការដឹកនាំដោយតួកគីពេលនេះគួរតែមានការជជែក និងការសម្រេចរវាងប្រទេសអឺរ៉ុប ពិសេសក្រុមសម្ព័ន្ធមិត្ត និងថា លោកនឹងលើកយកបញ្ហានេះទៅជជែកជាមួយលោកប្រធានាធិបតីតួកគីអ៊ែរដូហ្កាននាពេលខាងមុខ។ លោកម៉ាក្រុងបានបញ្ជាក់ពីបំណងចង់ធ្វើការជាមួយហ្សកដានីដែលជាប្រទេសទទួលជនភៀសខ្លួនច្រើនជាងគេ និងដែលលោកចាត់ជាតួអង្គសំខាន់នៅក្នុងដំណើរស្វែងរកដំណោះស្រាយរួមមួយជាមួយប្រទេសអារ៉ាប៊ីសាអូឌីត អាមេរិក និងប្រទេសអេហ្ស៊ីប។
លោកម៉ាក្រុងបានយល់ឃើញថា ហេតុផលស្ថិរភាព និងការ ការពារព្រំដែនដែលលើកឡើងដោយតួកគីជារឿងត្រឹមត្រូវ តែគេមិនអាចមានសន្តិសុខនៅលើទឹកដីខ្លួនឯងដោយមិនគោរពអធិបតេយ្យប្រទេសស៊ីរីដោយចូលវ៉ៃពួកគួដឌីស្ថានដែលលែងជាពួកជីហាតអង្គការរដ្ឋអ៊ីស្លាមនោះទេ។ លោកនាយករដ្ឋមន្រ្តីតួកគីប៊ីណាលី យីលឌីរីមបានឆ្លើយតបភ្លាមៗថា គំនិតយល់ឃើញរបៀបនេះរបស់លោកម៉ាក្រុងមិនត្រឹមត្រូវទាល់តែសោះ និងថា ពិភពលោកដឹង និងត្រូវតែដឹងថា តួកគីមិនមែនធ្វើសកម្មភាពក្នុងគោលដៅឈ្លានពានទេ។
តាមលោកយីលឌីរីម កម្មវត្ថុនៃប្រតិបត្តិការរបស់តួកគីនៅអាហ្រ្វីនក្នុងទឹកដីស៊ីរីពេលនេះមិនខុសគ្នានឹងប្រតិបត្តិការដែលតួកគីបានធ្វើនៅប៉ែកខាងជើងស៊ីរីកាលពីខែសីហា ឆ្នាំ ២០១៦ នោះឡើយ ពោលកំចាត់ពួកជីហាតអង្គការរដ្ឋអ៊ីស្លាម និងកម្លាំងប្រដាប់អាវុធគួដឌីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ