តួកគី ធ្លាក់ក្នុងវិបត្តិនយោបាយ និងអំពើហឹង្សា
នៅថ្ងៃពុធ ទី ១៩ សីហា មានភេរវកម្មបំផ្ទុះគ្រាប់បែកមួយ បានកើតឡើង នៅភាគអាគ្នេយ៍តួកគី ដោយបានសម្លាប់ទាហានតួកគី៨នាក់។ នៅក្នុងថ្ងៃដដែល ហេតុការណ៍ផ្ទុះគ្រាប់កាំភ្លើង មួយបានកើតឡើងនៅក្បែរវិមាននាយករដ្ឋមន្រ្តីតួកគី កណ្តាលក្រុងអ៊ីស្តង់ប៊ូលតែម្តង។ ក្នុងខណៈពេលនេះ តួកគីកំពុងតែជួបការរាំងស្ទះនយោបាយ ដោយសារតែនាយករដ្ឋមន្ត្រី មិនអាចបង្កើតជារដ្ឋាភិបាលចំរុះបាន។ ប្រធានាធិបតីតួកគី បានលើកឡើងថា ការបោះឆ្នោត នឹងអាចរៀបចំសារជាថ្មី ក្នុងពេលឆាប់ៗ ខាងមុខនេះ។
ចុះផ្សាយនៅថ្ងៃ៖
ស្តាប់ - ០២:២០
យ៉ាងហោចណាស់ មានទាហានតួកគី៨នាក់ បានស្លាប់ ក្នុងហេតុការណ៍ បំផ្ទុះគ្រាប់បែកមួយ នៅក្នុងខេត្តសៀរត៍ ភាគអាគ្នេយ៍តួកគី។ ហេតុការណ៍នេះ បានកើតឡើង ក្នុងថ្ងៃពុធ ទី១៩សីហា ដោយគេបានដាក់ការសង្ស័យថា ជាស្នាដែ របស់ក្រុមអ្នកតស៊ូជនជាតិគៀដ នៃគណបក្សពលករគៀឌីស្ថាន ហៅកាត់ថា PKK។ ក្រុមនេះបានធ្វើការសងសឹក ទៅលើទាហានរដ្ឋាភិបាលគៀដ បន្ទាប់ពីប្រធានាធិបតីតួកគី បានដាក់បញ្ជា ឲ្យចេញប្រតិបត្តិការ ទម្លាក់គ្រាប់បែក លើមូលដ្ឋាន របស់ពួកគេ ក្នុងរយៈពេល២សប្តាហ៍ កន្លងមកនេះ។
នៅក្នុងថ្ងៃពុធដដែលនេះដែរ មានហេតុការណ៍ផ្ទុះអាវុធមួយ នៅកណ្តាលក្រុងអ៊ីស្តង់ប៊ូល ក្បែរវិមាននាយករដ្ឋមន្ត្រីតួកគី។ បុរសពីរនាក់ត្រូវបានគេចាប់ខ្លួនភ្លាមៗ ដោយបានរឹបអូសយក គ្រាប់បែកដៃ និងអាវុធជាតិផ្ទុះមួយចំនួន។ នេះបើតាមការរាយការណ៍ របស់អាជ្ញាធរក្រុងអ៊ីស្តង់ប៊ូល។ តាមប្រភពដដែលបានឲ្យដឹងថា ជនទាំងពីរនាក់នេះ គឺជាបណ្តាញភេរវកម្ម តែមិនបានបញ្ជាក់ថាជាក្រុមខាងណាទេ ដោយគ្រាន់តែបានអះអាងថា ពួកគេមានចេតនាបោកគ្រាប់បែក និងសំលាប់អ្នកយាមរបងវិមាននាយករដ្ឋមន្ត្រី។
សូមបញ្ជាក់ថា ហេតុការណ៍ហឹង្សាផ្ទួនៗគ្នាទាំងនេះ គឺកើតឡើងក្នុងខណៈពេលដែលស្ថានភាពនយោបាយតួកគី ជួបភាពទ័លច្រក ដោយសារតែលោកនាយករដ្ឋមន្ត្រីតួកគី Ahmet Davutoglu មិនអាចចរចា ស្វែងរកដៃគូ មកបង្កើតជារដ្ឋាភិបាលចំរុះមួយបាន។
សូមរំលឹកថា គណបក្សយុត្តិធម៌ និងការអភិវឌ្ឍន៍ ដែលដឹកនាំដោយលោកប្រធានាធិបតីតួកគី Recep Tayyip Erdogan បានដឹកនាំប្រទេសតែម្នាក់ឯង ចាប់តាំងពីឆ្នាំ២០០២មក។ ទើបតែក្នុងពេលបោះឆ្នោត កាលពីខែមិថុនាកន្លងទៅនេះ ដែលគណបក្សនេះបានបាត់បង់សម្លេងភាគច្រើន នៅក្នុងសភា ហើយត្រូវរកជំនួយពីគណបក្សផ្សេងទៀត ដើម្បីបង្កើតជារដ្ឋាភិបាលចំរុះ។ ថ្ងៃឱសានុវាទ នៃការបង្កើតរដ្ឋាភិបាលចំរុះ គឺថ្ងៃទី ២៣ សីហា ខាងមុខនេះ។ ប៉ុន្តែមកដល់ថ្ងៃពុធ ម្សិលមិញនេះ នាយករដ្ឋមន្ត្រីតួកគី បានដាក់លិខិតទៅកាន់ប្រធានាធិបតី ដោយបញ្ជាក់ពីបរាជ័យក្នុងការបង្កើតរដ្ឋាភិបាលចំរុះ។
ក្រុមគណបក្សប្រឆាំង បានរិះគន់លោកប្រធានាធិបតី Erdogan ថាបានរៀបយុទ្ធសាស្រ្ត បង្ករអស្ថិរភាព និងការភ័យខ្លាច ដល់ប្រជាជន និងក្រុមប្រឆាំង តាមរយៈការវាយប្រហារ ទៅលើកម្លាំងតស៊ូជនជាតិគៀដ។ ហើយបន្ទាប់មកទៀត ថ្ងៃឱសានុវាទបង្កើតរដ្ឋាភិបាលចំរុះ នឹងមកដល់ ដូច្នេះ លោកនឹងអាចរៀបចំឲ្យមានការបោះឆ្នោតសាជាថ្មី ដោយយកលេសថា មិនអាចបង្កើតរដ្ឋាភិបាលចំរុះបាន។
ដូចការប៉ាន់ស្មាន លោកប្រធានាធិបតីតួកគី បានប្រកាសឲ្យដឹង នៅរសៀលថ្ងៃពុធ ទី១៩ សីហាថា បើដល់ថ្ងៃកំណត់នៅតែរៀបចំរដ្ឋាភិបាលចំរុះមិនបាន វាជារឿងចាំបាច់ ដែលត្រូវធ្វើការបោះឆ្នោតសាជាថ្មី ម្តងទៀត។ យុទ្ធសាស្ត្រ នេះអាចធ្វើឲ្យគណបក្សលោក ប្រធានាធិបតី អាចប្រមូលបានសំឡេងភាគច្រើន នៅក្នុងសភាឡើងវិញ ក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ