អឺរ៉ុបព្រួយបារម្ភ នឹងអន្តោប្រវេសន៍ខុសច្បាប់ ដ៏សន្ធឹកសន្ធាប់
ទ្វីបអឺរ៉ុប ប្រៀបបានជាស្ថានសួគ៌ សម្រាប់ជនភៀសខ្លួន មកពីតំបន់ក្រីក្រនៅទ្វីបអាហ្វ្រិក។ ជនភៀសខ្លួនបានប្រើប្រាស់ គ្រប់បធ្យោបាយទាំងអស់ ដោយហ៊ានប្តូរជីវិត ដើម្បីឲ្យបានមកដល់ ជាន់ដីអឺរ៉ុប។ ក្នុងរយៈពេល ត្រឹមបីថ្ងៃ ចុងក្រោយនេះ មាននាវាខ្នាតធំៗ ពីរគ្រឿង ដែលដឹកជនអន្តោប្រវេសន៍ ជាច្រើនរយនាក់ ចូលមកសុំសិទ្ធិជ្រកកោននៅអឺរ៉ុប។ ប្រឈមមុខនឹង បញ្ហានេះ សហភាពអឺរ៉ុបបានអំពាវនាវ ឲ្យប្រទេសសមាជិកទាំងអស់ ជួយសហការគ្នា ក្នុងការទប់ស្កាត់អន្តោប្រវេសន៍ខុសច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ជានិច្ចជាកាល គេតែងតែឮដំណឹង ថាមានទូកដឹកជនភៀសខ្លួន មកពីទ្វីបអាហ្វ្រិក លិចនៅកណ្តាលសមុទ្រម៉េឌីទែរ៉ាណេ ហើយម្តងៗ មានមនុស្សស្លាប់រាប់រយនាក់។ សមុទ្រ ម៉េឌីទែរ៉ាណេមិនមែនជាផ្លូវតែមួយទេ ប៉ុន្តែផ្លូវនេះ ជាផ្លូវដែលជិតជាងគេ តែក៏គ្រោះថ្នាក់ជាងគេដែរ។ ប៉ុន្តែពេលនេះ ក្រុមអ្នកជួញដូរ ដឹកជញ្ជូនជនភៀសខ្លួន បានប្រើប្រាស់នាវាដឹកទំនិញធំៗ យកមកដឹកជនអន្តោប្រវេសន៍។
ជាក់ស្តែង នៅថ្ងៃសុក្រ ទី២ មករានេះ មាននាវាមួយគ្រឿង បានអណ្តែតត្រសែត នៅក្នុងសមុទ្រ ម៉េឌីទែរ៉ាណេ ដោយសារក្រុមនាវិក បានរត់ចោលកប៉ាល់ ព្រោះខ្លាចគេចាប់បាន។ កប៉ាល់នេះ ដឹកជនភៀសខ្លួនចំនួន៤៥០នាក់ ដែលសំដៅចូលទៅចតនៅកំពង់ផែ ខាងត្បូងប្រទេសបារាំង។ ដូចគ្នាដែរ កាលពីថ្ងៃពុធ ទី ៣១ ធ្នូ អ៊ីតាលីបានឃាត់ទុកនាវាមួយ ដែលមានដឹកជនអន្តោប្រវេសន៍ ចំនួន ៨០០នាក់។
នេះជាបញ្ហាធំណាស់ សម្រាប់អឺរ៉ុប ព្រោះអឺរ៉ុបគ្មានលទ្ធភាព ទទួលឲ្យជនភៀសខ្លួនទាំងនោះ ស្នាក់នៅ លើទឹកដីខ្លួនទេ។ លោកប្រធានគណកម្មការអឺរ៉ុប បានសន្យាថា នឹងពង្រឹងបេសកកម្មរបស់ភ្នាក់ងារ ត្រួតពិនិត្យព្រំដែនរបស់អឺរ៉ុប ដែលហៅកាត់ថា Frontex។ លោកបានបន្ថែមថា អឺរ៉ុបត្រូវតែធ្វើការកំណត់មុខសញ្ញា និងកំចាយ បណ្តាញបក្សពួក អ្នកដែលរកស៊ី ដឹកជនអន្តោប្រវេសន៍ ចូលមកអឺរ៉ុប ឲ្យបាន។
លោក Jean Claude Juncker បន្តថា វាមិនមែនជាកតព្វកិច្ចរបស់ ប្រទេសអឺរ៉ុប ភាគខាងត្បូង តែម្នាក់ឯងទេ ដែលមានតួនាទី ទប់ស្កាត់ជនអន្តោប្រវេសន៍ តែវាជាតួនាទី របស់ប្រទេសសមាជិក សហភាពអឺរ៉ុបទាំងអស់គ្នា ព្រោះអឺរ៉ុបមានព្រំដែនរួមគ្នា។ ប្រទេសអឺរ៉ុប ទាំងខាងត្បូង ទាំងខាងជើង ត្រូវសាមគ្គីគ្នា។ ការងារនេះ ត្រូវការជាចាំបាច់ នូវកញ្ចប់ថវិកា និងសហប្រតិបត្តិការបច្ចេកទេស ដើម្បីពង្រឹងតូនាទី របស់ ភ្នាក់ងារ Frontex ព្រមទាំងការបង្កើត ក្រុមឆ្មាំព្រំដែន របស់អឺរ៉ុបផ្ទាល់តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ