វិបត្តិជនភៀសខ្លួន៖បារាំង និងអាល្លឺម៉ង់អំពាវនាវឲ្យអឺរ៉ុបរកដំណោះស្រាយរួមគ្នា « តែមួយ »
លោកប្រធានាធិបតីបារាំងបានអញ្ជើញទៅចូលជួបលោកស្រីនាយករដ្ឋមន្រ្តីអាល្លឺម៉ង់នៅទីក្រុងប៊ែកឡាំង កាលពីរសៀលថ្ងៃចន្ទ ទី២៤ សីហា ដើម្បីធ្វើការពិភាក្សាស្តីពីវិបត្តិជនភៀសខ្លួន ដែលកំពុងតែសម្រុក ចូលតាមច្រកព្រំដែននានា មិនថា តាមផ្លូវទឹក រឺតាមផ្លូវគោក ដើម្បីមកសុំសិទ្ធិជ្រកកោន នៅបណ្តាប្រទេសអឺរ៉ុបខាងលិច និងខាងជើង។ ថ្នាក់ដឹកនាំទាំងពីរបានស្រុះស្រួលយោបល់គ្នា ដោយបានអំពាវនាវ ឲ្យសហភាពអឺរ៉ុប រកដំណោះស្រាយបន្ទាន់រួមគ្នាមួយ ដើម្បីទទួលជនភៀសខ្លួន។
ចុះផ្សាយនៅថ្ងៃ៖
ស្តាប់ - ០២:២០
ជំនួបរវាងលោកប្រធានាធីបតីបារំាងហ្រ្វង់ស័រ ហូឡង់ និងលោកស្រីប្រមុខរដ្ឋាភិបាលអាល្លឺម៉ង់ អង់ហ្គេឡា មែគែល នៅទីក្រុងប៊ែលឡាំង នារសៀលថ្ងៃចន្ទ ម្សិលមិញ បានផ្តោតទៅលើបញ្ហាពីរ ជាចំបង គឺ បញ្ហា វិបត្តិនៅអ៊ុយក្រែន និង បញ្ហាវិបត្តិជនអន្តោប្រវេសន៍ រាប់ម៉ឺននាក់ ដែលកំពុងតែសម្រុកនាំគ្នា ធ្វើដំណើរ មកកាន់ទ្វីបអឺរ៉ុប។ អ្វីដែលគ្រប់គ្នា ចាំតាមដាន គឺលទ្ធផលនៃកិច្ចពិភាក្សារវាង ថ្នាក់ដឹកនាំប្រទេសទាំងពីរ ដែលគេតែងតែដឹងថា ជារៀងរហូតមក តែងតែជាកម្លាំងចលករ យ៉ាងសកម្ម ក្នុងការកសាង និងដឹកនាំ សហភាពអឺរ៉ុបទាំងមូល។
ទីបំផុតទៅ ក្រោយកិច្ចប្រជុំ នៅចំពោះមុខអ្នកកាសែត លោកប្រធានាធិបតីបារាំង បានថ្លៃងថា វាគឺជាការចាំបាច់ និងបន្ទាន់ ជាទីបំផុត ដែលសហភាពអឺរ៉ុបទាំងមូល ត្រូវចាប់ដៃគ្នា ស្វែងរកដំណោះស្រាយរួមគ្នា តែមួយ។ លោកបន្តថា យើង ត្រូវតាក់តែង នូវប្រព័ន្ធច្បាប់ស្តីពីសិទ្ធិជ្រកកោន របស់ជនភៀសខ្លួន « តែមួយដូចគ្នា » មិនមែន ម្នាក់ៗធ្វើតាមការស្ម័គ្រចិត្ត ដូចសព្វថ្ងៃនេះទេ។ លោកប្រធានាធិបតីបារាំង បានបន្ថែមថា ត្រូវតែប្រញាប់ប្រញ៉ាល់ បន្ថែមមណ្ឌលទទួលជនភៀសខ្លួន នៅក្រិក និង អ៊ីតាលី។
ហើយអ្វីដែលសំខាន់ គឺត្រូវបែងចែកឲ្យបានច្បាស់ ថាអ្នកណា ជាជនភៀសខ្លួន ដែលរត់គេចពីសង្រ្គាម កាប់សំលាប់ និងអ្នកណាខ្លះ ដែលគ្រាន់តែជាជនអន្តោប្រវេសន៍ ដែលមានបំណង មករកការងារធ្វើនៅអឺរ៉ុប។ លោកស្រី អង់ហ្គេឡា មែគែល ដែលនៅឈរអមក្បែរនោះ បានបញ្ជាក់បន្ថែមថា ស្ថានភាពបច្ចុប្បន្ននេះ គឺជាស្មានភាពដ៏កម្រ និងធ្ងន់ធ្ងរ ហើយ បើសិនជាគ្រប់គ្នាព្រមព្រៀងថា នឹងបង្កើតច្បាប់គ្រប់គ្រង ជនភៀសខ្លួន តែមួយដូចគ្នា ទាំងអស់គ្នា គឺត្រូវ ចាប់ផ្តើមធ្វើវា ឲ្យបានឆាប់ជាទីបំផុត។
សូមបញ្ជាក់ថា ច្បាប់ស្តីពីជនអន្តោប្រវេសន៍ និងជនភៀសខ្លួន នៅសហភាពអឺរ៉ុបបច្ចុប្បន្ន គឺយោងទៅលើកិច្ចព្រមព្រៀងក្រុងឌុបប្លាំង ដោយឈរលើគោលការណ៍ស្ម័គ្រចិត្ត របស់ប្រទេសសមាជិកនីមួយៗ។ រាល់ពាក្យសុំសិទ្ធិជ្រកកោន ត្រូវតែដាក់សុំនៅប្រទេសទីមួយ ដែលជនភៀសខ្លួន បានមកដល់មុនគេ។ ក្នុងករណីនេះ មានតែប្រទេសសមាជិក ដែលនៅជាយព្រំដែន ដូចជា ក្រិក និង អ៊ីតាលី ជាដើម ដែលមានបន្ទុក ទទួលចាត់ចែង កិច្ចការនេះ តែម្នាក់ឯង។
យោងតាមតួលេខផ្លូវការ គិតពីដើមឆ្នាំ២០១៥នេះមក មានជនភៀសខ្លួន ចំនួន ៣សែន ៤ម៉ឺននាក់ ដែល បានធ្វើដំណើរមកដល់ទឹកដី អឺរ៉ុប។ គ្រាន់តែនៅក្នុងថ្ងៃសៅរ៍ ទី ២២ សីហា តែមួយថ្ងៃ នាវាល្បាតអ៊ីតាលី បានស្រង់ទូកដឹកជនភៀសខ្លួន មានចំនួនដល់ទៅ ៤៤០០នាក់ ពីក្នុងសមុទ្រម៉េឌីទែរ៉ាណេ។ ចាប់តាំងពីដើមខែ មិថុនាមក មានជនភៀសខ្លួន ជាង៤ម៉ឺននាក់ ដែលបានឆ្លងកាត់តាមក្រិក ហើយចូលកាត់តាមប្រទេសម៉ាសេដ្វាន មុននឹងបន្តឆ្លងកាត់តាម ប្រទេសស៊ែប៊ី ដើម្បីឡើងទៅអឺរ៉ុបខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ