សន្និសីទអន្តរជាតិស្តីពីជំងឺអេដស៍ បារម្ភពីការងើបឡើងវិញនៃការឆ្លងមេរោគហ៊ីវ
សន្និសីទអន្តរជាតិស្តីពីជំងឺអេដស៍ឈានចូលដល់ថ្ងៃទី២។ សន្នីសីទពេញអង្គ ដែលមានតំណាងប្រតិភូរាប់ពាន់នាក់ ចូលរួម បានចាប់ផ្តើមជជែកគ្នាអំពីសំណុំរឿងស្នូល ស្តីអំពីក្តីបារម្ភ ចំពោះការងើបឡើងវិញនៃការឆ្លងមេរោគ HIV ។ ចំនួនមនុស្ស ឆ្លងវីរ៉ុសហ៊ីវ បានកើនឡើងដល់កំរិតកំពូល ពោលគឺប្រមាណជិត ៣៧លាននាក់ នៅទូទាំងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លែងសូវប្រុងប្រយ័ត្នក្នុងកិច្ចការពារ បូកផ្សំនឹងកញ្ចប់ថវិកាអន្តរជាតិចុះថយ ការឆ្លងមេរោគហ៊ីវ បានស្ទុះងើបឡើងវិញ ! នេះជាការព្រួយបារម្ភរបស់អ្នកស្រាវជ្រាវ សកម្មជននិងអ្នកមានផ្ទុកវីរ៉ុសហ៊ីវ រាប់ពាន់នាក់ ដែលបាននិងកំពុងជួបជុំគ្នាក្នុងសន្និសីទអន្តរជាតិស្តីអំពីជំងឺអេដស៍ តាំងពីថ្ងៃចន្ទមក។ នៅក្នុងប្រទេសមួយចំនួនផ្សេងខ្លះទៀត ការស្ទុះងើបឡើងវិញនៃការចម្លងមេរោគហ៊ីវ ឬស៊ីដា គឺបណ្តាលមកពីការរឹតបន្តឹងច្បាប់ប្រឆាំងនឹងការប្រើប្រាស់គ្រឿងញៀន ទើបមានការប្រើប្រាស់ម្ជុលរួមគ្នាច្រើន។ នេះបើតាមការអះអាងរបស់អង្គសន្និសីទដដែល។
បើតាមសេចក្តីប្រកាសរបស់ប្រធានសហគ្រាសអន្តរជាតិស្តីពីជំងឺអេដស៍ តំបន់ដែលបន្តមានកំណើន និងអ្នកឆ្លងមេរោគហ៊ីវច្រើនជាងគេ ក្នុងកំរិតដល់ទៅ ៣០% គិតចាប់តាំងពីឆ្នាំ២០១០មក គឺតំបន់អឺរ៉ុបខាងកើត និងអាស៊ីកណ្តាល ព្រមទាំងរុស្ស៊ីផង។ ការចាក់គ្រឿងញៀន ជាមូលហេតុដ៏សំខាន់នៃកំណើនសម្រាប់តំបន់នេះ។ ហេតុដូច្នេះហើយបានជាក្រុមសមាគមប្រយុទ្ធប្រឆាំងនឹងជំងឺអេដស៍ បានស្នើទៅកាន់សន្និសីទអន្តរជាតិលើកទី២២នេះ ឱ្យធ្វើយុទ្ធនាការ ក្រោមពាក្យស្លោកថា “ថាទេនឹងសង្គ្រាមប្រឆាំងគ្រឿងញៀន"។
បច្ចុប្បន្ននេះ ពិភពលោករាប់ឃើញមានអ្នកឆ្លងមេរោគអេដស៍ ដល់ទៅ ជិត៣៧លាននាក់។ ជាចំនួនដ៏ច្រើនបំផុតមិនធ្លាប់មានទេ។ មានន័យថាកម្មវត្ថុរបស់អង្គការសហប្រជាជាតិ ចង់ទប់ស្កាត់មិនឱ្យមានចម្លងមេរោគស៊ីដាថ្មី នៅឆ្នាំ២០២០ មិនអាចសម្រេចបានទេ ព្រោះនៅមានតំបន់ជាច្រើនលើភពផែនដី ដែលប្រជាពលរដ្ឋគ្មានមធ្យោបាយទទួលបានសេវាការពារ និងសេវាព្យាបាល។
ថ្វីបើការប្រយុទ្ធប្រឆាំងនឹងជំងឺអេដស៍វិវឌ្ឍលឿនខ្លាំងក៏ដោយ ក៏ប៉ុន្តែដំណើរបិទបញ្ចប់ជំងឺស៊ីដា នៅយឺតខ្លាំងណាស់។ ដើម្បីលុបបំបាត់ការគំរាមកំហែងនៃជំងឺអេដស៍ចំពោះសុខភាពសាធារណៈ ឱ្យបាន នៅឆ្នាំ២០៣០ អង្គការសហប្រជាជាតិ នៅខ្វះថវិកាប្រមាណដល់៧ពាន់លាន ក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ