ការប្រកួតបាល់ទាត់ស្ត្រីពិភពលោក ចាប់បើកជាមួយនឹងក្តីសង្ឃឹមខ្លាំងរបស់បារាំង
ការប្រកួតបាល់ទាត់ស្ត្រីដណ្តើមពានរង្វាន់ពិភពលោក ឆ្នាំ ២០១៩ ត្រូវចាប់បើកធ្វើនៅថ្ងៃទី ៧ មិថុនា រហូតដល់ថ្ងៃទី ៧ កក្កដា នៅប្រទេសបារាំង។ ជាសរុបមានប្រទេសចំនួន ២៤ បានមកចូលប្រកួតកីឡាខ្នាតអន្តរជាតិ ដែលរៀបចំធ្វើជារៀងរាល់បួនឆ្នាំម្តង។ ក្នុងនាមជាម្ចាស់ផ្ទះ ក្រុមកីឡាបាល់ទាត់ស្ត្រីបារាំង ត្រូវប្រកួតបើកកម្មវិធី ជាមួយក្រុមកីឡាករប្រទេសកូរ៉េខាងត្បូង នៅវេលាម៉ោង៩ល្ងាចម៉ោងនៅប្រទេសបារាំង។ បារាំងសង្ឃឹមជាពិសេសនៅលើកនេះ ថានឹងដណ្តើមបានពានរង្វាន់ជាជើងឯកពិភពលោកជាលើកដំបូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ក្រុមកីឡាបាល់ទាត់ស្ត្រីបារាំង ពុំទាន់បានចារក្នុងប្រវត្តិបាល់ទាត់ជាជើងឯកទេ ! កីឡាការិនីបារាំង បានត្រឹមឆ្លងរួចដល់ដំណាក់កាលមួយភាគ៨ ចំនួនបីដង ក្នុងការប្រកួតធំៗបីលើកចុងក្រោយ និងបានឡើងដល់ពាក់កណ្តាលផ្តាច់ព័ត្រម្តងកាលពីសម័យប្រកួតបាល់ទាត់ស្ត្រីពិភពលោកឆ្នាំ២០១១។ កន្លងមក និងតាំងពីឆ្នាំ១៩៩១មក ក្រុមកីឡាការិនីបាល់ទាត់បារាំង មិនដែលប្រកួតឈ្នះក្នុងដំណាក់កាលមួយភាគបួនទេ។
ប៉ុន្តែនៅលើកនេះ ក្រុមបារាំង ស្ថិតនៅក្នុងចំណោមក្រុមកីឡាការិនី៥ប្រទេសដែលមានប្រជាប្រិយភាពខ្ពស់ជាងគេ (បារាំង-សហរដ្ឋអាមេរិក-ជប៉ុន-អង់គ្លេស និងអាល្លឺម៉ង់)។ ម្យ៉ាងទៀត ការប្រកួតនៅក្នុងទឹកដីរបស់ខ្លួន អាចជាការផ្តល់សំណាង និងលើកទឹកចិត្តខ្លាំងដល់ក្រុមកីឡាការិនី។ ការប្រកួតបាល់ទាត់អឺរ៉ុបឆ្នាំ១៩៨៤ បាល់ទាត់ពិភពលោក ឆ្នាំ១៩៩៨ រៀបចំធ្វើបារាំង សុទ្ធតែបាននាំបារាំងឱ្យក្លាយជាជើងឯកទាំងអស់។ បើដូច្នេះនៅលើកនេះ ក្រុមកីឡាបាល់ទាត់ស្ត្រីបារាំង នឹងអាចមានសំណាងក្លាយជាជើងឯកទទួលពានរង្វាន់ពិភពលោកជាលើកទីមួយ ដូចអ្វីដែលក្រុមកីឡាបាល់ទាត់បុរសធ្លាប់សម្រេចបានកាលពីឆ្នាំ១៩៩៨ឬ ?! ក្រុមកីឡាការិនីបាល់ទាត់បារាំង កំពុងស្រមៃ និងបានបង្ហាញមហិច្ឆតាដណ្តើម យកជ័យជំនះនៅលើកនេះខ្លាំងណាស់។
យ៉ាងណាក៏ដោយ ក៏ក្រុមកីឡាការិនីបាល់ទាត់បារាំងអាចសង្ឃឹមនិងមានមោទនភាពបាន ព្រោះការរៀបចំប្រកួតបាល់ទាត់ពិភពលោកស្ត្រី នៅក្នុងប្រទេសបារាំងនេះ មានទម្រង់និងសណ្ឋាន ជាលើកទីមួយ ប្រហាក់ប្រហែលនឹងការប្រកួតបាល់ទាត់ពិភពលោកបុរស។
នេះជាលើកទីមួយដែលបារាំងទទួលរៀបចំការប្រកួតបាល់ទាត់ស្ត្រីពិភពលោក ! និងជាលើកទី៦ដែលបារាំងរៀបចំព្រឹត្តិការណ៍កីឡាកំរិតអន្តរជាតិ។ ៥លើកមុន សុទ្ធតែជាការប្រកួតបាល់ទាត់បុរសទាំងអស់ ! (លើកទីមួយ នៅឆ្នាំ១៩៣៨ ទីពីរទីបីជាការប្រកួតបាល់ទាត់អឺរ៉ុបឆ្នាំ១៩៦០ និង១៩៨៤ លើកទីបួននៅឆ្នាំ១៩៩៨ ជាការប្រកួតបាល់ទាត់ពិភពលោក និងបាល់ទាត់អឺរ៉ុបនៅឆ្នាំ២០១៦)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ