ជនភៀសខ្លួនទាំង៤៥០នាក់ បានមកដល់កំពង់ផែអ៊ីតាលី
នាវាដឹកជនភៀសខ្លួន ឈ្មោះ Ezadeen ដែលមានផ្ទុកមនុស្ស៤៥០ នាក់ ត្រូវបានក្រុមសង្គ្រោះអ៊ីតាលី បាននាំមកដល់ កំពង់ផែហើយ។ នៅពីក្រោយយុទ្ធនាការនេះ អ្នកវិភាគ មានការព្រួយបារម្ភ ពីវិធីសាស្ត្រថ្មី ដែលពួកអ្នករកស៊ីជួញដូរ ជនអន្តោប្រវេសន៍ បានប្រើ ដូចក្នុងករណីនេះ គឺយកមនុស្សមួយកប៉ាល់ មកចោល ហើយទុកឲ្យប្រទេសអឺរ៉ុបមកសង្រ្គោះ។ មួយវិញទៀត វាក៏ស្តែងឲ្យឃើញ អំពី ភាពអសកម្ម និងអប្រសិទ្ធិភាព នៃនយោបាយគ្រប់គ្រងអន្តោប្រវេសន៍ របស់អឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅម៉ោងប្រមាណជា ១០យប់ ថ្ងៃទី ២ មករា ក្រុមសង្គ្រោះ អ៊ីតាលី បានសណ្តោងយក កប៉ាល់ Ezadeen មកដល់គោក នៅកំពង់ផែ Corigliano ដោយមានការសហការពី ក្រុមនាវិក ប្រទេសអ៊ីសឡង់ដ៍។ នៅលើនាវា មានមនុស្ស ៤៥០ ដែលសុទ្ធសឹងតែ ជាជនអន្តោប្រវេសន៍ ធ្វើដំណើរ មកអឺរ៉ុប ដើម្បីស្វែងរកសិទ្ធិជ្រកកោន។ ពួកអ្នកបើកបរកប៉ាល់ ដែលជាក្រុមជួញដូរ ដឹកជញ្ជូនជនអន្តោប្រវេសន៍ខុសច្បាប់ បានរត់ចោលកប៉ាល់ ដោយទុកឲ្យ មនុស្សទាំង៤៥០ នាក់ នៅតែលតោលកណ្តាលសមុទ្រ។
ជាសំណាងល្អ ស្ត្រីម្នាក់ បាននិយាយតាមវិទ្យុទាក់ទង ជាមួយអាជ្ញាធរអ៊ីតាលី ដើម្បីស្វែងរកជំនួយ។ ក្នុងចំណោមមនុស្សទាំង ៤៥០នាក់ មានក្មេងជាង៥០ នាក់ និងស្ត្រីជាច្រើននាក់ ដែលមានផ្ទៃពោះ។ នៅថ្ងៃសៅរ៍នេះ អាជ្ញាធរ អ៊ីតាលី បានបញ្ជូនពួកគេ ទៅដាក់នៅ មជ្ឈមណ្ឌល មួយ នៅលើកោះស៊ីស៊ីល ដើម្បីរងចាំដំណោះស្រាយ។ ដោយឡែក អាជ្ញាធរ អ៊ីតាលី មិនបានប្រាប់ឲ្យដឹង ថាជនភៀសខ្លួនទាំងនោះ មានសញ្ជាតិអ្វីខ្លះទេ។ ប៉ុន្តែបើតាម ការរាយការណ៍របស់ ទូរទស្សន៍អ៊ីតាលី បានឲ្យដឹងថា ជនភៀសខ្លួន ទាំង៤៥០នាក់នេះ សុទ្ធសឹងតែជាជនជាតិ ស៊ីរីទាំងអស់។
សូមជំរាប ថា ក្នុងរយៈពេល មិនដល់បីថ្ងៃផង ពួកឈ្មួញដឹកជញ្ជូនជនភៀសខ្លួន បានប្រើប្រាស់កប៉ាល់ធំៗ ដល់ទៅពីរគ្រឿង ដឹកមនុស្ស ជាងមួយពាន់នាក់ មកចោលនៅក្នុងសមុទ្រ មេឌីទែរ៉ាណេ។ កន្លងមក ពួកឈ្មួញ វាបានប្រើប្រាស់ទូកតូចៗ រខេករខាក ដឹកមនុស្សបានជាង ២០ ទៅ៣០នាក់ប៉ុណ្ណោះ។ មានជនអន្តោប្រវេសន៍ជាច្រើន បានស្លាប់ ដោយសារលិចទូក និងមានជំងឺក្នុងពេលធ្វើដំណើរ។
អ្នកតំណាង អង្គការជនភៀសខ្លួនអន្តរជាតិ បានបញ្ជាក់ថា ឥឡូវនេះពួកឈ្មួញ បានប្រើប្រាស់មធ្យោបាយថ្មី ដោយប្រើកប៉ាល់ដឹកទំនិញធំៗតែម្តង ដើម្បីដឹកមនុស្សបានច្រើន ហើយប្រមូលប្រាក់ បានយ៉ាងសន្ធឹកសន្ធាប់។ លោកបន្ថែមថា មនុស្សម្នាក់ត្រូវបង់ឲ្យពួកវា ពី ១ពាន់ ទៅ២ពាន់ដុល្លារ។ ពួកវា ប្រើប្រាស់កប៉ាល់ចាស់ ដែលអាចឲ្យពួកវា រត់ចោលយកប្រាសអាយុ បាន ក្នុងករណី មានអាសន្ន។ ដូចក្នុងករណី កប៉ាល់ Ezadeen នេះអញ្ចឹង ដែលពួកឈ្មួញ បានទុកចោល មនុស្សលើកប៉ាល់ ដូចសត្វធាតុ។ មួយជើងៗ ពួកឈ្មួញខុសច្បាប់ រកលុយបានជាង ១លានដុល្លារឯណោះ។
នៅពីក្រោយការ ប្រើប្រាស់មធ្យោបាយដឹកជញ្ជូនថ្មីនេះ វាក៏បានបង្ហាញអំពី ភាពខ្វះចន្លោះ និងអសកម្មរបស់ នយោបាយអន្តោប្រវេសន៍របស់សហគមន៍អឺរ៉ុប។ ប៉ុន្មានឆ្នាំចុងក្រោយនេះ មានមនុស្សភៀសខ្លួន ច្រើនជាងជំនាន់សង្គ្រាមលោក លើកទីពីរទៅទៀត។ មនុស្សទាំងនោះ ត្រូវរត់គេចពី ការកាប់សំលាប់ និងសង្គ្រាម តួយ៉ាងដូចជាប្រជាជន ស៊ីរី និងអ៊ីរ៉ាក់ ជាដើម។ ការបិទព្រំដែន តែមួយមុខ មិនមែនជាដំណោះស្រាយនោះទេ។ ជីកស្មៅត្រូវជីកទាំងឬស។ អឺរ៉ុបត្រូវពង្រឹងកិច្ចសហការ ដើម្បីលប់បំបាត់ចរាចរណ៍ខុសច្បាប់ លើជនភៀសខ្លួន។ ការចូលរួមកសាងសន្តិភាព និងអភិវឌ្ឍន៍ ប្រទេសក្រីក្រ ក៏ជាដំណោះស្រាយមួយដែរ។ ដ៍រាបណា ប្រទេសទាំងនោះ នៅតែមានសង្គ្រាម នៅតែក្រីក្រតោកយ៉ាក មនុស្សនឹងនៅតែបន្តរត់មកទ្វីបអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ