វិបត្តិអ៊ុយក្រែន៖កិច្ចព្រមព្រៀងសន្តិភាពត្រូវបានរកឃើញនៅនាទីចុងក្រោយ
នៅថ្ងៃព្រហស្បតិ៍ ទី១២ កុម្ភៈនេះ កិច្ចព្រមព្រៀងសន្តិភាពមួយត្រូវបានរកឃើញសម្រាប់វិបត្តិនៅអ៊ុយក្រែន។ គឺជាលទ្ធផលដែលបានមកពីជំនួបចរចារយៈពេល ១៦ម៉ោងរវាងលោកប្រធានាធិបតីរុស្ស៊ីពូទីន លោកប្រធានាធិបតីអ៊ុយក្រែនប៉ូរ៉ូឆេនកូ លោកប្រធានាធិបតីបារំាងហូឡង់ និងលោកស្រីប្រមុខរដ្ឋាភិបាលអាល្លឺម៉ង់មែរកែលនៅក្នុងទីក្រុងមីនស្កិ៍ ប្រទេសបេឡារុស។ គួរជម្រាបជូនថា គឺនៅក្នុងទីក្រុងមីនស្កិ៍ដដែលនេះហើយដែលភាគីជម្លោះធ្លាប់បានចុះកិច្ចព្រមព្រៀងឈប់បាញ់កាលពីខែកញ្ញា ឆ្នំា ២០១៤ កន្លងទៅ តែគ្មានភាគីណាមួយបានគោរពត្រឹមត្រូវទេ។ យ៉ាងណាក៏ដោយ កិច្ចព្រមព្រៀងទីក្រុងមីនស្កិ៍ថ្ងៃនេះត្រូវបានគ្រប់គ្នាយល់ឃើញថា ជាក្តីសង្ឃឹមថ្មីសម្រាប់បញ្ចប់វិបត្តិអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៧
ទំរំាតែរកឃើញនូវកិច្ចព្រមព្រៀងមួយដែលអាចទទួលយកបានទំាងអស់គ្នា គេបានចំណាយពេលអស់ ១៦ម៉ោងដែលបង្កប់ដោយភាពតានតឹង និងការដាក់លក្ខខណ្ឌឲ្យគ្នាទៅវិញ ទៅមក ពិសេសលក្ខខណ្ឌរបស់លោកប្រធានាធិបតីពូទីនតបនឹងលក្ខខណ្ឌរបស់លោកប្រធានាធិបតីអ៊ុយក្រែនប៉ូរ៉ូឆេនកូ។ ដោយមិនអាចទទួលយកបានទំាងអស់គ្នា លោកប៉ូរ៉ូឆេនកូក៏បានងើបដើរចេញពីតុចរចា រួចលោកពូទីនក៏ក្រោកដើរចេញដែរ។ នៅពេលនោះ គ្រប់គ្នាមានអារម្មណ៍ថា កិច្ចចរចាបានទទួលបរាជ័យរួចបាត់ទៅហើយ។ តែលោកប្រធានាធិបតីបារំាងហូឡង់ និងលោកស្រីនាយករដ្ឋមន្រ្តីអាល្លឺម៉ង់មែរកែលបានព្យាយាមទឹកចុងក្រោយ ដោយនំាគ្នាទៅជួបនិយាយបញ្ចុះបញ្ចូលជាមួយលោកពូទីន និងលោកប៉ូរ៉ូឆេនកូដាច់ដោយឡែកពីគ្នា។ គឺនៅក្រោយជំនួបបញ្ចុះបញ្ចូលដាច់ដោយឡែកពីគ្នានោះហើយដែលភាគីទំាងអស់បានយល់ស្របគ្នាលើកិច្ចព្រមព្រៀងចុងក្រោយមួយដែលគេហៅថា កិច្ចព្រមព្រៀងទីក្រុងមីនស្កិ៍។
ភ្លាមៗនោះ តំណាងរដ្ឋាភិបាលអ៊ុយក្រែន និងតំណាងក្រុមឧទ្ទាមអ្នកទាមទារផ្តាច់ទឹកដីមានទំនោររករុស្ស៊ីក៏បានចុះហត្ថលេខាលើផែនទីចង្អុលផ្លូវមួយដើម្បីអនុវត្តន៍កិច្ចព្រមព្រៀងទីក្រុងមីនស្កិ៍។ មានចំណុចសំខាន់ៗមួយចំនួនដែលភាគីទំាងអស់បានព្រមព្រៀងគ្នា ទី១ បទឈប់បាញ់ដែលនឹងត្រូវផ្តើមអនុវត្តន៍ចាប់ពីអធ្រាត្រយប់ថ្ងៃអាទិត្យ ទី១៥ ខាងមុខ ទី២ បន្ទាប់ពីបទឈប់បាញ់ចូលជាធរមានបាន ២ថ្ងៃហើយ ភាគីអ៊ុយក្រែន និងពួកឧទ្ទាមត្រូវដកអាវុធធន់ធ្ងន់ចេញពីខ្សែបន្ទាត់ដែលខ័ណ្ឌចែកដែនដីអ៊ុយក្រែន និងដែនដីទាមទារដោយពួកឧទ្ទាមក្នុងរយៈពេល ១៤ថ្ងៃ ទី៣ បង្កើតឲ្យមានតំបន់គ្មានកងទ័ពនៅតាមខ្សែបន្ទាត់ដោយមានចម្ងាយពី ៥០ ទៅ ៧០ម៉ែត្រពីខ្សែបន្ទាត់នោះ និងចំណុចទី៤ ដែលគ្រប់គ្នាចាត់ទុកសំខាន់ខ្លំាងជាងគេ គឺលោកពូទីនបានទទួលប្រកាសទទួលស្គាល់ពេញមាត់ពីអធិបតេយ្យ និងបូរណភាពដែនដីរបស់ប្រទេសអ៊ុយក្រែន។
លោកស្រីមែរកែល៖នៅមានឧបសគ្គជាច្រើនទៀតដែលត្រូវដោះស្រាយ
វាហាក់ដូចជារហ័សពេកដែលគេហ៊ានសន្និដ្ឋានថា វិបត្តិអ៊ុយក្រែនបានឈានចូលទីបញ្ចប់។ តែគ្រប់គ្នាបានទទួលស្គាល់ពេញមាត់ថា កិច្ចព្រមព្រៀងទីក្រុងមីនស្កិ៍ថ្ងៃនេះបានធ្វើឲ្យសហគមន៍អន្តរជាតិ ពិសេសសហភាពអឺរ៉ុបធូរចិត្តច្រើន និងក៏ជាក្តីសង្ឃឹមសម្រាប់សន្តិភាពនៅអ៊ុយក្រែនដែរ។ ចូរកុំភ្លេចថា គឺនៅក្នុងទីក្រុងមីនស្កិ៍ ប្រទេសបេឡារុសដដែលនេះហើយដែលភាគីជម្លោះធ្លាប់បានចុះហត្ថលេខាលើបទឈប់បាញ់កាលពីខែកញ្ញា ឆ្នំា ២០១៤ កន្លងទៅ។ តែកិច្ចព្រមព្រៀងកាលណោះត្រូវបានគ្រប់ភាគីរំលោភបំពានមកដល់សព្វថ្ងៃ ហើយការប្រយុទ្ធគ្នានៅតាមសមរភូមិថែមទំាងកើនខ្លំាងជាងមុនទៅទៀត។ ជម្លោះជិត ១ឆ្នំាកន្លងទៅបានបណ្តាលឲ្យមានមនុស្សស្លាប់ជាង ៥ ០០០នាក់។
គេមិនគួរត្រេកត្រអាលខ្លំាងចំពោះកិច្ចព្រមព្រៀងទីក្រុងមីនស្កិ៍ពេលនេះទេ ព្រោះអ្វីៗវាអាស្រ័យលើការអនុវត្តន៍ជាក់ស្តែង និងអាស្រ័យលើឆន្ទៈនយោបាយពិតប្រាកដរបស់ភាគីនីមួយៗ ពិសេសគឺអ៊ុយក្រែន និងរុស្ស៊ី។ ខ្លឹមសារលំអិតត្រូវបានចែងយ៉ាងច្បាស់នៅលើក្រដាស និងដែលភាគីនីមួយៗបានចុះហត្ថលេខាផ្ទាល់ដៃ តែគ្មានអ្វីដែលអាចធានាថា ភាគីហត្ថលេខីច្បាស់ជាអនុវត្តន៍គ្មានចន្លោះនោះទេ។ នៅក្នុងសន្និសីទរួមគ្នាថ្ងៃនេះ លោកប្រមុខរដ្ឋបារំាង និងលោកស្រីប្រមុខរដ្ឋាភិបាលអាល្លឺម៉ង់បានសាទរចំពោះកិច្ចព្រមព្រៀងទីក្រុងមីនស្កិ៍ថ្ងៃនេះ និងថា វាជាការបោះមួយជំហានទៅមុខ តែក៏បានប្រកាសទទួលស្គាល់ថា នៅមានឧបសគ្គធំៗជាច្រើនទៀតដែលភាគីនីមួយៗត្រូវដោះស្រាយ។ គឺលោកហូឡង់ និងលោកស្រីមែរកែលជាអ្នកតាមដានការអនុវត្តន៍លើកិច្ចព្រមព្រៀងទីក្រុងមីនស្កិ៍ថ្ងៃនេះ។
ឧបសគ្គធំជាងគេ និងដែលគ្រប់គ្នាទទួលស្គាល់ថាស្មុគស្មាញខ្លំាងនោះ គឺការកំណត់លក្ខន្តិកឲ្យតំបន់ដែលក្រុមឧទ្ទាមកំពុងទាមទារផ្តាច់ចេញពីអ៊ុយក្រែន។ តើត្រូវផ្តល់លក្ខន្តិកជាតំបន់ស្វ័យត ឬមួយក៏ជាតំបន់ឯករាជ្យ និងថា តើប្រទេសណាមួយជាអ្នកចេញមុខផ្គត់ផ្គង់ចំណាយឲ្យតំបន់នោះ។ មកដល់ពេលនេះ លោកប្រធានាធិបតីរុស្ស៊ីពូទីន និងលោកប្រធានាធិបតីអ៊ុយក្រែនប៉ូរ៉ូឆេនកូបានបដិសេធមិនផ្គត់ផ្គង់លុយកាក់ឲ្យទេ។
អង្គការសហប្រជាជាតិបានអវត្តមាននៅក្នុងជម្លោះអ៊ុយក្រែន
តំាងពីវិបត្តិអ៊ុយក្រែនបានផ្ទុះមក គេឃើញមានតែសហភាពអឺរ៉ុបទេដែលខ្នះខ្នែងជួយដោះស្រាយ ពោលគឺអត់មានវត្តមានក្រុមប្រឹក្សាសន្តិសុខអង្គការសហប្រជាជាតិទេ។ មូលហេតុត្រូវបានគេមើលឃើញថា ដោយសារតែមានវត្តមានតួអង្គរុស្ស៊ីនៅក្នុងវិបត្តិនោះឯង។ រុស្ស៊ីជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ មានន័យថា រុស្ស៊ីមានសិទ្ធិវ៉េតូ។ ដូច្នេះ វាគ្មានប្រយោជន៍អ្វីដែលក្រុមប្រឹក្សាសន្តិសុខចំាបាច់អនុម័តនូវសេចក្តីសម្រេចចិត្តអ្វីទេ ព្រោះបើអនុម័តទៅ គង់តែត្រូវរុស្ស៊ីប្រើសិទ្ធិវ៉េតូប្រឆំាងដដែល។ មួយវិញទៀត ជម្លោះជាមួយលោកពូទីនត្រូវបានគេយល់ថា គួរតែនិយាយជាមួយលោកពូទីនផ្ទាល់ ចៀសជាងប្រើគំនាបគាបសង្កត់លើលោកពូទីន។
ក្រុមអ្នកវិភាគយល់ឃើញថា ដើម្បីអាចឲ្យក្រុមប្រឹក្សាសន្តិសុខធ្វើអ្វីបានច្រើនជាងមុនទាក់ទងនឹងជម្លោះពិភពលោក គឺមានតែការធ្វើកំណែទម្រង់ឲ្យបានស៊ីជម្រៅនៅផ្ទៃក្នុងក្រុមប្រឹក្សាមួយនេះទេ ពោលពង្រីកបន្ថែមនូវចំនួនសមាជិកដែលសព្វថ្ងៃមានតែ ៥ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ