ភេរវកម្មពីរផ្ទួនៗគ្នាសម្លាប់មនុស្សយ៉ាងតិច ៨៦នាក់ នៅតួកគី
តួកគី កាលពីពេលព្រឹកថ្ងៃសៅរ៍ ម្សិលមិញ បានទទួលរងការវាយប្រហារភេរវកម្មពីរកន្លែង ដែលបានសម្លាប់មនុស្សយ៉ាងតិច ៨៦នាក់។ នេះបើតាមផ្តល់ដោយក្រសួងសុខភិបាលតួកគី។ នៅព្រឹកថ្ងៃសៅរ៍ គ្រាប់បែកបានផ្ទុះឡើង នៅកណ្តាលក្បួន ហែររបស់ប្រជាជន ដែលត្រូវធ្វើបាតុកម្ម ទាមទារសន្តិភាព នៅតួកគី។ ភ្លាមៗ ប្រធានាធិបតីតួកគីបានប្រកាសថ្កោលទោស ការវាយប្រហារ ដែលបង្កប់ដោយគំនិតស្អប់ ប្រឆាំងនឹងការរួបរួម និងសន្តិភាពរបស់តួកគី។
ចុះផ្សាយនៅថ្ងៃ៖ កែប្រែថ្ងៃទី៖
ជាសោកនាដកម្ម សម្លាប់មនុស្សធ្ងន់ធ្ងរ ដែលរដ្ឋធានីអង់ការ៉ារបស់តួកគី មិនដែលធ្លាប់ជួបប្រទះពីមុនមក។ នៅព្រឹកថ្ងៃសៅរ៍ នៅក្បែរស្ថានីយ៍រថភ្លើងកណ្តាលរដ្ឋធានី អង់ការ៉ា គ្រាប់បែកបានផ្ទុះឡើង នៅក្នុងចំណោមក្រុមមនុស្ស ដែលកំពុងត្រៀមចូលរួម ដើរក្នុងក្បួនដង្ហែរ បាតុកម្មសន្តិភាព។ ទៅតាមការអំពាវនាវរបស់គណបក្សប្រឆាំង គណបក្សប្រជាធិបតេយ្យ ប្រជាជន ដែលគាំទ្រពួកឧទ្ទាមគួដPKK ប្រជាជនតួកគី មកពីគ្រប់ទិសទី បានធ្វើដំណើរចូលរដ្ឋធានី ដើម្បីចូលរួមក្នុងក្បួនដង្ហែរ ទាមទារឲ្យមានការឈប់ច្បាំងគ្នា រវាងរដ្ឋាភិបាល និងក្រុមឧទ្ទាម គួដ PKK។
យោងតាម ក្រសួងសុខាភិបាលតួកគី ព្រឹត្តិការណ៍បំផ្ទុះគ្រាប់បែកបានសម្លាប់មនុស្សយ៉ាងហោច៨៦នាក់ និងរបួស ១៨៦នាក់ ដែល ក្នុងនោះ ២៨រងរបួសធ្ងន់ធ្ងរ។ ក្រសួងមហាផ្ទៃតួកគីបានបើកការស៊ើបអង្កេត ដើម្បីរកឲ្យឃើញ តើជាភេរវកម្ម អត្តឃាត ឬជាភេរវកម្ម ដែលក្រុមជនដៃដល់ យកគ្រាប់ទៅបង្កៃ បំផ្ទុះ នៅក្នុងក្បួនដង្ហែររបស់ក្រុមបាតុករ។ ប្រធានាធិបតីតួកគី លោករេស៊ីប អ៊ែរដូហ្កានវិញ បានបញ្ជាក់ថា គឺសម្មតិកម្ម ភេរវកម្ម ដែលប៉ូលិសតួកគីកំពុងស៊ើបអង្កេតជាអាទិភាព។ ប្រមុខដឹកនាំបារាំង វិញ បានថ្កោលទោសអំពើភេរវកម្ម ចំណែកប្រធានាធិបតីរុស្ស៊ី លោកពូទីន បានផ្ញើសារ ចូលរួមរំលែកទុក្ខសោក ជាមួយថ្នាក់ដឹកនាំតួកគី។
គណបក្សប្រជាធិបតេយ្យប្រជាជន ដែលគាំទ្រក្រុមPKK និងជាអ្នកផ្តួចផ្តើមគំនិតរៀបចំក្បួនដង្ហែរជាមួយសហជីព ក្នុងប្រទេសតួកគីបានសំដែងការសោកស្តាយចំពោះការបាត់បង់ជីវិតមនុស្ស និងបានបន្ទោស ទម្លាក់កំហុស ទៅលើប៉ូលិសតួកគី ដែលអសមត្ថភាព មិនអាចថែរក្សាសន្តិសុខឲ្យក្បួនបាតុកម្ម។ ប៉ូលិសតួកគីត្រូវបានក្រុមបាតុកររិះគន់យ៉ាងចាស់ដៃ ផងដែរ ព្រោះបើតាមពួកគេ នៅក្រោយពេលភេរវកម្មផ្ទុះឡើង ប៉ូលិសមិនបានជួយសម្រួលបើកផ្លូវឲ្យពួកគេទៅជួយអ្នករបួសទេ ផ្ទុយទៅវិញ ប៉ូលិស បានបាញ់គ្រាប់កាំភ្លើងពិត និងឧស្ម័នបង្ហូរទឹកភ្នែក ដើម្បីបំបែកហ្វូងបាតុករ។
ភេរវកម្មសម្លាប់មនុស្សដ៏ធ្ងន់ធ្ងរ នៅតួកគី កើតមានតែនៅ៣សប្តាហ៍មុនដែលតួកគីត្រូវរៀបចំការបោះឆ្នោត សាជាថ្មី នៅថ្ងៃ ទី ១វិច្ឆិកា បន្ទាប់ពីគណបក្សនយោបាយ ចរចាមិនត្រូវគ្នា ដើម្បីបង្កើតរដ្ឋាភិបាលចម្រុះ នៅក្រោយការបោះឆ្នោត នាខែមិថុនាកន្លងទៅ។
តាមអ្នកជំនាញជាច្រើន ព្រឹត្តិការណ៍បំផ្ទុះគ្រាប់ នៅថ្ងៃសៅរ៍ មានលក្ខណៈស្រដៀងគ្នាទៅនឹងភេរវកម្មប្រឆាំងនឹងទីស្នាក់ការរបស់គណបក្សប្រជាធិបតេយ្យប្រជាជន (មាននិន្នាការទៅរកក្រុមឧទ្ទាមគួដPKK ដែលរដ្ឋាភិបាលតួកគី ចាត់ទុកជាក្រុមភេរវនិយម) ដែលកើតឡើងតែនៅប៉ុន្មានថ្ងៃមុនការបោះឆ្នោតជាតិខែមិថុនា។ អាជ្ញាធរតួកគីមិនបានចាប់បានឃាតករទេ ប៉ុន្តែ បានទម្លាក់ការចោទប្រកាន់ទៅលើក្រុមជីហាតអង្គការរដ្ឋអ៊ីស្លាមនៅស៊ីរី ថាអ្នកបង្កអំពើភេរវកម្ម ក្នុងពេលដែលក្រុមនេះមិនបានប្រកាសចេញមុខម្តងណាទេ។
នៅក្រោយ ភេរវកម្ម សម្លាប់បាតុករតួកគី នៅថ្ងៃសៅរ៍ ក្រុមឧទ្ទាមគួដ PKKបានចេញសេចក្តីថ្លែងការណ៍មួយដែលថា ខ្លួននឹងផ្អាកការប្រយុទ្ធ ការវាយប្រហារទៅលើអាជ្ញាធរតួកគី ក្នុងអំឡុងពេលដែលតួកគីត្រូវត្រៀមរៀបចំការបោះឆ្នោត នៅថ្ងៃទី ១វិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ