សម្តេចប៉ាប ប្រារព្វទិវាអន្តោប្រវេសន៍និងភៀសខ្លួនពិភពលោក លើកទី ១០៥
ទិវាអន្តោប្រវេសន៍និងជនភៀសខ្លួនពិភពលោក ត្រូវបានបង្កើតឡើងដោយបុរីវ៉ាទីកង់។ នៅក្នុងពិធីសូត្រធម៌ នាថ្ងៃអាទិត្យទី ២៩ កញ្ញា ដើម្បីប្រារព្វខួបលើកទី ១០៥ នៃការបង្កើតទិវានេះ សម្តេចប៉ាប ហ្វ្រង់ស័រ បានថ្លែងអំពាវនាវឱ្យពិភពលោកព្រមផ្តល់ការយកចិត្តទុកដាក់ពិសេសដល់ជនបរទេស និងគ្រប់ជនដែលជាគេមិនចង់រាប់រក។ ជាមួយគ្នានេះដែរសម្តេចប៉ាប បានសម្ពោធតាំងរូបចម្លាក់ឧទ្ទិសដល់ជនអន្តោប្រវេសន៍ នៅទីលានមុខបុរីវ៉ាទីកង់។
ចុះផ្សាយនៅថ្ងៃ៖
ស្តាប់ - ០២:២៤
ទិវានេះមានប្រធានបទដដែលៗ គឺដូចជាចម្រៀងបន្ទរ ប្រាប់ពិភពលោកឱ្យផ្តល់ការយកចិត្តដាក់ជាពិសេស មិនមែនត្រឹមតែដល់ជនអន្តោប្រវេសន៍ និងជនបរទេសទេ គឺដល់មនុស្សម្នាគ្រប់រូបដែលជាមួយជនភៀសខ្លួន និងជនអន្តោប្រវេសន៍ ក្លាយជនរងគ្រោះពុំមានអ្នករាប់រកក្នុងសម័យថ្មី។ នេះជាសង្ឃដីការបស់សម្តេចប៉ាប នាឱកាសសម្ពោធ តាំងរូបចម្លាក់ ធ្វើសំរិទ្ធនិងដីឥដ្ឋ នៅមុខទីលាន Saint Pierre ឧទ្ទិសដល់អន្តោប្រវេសន៍និងជនភៀសខ្លួនពិភពលោក។
រចនាដោយជាងស្មូនជាតិកាណាដា Timothy Schmalz ដែលគេប្រសិទ្ធិនាមថា Angels Unaware រូបចម្លាក់តំណាងឱ្យជនអន្តោប្រវេសន៍១៤០នាក់ ចម្រុះជាតិសាសន៍វប្បធម៌ និងសម័យផ្សេងគ្នា ប្រជ្រៀតផ្តុំគ្នាលើទូកមួយ ជាមួយនឹងសារឆ្លាក់ថា “កុំភ្លេចបដិសណ្ឋាកិច្ច អ្នកខ្លះធ្វើដោយមិនដឹងខ្លួន ព្រមទទួលពួកទេវតា”។
សម្តេចប៉ាបផ្ទាល់ ក៏មានប្រវត្តិគ្រួសារជាអន្តោប្រវេសន៍អាហ្សង់ទីនមកនៅអ៊ីតាលី។ តាំងពីព្រះអង្គបានក្លាយជាសម្តេចប៉ាប នៅខែមីនា ឆ្នាំ២០១៣មក សម្តេចបានបង្កើននិងប្រកាសប្រកាន់ជំហរជាក់លាក់នយោបាយទទួលជនភៀសខ្លួននិងអន្តោប្រវេសន៍។ ពីរបីខែក្រោយជាប់ឆ្នោតជាសម្តេចប៉ាប ព្រះអង្គបានយាងទៅបំពេញទស្សនកិច្ចនៅលើកោះ Lampedusa កោះដែលមានលំហូរអន្តោប្រវេសន៍មកអឺរ៉ុបដ៏សំខាន់ជាងគេបំផុតមួយ។ នៅខែមេសាឆ្នាំ២០១៦ សម្តេចប៉ាប ពេលធ្វើដំណើរទៅកោះក្រិក Lesbos បានទទួលយកគ្រួសារជនភៀសខ្លួនស៊ីរី កាន់សាសនាអ៊ីស្លាមបីគ្រួសារ ឱ្យមករស់នៅវ៉ាទីកង់។ កាលពីចុងខែកក្កដា សម្តេចប៉ាប បានអំពាវនាវឱ្យសហគមន៍អន្តរជាតិ បញ្ចេញសកម្មភាព ដោយរួសរាន់ និងសម្រេចចិត្តភ្លាម ដើម្បីបញ្ចៀសឱ្យមានរឿងសោកសៅក្នុងសមុទ្ទកើតឡើងទៀត។
សូមបញ្ជាក់ថា តាំងពីឆ្នាំ២០១៣មក អឺរ៉ុបបានស្គាល់វិបត្តិអន្តោប្រវេសន៍រត់តាមទូកឆ្លងសមុទ្ទមេឌីទែរ៉ាណេ យ៉ាងធ្ងន់ធ្ងរជាប្រវត្តិសស្ត្រ។ បើតាមអង្គការអន្តោប្រវេសន៍អន្តរជាតិ (OIM) នៅចន្លោះពីថ្ងៃទី ១មករា ២០១៤ ដល់ថ្ងៃទី ៣០កក្កដា ២០១៨ គេស្រង់សាកសពមនុស្សស្លាប់៥៧៧៣នាក់ និង១១០៨៩នាក់បាត់ខ្លួន។ ដើម្បីសាកល្បងបញ្ចប់ហេតុការណ៍ស្លាប់មនុស្សទាំងហ្វូងក្នុងសមុទ្ទ ក្រុមប្រទេសនៅអឺរ៉ុបជាច្រើន (អ៊ីតាលី បារាំង ម៉ាល់ត៍) បានរៀបចំឱ្យមានយន្តការបែងចែងជាអន្តោប្រវេសន៍ជាស្វ័យប្រវត្តិ។ វិធានការនេះនឹងត្រូវអនុម័តនៅក្នុងជំនួបប្រជុំក្រុមប្រឹក្សានៅដើមតុលាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ