ប្រមុខរដ្ឋបារាំង៖ការអប់រំក្មេងស្រីជាកាតព្វកិច្ចចំបងរបស់ពិភពលោក
ប្រធានាធិបតីបារាំង នាយករដ្ឋមន្ត្រីអង់គ្លេសនិងនាយករដ្ឋមន្ត្រីកាណាដា បានអំពាវនាវកាលពីម្សិលមិញអោយបណ្តាប្រទេសនៅលើពិភពលោក បង្កើនការខិតខំប្រឹងប្រែងជាទ្វេគុណដើម្បីអោយក្មេងស្រីរាល់រូបបានទទួលការអប់រំយ៉ាងត្រឹមត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
លោក Emmanuel Macron លោកស្រី Theresa May និង លោក Justin Trudeau បានអំពាវនាវរួមគ្នាកាលពីម្សិលមិញ អោយអ្នកដឹកនាំក្នុងពិភពលោក បង្កើនការខិតខំប្រឹងប្រែងថែមទៀត ដើម្បីអោយក្មេងស្រីនៅក្នុងពិភពលោកទំាងមូល បានទទួលការអប់រំយ៉ាងត្រឹមត្រូវ។
ជាការអំពាវនាវមួយដែលថ្នាក់ដឹកនាំបារាំង អង់គ្លេសនិងកាណាដា បានធ្វើឡើងនៅក្រៅក្របខ័ណ្ឌនៃមហាសន្និបាតប្រចាំឆ្នាំរបស់អ.ស.ប. នៅទីក្រុងញូយ៉ក។ ប្រមុខដឹកនាំទាំង៣រូបនោះ បានថ្លែងសង្កត់ពាក្យទៀតថា បើសិនជាក្មេងស្រីនៅលើលោក ពុំបានទទួលការអប់រំយ៉ាងត្រឹមត្រូវទេនោះ ប្រជាជាតិនៅលើលោក ទៅថ្ងៃមុខទៅ នឹងខាតបង់ផលិតភាពរបស់ខ្លួន ជាពិសេស ការប្រឈមនឹង អស្ថិរភាពនិងបញ្ហាសង្គ្រាម។
រីឯក្រុមអ្នកជំនាញវិញ បានវាយតម្លៃថា បើក្មេងស្រីនៅលើលោក ពុំបានទទួលការអប់រំទេនោះ ពួកគេអាចប្រឈមនឹងគ្រោះថ្នាក់មួយចំនួន ដូចជារៀបការនៅមុនអាយុពេញវ័យ ឬក៏សុខភាពពុំល្អ ឬ ក៏អត់ការងារធ្វើ និងភាពក្រីក្រជាដើម។ ក្រុមអ្នកជំនាញ បានបន្តទៀតថា ក្មេងស្រីជាង ១៣០លាននាក់នៅលើលោក ដែលភាគច្រើនរស់នៅក្នុងតំបន់អសន្តិសុខ ដោយសារសង្គ្រាមឬក៏ដោយសារតែភាពក្រីក្រខ្លាំង ពុំបានចូលសាលារៀនទេ ដែលជាមួលហេតុមួយដ៏ចម្បងនៅក្នុងការខាតបង់ប្រាក់ចំណូលប្រមាណជាង ៣០ពាន់លានដុល្លារ។
ចំពោះប្រធានាធិបតីបារាំង“ការសិក្សា គឺជាវិនិយោគមួយដ៏សំខាន់បំផុតមួយ ហើយបើមនុស្សគ្រប់រូប ពុំបានទទួលការអប់រំត្រឹមត្រូវនោះទេ នោះពិភពលោក ក៏ត្រូវប្រុងប្រៀបឲ្យហើយទៅ នៅក្នុងការប្រឈមនឹងគ្រោះមហន្តរាយនានា ។ លោកប្រធានាធិបតីបារាំង បានសង្កត់ពាក្យទៀតថា ៖ ការអប់រំណាដែលមានគុណភាព ត្រូវតែដាក់បញ្ចូលនៅក្នុងបទដ្ឋានវប្បធម៌និងសង្គម ដើម្បីដោះស្រាយនៅលើបញ្ហាវិសមភាពរវាងភេទ។
គួរបញ្ជាក់ថា ការធានាឲ្យមនុស្សរាល់រូប បានទទួលការអប់រំប្រកបដោយគុណភាពនេះ គឺជាគោលដៅមួយក្នុងចំណោមគោលដៅទាំង១៧របស់ពិភពលោក ដែលត្រូវបានអនុម័តជាឯកច្ឆន្ទកាលពី ៣ ឆ្នាំមុន ដោយបណ្តារដ្ឋសមាជិករបស់ អ.ស.ប. ក្នុងការលុបបំបាត់បញ្ហាធំៗ ដូចជាភាពក្រីក្រនិងវិសមភាពជាដើម ចាប់ពីអំណឹះតទៅរហូតដល់ឆ្នាំ២០៣០ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ