អឺរ៉ុបកំពុងតក់ស្លុតចំពោះរូបថតកូនក្មេងភៀសខ្លួនស៊ីរីម្នាក់ដេកផ្កាប់មុខស្លាប់លើឆ្នេរសមុទ្រ
ពិភពលោកបាននិងកំពុងបន្តតក់ស្លុតយ៉ាងខ្លំាងចំពោះរូបភាពមួយដែលបង្ហាញឲ្យឃើញយ៉ាងច្បាស់នូវកូនក្មេងម្នាក់ដេកស្លាប់ផ្កាប់មុខនឹងមាត់សមុទ្រក្នុងប្រទេសតួកគី។ កូនក្មេងដែលត្រូវបានគេរកឃើញស្លាប់នៅថ្ងៃពុធ ទី២ កញ្ញានោះ គឺជាជនជាតិស៊ីរីដែលបានរត់ភៀសខ្លួនតាមសមុទ្រជាមួយឱពុក ម្តាយ ព្រមទំាងពលរដ្ឋស៊ីរីផ្សេងទៀតមកកាន់ទ្វីបអឺរ៉ុប តែត្រូវបានស្លាប់ដោយលិចទូក។ រូបភាពកូនក្មេងស្លាប់ និងបុរសម្នាក់បានស្រង់ពីឆ្នេរត្រូវបានកាសែតអឺរ៉ុប និងបណ្តាញសង្គមនំាគ្នាធ្វើអត្ថាធិប្បាយយ៉ាងព្រោងព្រាត។
ចុះផ្សាយនៅថ្ងៃ៖
ស្តាប់ - ០២:១៩
ក្រោយពីមានការផ្សព្វផ្សាយនូវរូបថតកូនក្មេងម្នាក់ដេកស្លាប់ផ្កាប់មុខនៅលើឆ្នេរសមុទ្រក្នុងប្រទេសតួកគីមក ពិភពលោក ពិសេសសហភាពអឺរ៉ុបកាន់តែតក់ស្លុតថែមទៀតចំពោះលំហូរជនភៀសខ្លួន និងជនអន្តោប្រវេសន៍ចូលក្នុងទ្វីបអឺរ៉ុប។ រូបថតសពកូនក្មេងនោះជាសក្ខីកម្មថ្មីមួយទៀតដែលបញ្ជាក់ពីកង្វះសាមគ្គីភាព និងសុឆន្ទៈពិតប្រាកដក្នុងការទទួលយកជនភៀខ្លួន និងជនអន្តោប្រវេសន៍ខុសច្បាប់។ យោងតាមឆ្មំាសមុទ្រតួកគី គួរសពកូនក្មេងជនជាតិស៊ីរីត្រូវបានគេរកឃើញនៅលើឆ្នេរសមុទ្រក្នុងប្រទេសតួកគី ក្រោយពីទូកចំនួន ២គ្រឿងដឹកពេញដោយជនភៀសខ្លួនស៊ីរីឆ្ពោះទៅកាន់ប្រទេសក្រិកបានលិចកាលពីយប់ថ្ងៃអង្គារឆ្លងចូលថ្ងៃពុធ ទី២ កញ្ញា។
ក្រោយពីទទួលបានដំណឹងលិចទូកទំាងពីរភ្លាម កម្លំាងសង្រ្គោះតួកគីក៏បានចេញអន្តរាគមន៍ជួយ ហើយក៏ស្រង់បានសាកសពចំនួន ១២នាក់ដែលមានម្នាក់ជាសពកូនក្មេងទើបមានអាយុ ៣ឆ្នំានោះឯង។ មានរូបថតចំនួនពីរសន្លឹកដែលពិភពលោកបានឃើញ ទី១ ជារូបថតសពកូនក្មេងកំពុងដេកផ្កាប់មុខនឹងខ្សាច់ និងទី២ ជារូបថតដែលឆ្មាំសមុទ្រតួកគីបានលើកសពកូនក្មេងនោះទៅត្រកងបីក្នុងដៃ។ រូបថតទំាងពីរនេះត្រូវបានផ្សព្វផ្សាយ និងមានការបញ្ចេញប្រតិកម្មយ៉ាងព្រោងព្រាតនៅលើបណ្តាញសង្គម។
ក្រៅពីនោះ រូបថតទំាងពីរក៏ត្រូវបានសារព័ត៌មាននៅអឺរ៉ុបយកទៅចុះផ្សាយនៅលើទំព័រមុខរបស់ខ្លួនដែរ។ កាសែតប្រចំាថ្ងៃអង់គ្លេស The Guardian បានដាក់ចំណងជើងពីលើរូបថតថា « សោកនាដកម្មមនុស្សលោកគួរឲ្តរន្ធត់នៅតាមឆ្នេរសមុទ្រអឺរ៉ុប »។ « បើរូបភាពសពកូនក្មេងជនភៀសខ្លួនស៊ីរីនៅឆ្នេរសមុទ្រអឺរ៉ុបនេះមិនអាចដាស់តឿនអឺរ៉ុបឲ្យគិតគូរពីរឿងជនភៀសខ្លួនទេ តើមានអ្នកណាអាចគិតគូរបាន? » នេះជាចំណងជើងបែបសំណួររបស់កាសែតអង់គ្លេសឈ្មោះ The Independent។ ចំណែកកាសែតចេញផ្សាយនៅក្នុងប្រទេសបែលហ្ស៊ិក Le Soir ក៏បានផ្តិតរូបថតសពកូនក្មេងនោះ រួចចោទជាសំណួរថា តើរូបថតនោះអាចនឹងជួយដាស់សម្បជញ្ញៈអឺរ៉ុបឲ្យគិតគូរពីជោគវាសនារបស់ជនភៀសខ្លួនដែរ ឬយ៉ាងណា។
គួររម្លឹកជូនឡើងវិញថា គិតតំាងពីដើមឆ្នំា ២០១៥ មក មានជនភៀសខ្លួន និងជនអន្តោប្រវេសន៍សរុបជាង ៣៥០ ០០០នាក់បានភៀសខ្លួនផ្សងព្រេងតាមមហាសមុទ្រមេឌីទែរ៉ាណេមកកាន់ទ្វីបអឺរ៉ុប ក្នុងនោះមានជាង ២ ៦០០នាក់បានចោលឆ្អឹងនៅក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ